Kuti Mwacingilila Shani Abana Benu?

PA NUMA ya kupwisha ukusambilila pe sukulu lya mupepi no ko aaleikala, Wernera atendeke amasomo ya pa muulu pamo na bacaice bambi mupepi na 3,000 mu São Paulo, ku Brazil. Pa muku wa kubalilapo, amwene uko abana be sukulu banankwe baleshitisha no kunwa imiti ikola. Apo ali uwa ciimo icinono, tapakokwele abana be sukulu abakulileko batendeke imisango ya kumusaalula no kumucusha.

Eva nkashi kwa Werner nao wine aali no bwafya. Apantu alefwaya ukubombesha, alebelengesha ica kuti camulengele ukufunshika no kufulunganishiwa mu muntontonkanya. Werner na Eva baalekabila ukucingililwa lwa ku mubili na lwa mu nkuntu ukupala abana kukula bambi. Kwafwa nshi abana benu bakabila? Kuti mwabapangasha shani mu mikalile ya bukalamba? Ukulanda mu kushikimika, mufwaya abana benu bakeseikala shani?

Te Kusunga fye Kweka Abana Bakabila

Tontonkanyeni cinono pa bwafya abafyashi bakumanya mu kucingilila abana babo ilelo. Abana abekala mu misebo balefulilako pa mulandu wa kuti imikalile ya lupwa naibotelela e lyo no bupiina nabufula mu fyalo ifingi. Apantu abafyashi tabacingilila abana ku mucuusha e calenga abana ukuti balebomfiwa mu sha ncito. Imiti ikola na yo ine ilonaula abacaice abengi. Ku ca kumwenako, lintu umupungwe umo uwa ku Brazil aishilekunkuma ku miti ikola, pa mwabo tapaali mutende iyo. Ukulunda pa kukanshika kwa mu nkuntu abafyashi bakwe bapitilemo, calyafishe ukufwaya indalama sha ku mundapila, kabili bakashitisha wa miti ikola ababulo luse baishile pa ng’anda ku kupinda indalama.

Nangu cibe fyo, te mulandu na mafya ya mikalile, abafyashi abengi bacili balepikintika ukupayanishisha abana babo ifya kulya, ifya kufwala, no mwa kwikala e lyo no kubacingilila ku lukaakala, ku kubomfye miti ikola, na ku mafya yambi. Uku kubombesha kusuma, lelo bushe kwalikumanina? Ni shani pa lwa kubacingilila ku busanso bwa mu nkuntu no bwa ku mupashi? Abengi baliluko kuti ukuba umufyashi umusuma kusanshamo ukubombela pa mafya abana bakumanya mu kusala ifibusa ne myangalile. Nalyo line, ni shani fintu abafyashi bengasengauka ukucishamo ukucingilila abana babo nelyo ukubatekelesha? Twamulaalika ukumfwa ifyasuko mu cipande cakonkapo.

[Futunoti]