Ifiloto Farao Alotele

IMYAKA ibili yalipitile, Yosefe ali fye mu cifungo. Uwalepeela imfumu ifya kunwa alimulabileko. Bushiku bumo, Farao alotele ifiloto fibili ifyo ashaishibe umo fyalolele. Bushe naumumona? E uyu aleele apa. Ilyo bwacele, Farao aitile abaume ba mano no kubeba ifyo alotele. Lelo balifililwe ukulondolola umo fyalolele.

Ici calengele uwalepeela Farao ifya kunwa ebukishe Yosefe. Aebele Farao ati: ‘Ilyo nali mu cifungo, twali no mwaume umo uwaishibe bwino ukulondolola ifiloto.’ E ico Farao aebele ababomfi bakwe ukufumya Yosefe mu cifungo ilyo line fye.

Farao aebele Yosefe ifyo alotele. Atile: ‘Nacilota ing’ombe 7 ishisuma kabili ishaina. Kabili nacilota ne ng’ombe 7 shimbi ishaonda sana. Ing’ombe ishaonda shacilya ing’ombe ishaina.

‘Mu ciloto cimbi nacilota, nacimona imitwe ya ngano 7 iisuma, ukwali ingano ishingi e lyo ne mitwe ya ngano 7 iyauma kabili iyaonda. Imitwe ya ngano 7 iyaonda yacitendeka ukumina imitwe ya ngano 7 iisuma.’

Yosefe aebele Farao ati: ‘Ifiloto mulotele, fyonse filelanda fye pa cintu cimo. Ing’ombe 7 ishaina e lyo ne mitwe ya ngano 7 iisuma, myaka 7, kabili ing’ombe ishaonda 7 ne mitwe ya ngano 7 iibi, nayo myaka na imbi 7. Kukaba imyaka 7 ilyo mu Egupti mukaba ifya kulya ifingi. Lyena pa numa, kukaba imyaka imbi 7 ilyo ifya kulya fikacepa sana.’

E ico Yosefe aebele Farao ati: ‘Musale umwaume uwa mano uwa kwangalila umulimo wa kulonganika ifya kulya mu myaka 7 ilyo kukabe ifya kulya ifingi. Nga mwacite ifyo, ninshi abantu tabakafwe ku nsala mu myaka 7 ilyo kukaba insala.’

Farao alitemenwe ifyo bamwebele kabili asalile Yosefe wine ukwangalila umulimo wa kulonganika no kusunga ifya kulya. Yosefe aishileba uwa cibili kuli Farao kabili aishileba umuntu uwacindama sana mu Egupti.

Ilyo papitile imyaka 8, Yosefe amwene fye kwaisa abaume. Apa ninshi insala yalitendeka. Bushe naubeshiba aba baume? Ni bamunyina 10 aba kwa Yosefe! Shibo Yakobo abatumine ukuya ku Egupti pantu ifya kulya mu Kanaani fyalicepele. Yosefe alibeshibe, lelo bamunyina bena tabamwishibe. Bushe nawishiba icalengele ukuti bemwishiba? Pali iyi nshita, Yosefe ninshi nakula, kabili afwele ifya kufwala ifyaibela.

Yosefe aibukishe ne ciloto alotele ku bwaice, umo bamunyina baile mu kumufukamina. Bushe uleibukisha ukubelengapo ifya musango uyu? Yosefe alimwene ukuti Lesa e wamutumine ukuya ku Egupti pa kuti akapusushe ulupwa lwakwe. Bushe Yosefe acitile shani? Natumone.