Shalikeni Trakiti Lyonse Ilyo Mwasanga Inshita
1. Bushe trakiti ya kuti Bushe Kuti Mwatemwa Ukwishiba Icine? itwafwa ukucita cinshi?
1 Trakiti ya kuti Bushe Kuti Mwatemwa Ukwishiba Icine? yalembelwa ukutwafwa ukutendeka amasambililo ya Baibolo. Na kabili iyi trakiti kuti yatwafwa sana ku kutanda bwino imbuto sha cine. (Luk. Mil. 11:6) Pano pali inshila isho twingabomfya pa kushalika iyi trakiti.
2. Bushe kuti twabomfya shani trakiti ku kutendeka ukulanshanya?
2 Ukutendeka Ukulanshanya: Kuti mwapeela umuntu mulelanshanya nankwe trakiti no ku mulanga ifipusho 6 ifili pe bula lya kubalilapo, kabili kuti mwamwipusha amuti: “Pali ifi ifipusho, cipusho nshi mutontonkanyapo sana?” Nga ayasuka, fwayeni icasuko muli trakiti icilangilila ifyo Baibolo yasuka icipusho ico umuntu mulelanda nankwe epwishe no kubelengapo ilembo limo ilishambwilwe. Belengeni ifyebo fili pe bula lya kulekelesha no kushalika icitabo ca Bushe Cinshi Baibolo Isambilisha? Nga ca kuti tapokele icitabo, lelo apoka trakiti, trakiti iine kuti yamwafwa ukulimbe cine mu mutima wakwe.—Mat. 13:23.
3. Cinshi tukacita nga ca kuti umuntu napamfiwa?
3 Nga ca Kuti Umuntu Napamfiwa: Kuti pambi mwasoso kuti: “Apo namupumikisha fye, nalamishiila iyi trakiti. Ikwete ifipusho 6 ifyacindama nga nshi ifyo nalimo bonse twaipushapo kabili iyi trakiti naikwata ne casuko ca mu kulungatika ukufuma muli Baibolo. Nga nabwela, kuti natemwa ukwisa-umfwa ifyo mukatontonkanyapo.”
4. Finshi twingalanda ilyo tuleshalika trakiti mu bunte bwa mu musebo?
4 Ilyo Tulebomba Ubunte bwa mu Musebo: Kuti mwatila: “Muli shani. Bushe mwalipushapo ifi fipusho? [Lekeni basuke.] Iyi trakiti naikwata ifyasuko ifisuma ukufuma muli Baibolo.” Nga ca kuti umuntu tapamfiwe, kuti pambi mwalanshanya icasuko cimo ukufuma muli trakiti, kabili shalikeni icitabo ca Bushe Cinshi Baibolo Isambilisha?
5. Bushe limo limo kuti twabomfya shani iyi trakiti nga twafika pa mayanda apashiba abantu?
5 Pa Mayanda Apashiba Abantu: Mu fifulo fimo ifya kubombelamo, bakasabankanya ilingi line balasha impapulo apafiseme, nga bafika pa mayanda apashiba abantu. Nga ca kuti e fyo mucita mu cilonganino cenu, mulandu nshi limo limo mushingashiila trakiti ya Bushe Kuti Mwatemwa Ukwishiba Icine? Nga mwaisabwelelako kuti pambi mwatila: “Umuku wafumineko ilyo twaishile, tatwamisangile pa ng’anda, nomba twalishiile iyi trakiti munshi ya ciibi. Bushe pali ifi fipusho ni cili kwi mwingatemwa ukuti twasuke?”
6. Mulandu nshi trakiti ya kuti Bushe Kuti Mwatemwa Ukwishiba Icine? yabela iyacindama pa kushimikila?
6 Muli iyi trakiti ya kuti Bushe Kuti Mwatemwa Ukwishiba Icine? mwaba icine icayanguka kabili icaumfwika. Iyi trakiti isuma ku bamipepele yonse ne ntambi. Yalyanguka ukushalika ica kuti nangu fye bana abanono na bakasabankanya abapya kuti bashalika. Bushe mulashalika iyi trakiti lyonse ilyo mwasanga inshita?