Bushe Tufwile Ukulakonka Ifyo Baibolo Ilanda pa Cisuma ne Cabipa na Muno Nshiku?
Abantu abengi ukubikako fye na bamo abalanda ukuti Bena Kristu, bamona kwati ifyo Baibolo ilanda pa kuba ne mibele isuma pamo nga abafwile ukulaala pamo na pa cupo ukuti fya kale. Amacalici yamo yalyalula ifyo isambilisha pa cisuma ne cabipa pa kuti filingane ne fyo abantu bafimona. Bushe tufwile ukulakonka ifyo Baibolo ilanda pa cisuma ne cabipa na muno nshiku? Ee. Cino cipande calalanda pa calenga twishibe ukuti tufwile ukukonka ifyo Baibolo ilanda.
Abantu Balakabila Amafunde ya kwa Lesa Ayalanda pa Cisuma ne Cabipa
Lesa apangile abantu mu nshila ya kuti balefwaya Kabumba wabo alebatungulula. Baibolo itila: “Takwata amaka ya kutungulula intampulo shakwe.” (Yeremia 10:23) Nangu ca kuti Yehovaa Lesa atupangile na maka ya kuisalila ifya kucita, tatupeela amaka ya kuisalila ukuti ici cisuma ne ci cibi. Afwaya tuleshintilila pa ena.—Amapinda 3:5.
Ifyo Lesa alanda pa mibele isuma fyaba muli Baibolo. Natulande pa fintu fibili pa co aya mafunde yacindamina.
Lesa e watubumbile. (Amalumbo 100:3) Apo Yehova Lesa ni Kabumba wesu, alishiba bwino sana ifyo tukabila pa kuti tube no bumi ubusuma na pa kuti tube ne nsansa. Alishiba ne fingafumamo nga tatulekonka ifyo atweba pa mibele isuma. (Abena Galatia 6:7) Na kabili Yehova afwaya ifintu filetuwamina. Uyu e mulandu wine Baibolo yalondolwela Lesa ukuti e “uukusambilisha ifingakuwamina, uukwensha mu nshila iyo ufwile ukwendamo.”—Esaya 48:17.
Ifyo imitima yesu ifwaisha kuti fyatulufya. Abantu abengi bamona ukutila kuti baishiba ukulekanya icisuma ne cibi nga balecita ifyo imitima yabo ifwaya. Nomba Baibolo itila “umutima wa bucenjeshi ukucila fyonse, kabili walipelelwa.” (Yeremia 17:9) Nga ca kuti imitima yesu tailetungululwa na mano ya kwa Lesa, kuti yalenga twacita ifintu ifingalenga twaumfwa ububi pa numa.—Amapinda 28:26; Lukala Milandu 10:2.
Bushe bashimapepo balingile ukusula ifyo Baibolo ilanda itila fisuma ne fibi?
Awe! Muli Baibolo mwaliba icine pali Lesa ne fyo afwaya tulecita ifintu. (1 Abena Korinti 6:9-11; Abena Galatia 5:19-23) Lesa afwaya abantu baishiba ici cishinka. (1 Timote 2:3, 4) Abasambilisha ifya kwa Lesa kanshi balingile ukulasambilisha ifyo Icebo ca kwa Lesa cilanda.—Tito 1:7-9.
Abantu abengi abashifwaya ukukonka amafunde ayaba mu Baibolo ayalanda pa mibele isuma, bafwaya ukuya kuli bashimapepo ababeba “ifyo abene balefwaya ukumfwa.”(2 Timote 4:3) Lelo Icebo ca kwa Lesa citusoka ukuti: “We bulanda ku batila ubusuma bubi no bubi abati busuma.” (Esaya 5:20) Ukwabula no kutwishika, Lesa akakanda bashimapepo abashisambilisha abantu ifyo alanda ukuti fisuma ne fibi.
Bushe ifyo Baibolo ilanda pa mibele isuma filalenga abantu baumina kumo?
Awe. Abafwaya ukucita ifyo Lesa atemwa balakonka ifyo Yesu Kristu alecita ne fyo alesambilisha. Yesu alesambilisha abasambi bakwe ukukanapingula abantu bambi no kutemwa e lyo no kucindika abantu fye bonse.—Mateo 5:43, 44; 7:1.
Abali abasambi ba kwa Yesu balingile ukulakonka amafunde ya kwa Lesa ayalanda pa mibele isuma mu bumi bwabo. Na lyo line, balingile ukusumina ukuti abantu bambi kuti basalapo ukucita ifipusene ne fyo bena basalilepo. (Mateo 10:14) Yesu tapeele abasambi bakwe insambu sha kubomfya amapolitiki nelyo inshila shimbi ku kupatikisha abantu ukukonka ifyo Lesa afwaya.—Yohane 17:14, 16; 18:36.
Busuma nshi bwaba mu kukonka ifyo Baibolo ilanda pa mibele isuma?
Abakonka ifyo Lesa alanda pa cisuma ne cabipa balanonkelamo pali ino nshita kabili bakanonkelamo na ku ntanshi. (Amalumbo 19:8, 11) Fimo ifyo banonkelamo ni fi:
a Yehova e shina lya kwa Lesa ilyaba mu Baibolo.—Amalumbo 83:18.