Ibungano lya mu 1998 Ilya Nte sha kwa Yehova Ilileti “Imikalile ya Bukapepa”
1 Cila mwaka bakapepa ba kwa Yehova mwi sonde lyonse aba muno nshiku benekela ukubungana capamo mu mpendwa ikalamba ku mabungano ya citungu. Muli fyo, balangisha imibele ya babomfi ba busumino aba kwa Yehova aba mu Israele wa pa kale abaimbile ne nsansa amashiwi ya mu Ilumbo 122 ilyo baleya ku kupepa Yehova ku Yerusalemu. Icikomo 1 ica lilya Ilumbo citila: “Nasaminwe ilyo basosele kuli ine, abati, Tuleya ku ŋanda ya kwa Yehova.” Pali sho nshita, tulamona ubushinino bwafulilako ubwa kuti amashiwi yapuutwamo aya pali Esaya 2:2, 3 yalefikilishiwa.
2 Uno mwaka tuli no mulandu waibela uwa kusekelela pantu amabungano yakaba nga yakasangwako ifyalo fyonse umulandu wa makana ya bakasangwa ku mabungano yakalamba abakafuma mu fyalo fimbi. Bamishonari abakabwelela ku kutandalila indupwa shabo ne fibusa bakasangwako ku mabungano ayengi. Kanshi, ibungano limo na limo likasanshamo ifya kukumanya mwi bala na malipoti ya kulunduluka kwa mulimo wa kushimikila Ubufumu mu fyalo fimbi.
3 Kwena, ni abo fye abasalwa na Sosaite e bakasangwa ku mabungano ya pa kati ka nko. Cintu cakatama ukuti bonse bomfwile ili ikambisho pa kuti amabungano yakacitwe busaka busaka. Amabungano yonse yakaba nga yasangilweko aba ku fyalo fimbi pa mulandu wa fimo fimo ifikaba mu programu, amalipoti, pamo no kubapo kwa bamishonari. Kanshi, nangu ca kuti abengi tatwakasangwe kwi bungano lya pa kati ka nko ilili lyonse, ukubombesha ukuti tukasangwe kwi bungano lyesu ca kulengo buseko. Bumunyina bwawamisha ubwa mwi sonde lyonse butupeela ukubishanya kwa kutemwa ukwa bamunyina ne nkashi abekala mu mbali shonse ishe sonde.—Yoh. 13:35.
4 Ilyo tuletwalilila ukupekanishisha Ibungano lya Citungu ilya 1998 ilileti “Imikalile ya Bukapepa,” tulefwaya ukumonako ifyebo mukabomfya. Ukubombela pamo muli fi kukalanga ukuti mulatasha ukutantika konse ukuletantikilwa imwe.
5 Ukwa Kwikala: Ilingi line bamunyina balatantika ukwikala na balupwa nelyo ifibusa mupepi no kubelele ibungano. Mu mishi, bamunyina balakuula imisakuta nelyo ukusendama mu fiyanda ifyo bakabomba ba kwi bungano bateyanya. Amabungano yamo yashima ifikuulwa fya pa masukulu ku kwikalamo abeshile. Nga muleikala kuli bamunyina nelyo balupwa, tacalinga ukulya umundemwa no kwenekela ukwikalako inshiku na shimbi pa numa ye bungano. Iyi miputule ya kubomfya fye pe bungano epela. Abalesungwa balingile ukushininkisho kuti bene pamo na bana babo bacindika ing’anda ya kwa shibweni no kukanaonaula icili conse nelyo ukusakawila mu fipe nelyo ukwingila ukushilingile kwingilwa. Nga kwaba ubwafya pa lwa ici, bashibweni balingile ukweba Dipartimenti wa Mayanda pe bungano, kabili bamunyina bakaitemenwa ukwaafwa.
6 Ukucilikilo Mulilo na Masanso Yambi: Icilenga sana umulilo pa mabungano te kwipikila mupepi no musakuta, lelo bana abangasha umulilo nelyo abo bashiila umulilo. E co, pa kusengauka ubusanso bwingaponena imwe na bamunyinenwe, mwileka abana benu balelulumba beka; mwishiila abana amenshi yalebilauka, nelyo umulilo. Napamo balabomba bwino ifi ku ng’anda, lelo icifulo ce bungano capusanako kabili ukusakamana kwalundwako kulefwaikwa ku kusengauka amasanso. Kuno kwena abantu bekala pepi pepi, kabili abana balitemwa ukwangala nga bali na bana banabo. Balalafiwa bwangu no kukanamona ubusanso, na muli fyo tatufwile ukubashiila kandulo, machisa nelyo ilampi. Ubwafya na bumbi bwisa ilyo abafyashi baya ku kulongana no kusha abana beka ku misakuta. Abana balingile ukwikala na bafyashi ilyo amalyashi yalelandwa. Ilyo bakapyunga bamona abana balelulumba beka pe bungano, balingile ukubabwekesha ku bafyashi. Mwe bafyashi, twapaapaata ikataneni na bakabomba ba pe bungano na muli fyo ukulangisha ‘ukutemwa aba bwananyina.’—1 Pet. 2:17.
7 Ukuteyanya kwa kwa Yehova mu kutemwa kulapeela ifya kucinkulako pa nshita yalinga pa lwa mabungano. Ku ca bulanda, mu mabungano yamo yamo mu myaka yapita, ifipe fya bamo fyalipiile ku mulilo wayambwike ku mulandu wa mulekelesha. Bamunyina bashingamwa pe bungano, na bafyashi maka maka, balelombwa ukusakamana sana ifi fishinka fyakatama pa kuti amabungano yakabe ya kukuulilila no kubishanya kusuma, kwikaba ubulanda pa mulandu wa masanso yafuma mu mulekelesha.
8 Umfwileni Ukutungulula kwa Sosaite: Ici e cimo ica fintu tulingile ukwangwako sana. AbaHebere 13:17 batila: “Beni aba cumfwila ku balemutungulula, no kubanakila; pantu bene balinde myeo yenu, nga ‘bantu abakaba no kulubulula. Lekeni bacite ico no kusekelela, te mu bulanda iyo; pantu nga cabe fi, ninshi te ca kumwafwa cintu.” Tulelombwa ukwikatana mu filumbwilwe pa muulu. Bamunyina nga bamona ica kumwenako cesu, cilatwala pa ntanshi ukutemwa, ukwikatana, no kubombela pamo.—Moneni 1 Abena Korinti 16:16; Abena Filipi 2:1-4.
9 Ukukabila Kwaibela: Abakoloci, abanakuka ku mubili, aba mu mulimo wa nshita yonse, nelyo bambi kuti bafwaya ukwaafwa ukusangwa kwi bungano. Balupwa, baeluda, na bambi mu cilonganino abeshibe abali mu mibele ya musango yo iyaibela mu kutemwa kuti babapekanishisha, ukukaanakuushisha umulimo wa lupwa ne cilonganino kuli bakabomba ba pe bungano.—Linganyeniko 1 Timote 5:4.
10 Ku bashingasakamanwa muli yi nshila, formu wa Kulomba Umuputule uwa Sosaite alitantika imilingo ya bafikapo ukulomba umuputule. Ici cicitilwa fye bakasabankanya abashimikwa bwino, ukusanshako abakwata abana abomfwa, abasuminishiwa na Komiti wa Mulimo uwa Cilonganino. Ilyo mushilalemba formu wa Kulomba Umuputule, belengeni ifyebo fyaba pe samba lya formu no kufyumfwikisha. Aya maformu yali no kutumwa ku Dipartimenti wa Mayanda mu kwangufyanya.
11 Ukusangwa kwi Bungano Limbi: Icilonganino cimo cimo caebwa ukusangwa kwi bungano mupepi no ko cabela. Ukushimpwa pa mpendwa ya bakasabankanya abaebwa ukusangwa kwi bungano limo, Sosaite ilatunganya impendwa pa kuti ipekanye ifipuna fyakumanina, umwa kwikala, ifitabo, na fimbipo. Nangu cibe fyo, nga kuli umulandu usuma uwa kusangilwa kwi bungano limbi kabili mulekabila ukwa kusendama, kalemba wa cilonganino kuti alomba formu wa Kulomba Umuputule ukufuma ku Sosaite, untu mulingile ukulemba no kutwala basainapo. Lyene tumeni ku maofeshi ye bungano uko mukasangwa.
12 Sosaite ilapokelela bakalata abengi ukufuma kuli bamunyina ne nkashi abatasha ukupekanya babapekanishishe. Ulupwa lumo lwatile: “Tulefwaya ukumwebo kuti twalitasha nga nshi pe bungano. Natwishibe fyo talyali fye kuli cela mushuke, lelo ni pa mulandu wa kubombesha kwa bamunyina abengi. Twalemba uyu kalata ku kumutasha.”
13 Cilemoneka fye apabuuta ukuti Yehova aletungilila ukupekanya kwa mabungano ya pa mwaka. Ukushininkisha ukuti tuli ‘bacishinka ku cacepesha’ kutulenga ukwisapokelela amapaalo yawamisha ayapembelela abo Yehova atemwa.—Luka 16:10.