Cinshi Cingalenga Ulupwa Luleba ne Nsansa?

IFYO BAIBO ILANDA

“Aba nsansa bantu abomfwa icebo ca kwa Lesa no kukonka ifyo cilanda!”—Luka 11:28, Baibo Amalembo ya Calo Cipya.

IFYO MWINGANONKELAMO

Kuti mwaba no kutemwa kwa cine.—Abena Efese 5:28, 29.

Kuti mwaba no mucinshi.—Abena Efese 5:33.

Kuti mwacingililwa.—Marko 10:6-9.

BUSHE KUTI TWACETEKELA IFYO BAIBO ILANDA?

Ee, pantu:

• Lesa e wapangile ulupwa. Baibo itila, Yehova Lesa e o “ulupwa lonse mu muulu na pano isonde lwainikwako ishina.” (Abena Efese 3:14, 15) Mu mashiwi yambi kuti twatila Yehova e walenga ukuti kube indupwa. Mulandu nshi ukwishibila ifi kwacindamina?

  Natulangilile: Tutile muleipakisha ifya kulya ifisuma e lyo mulefwaya ukwishiba ifyo bacibikamo pa kwipika, ni bani mwingepusha? Ukwabula no kutwishika kuti mwaipusha abepike.

  E fyo caba na pa kwishiba ifingalenga ulupwa luleba ne nsansa. Apo Yehova e watendeke ulupwa, e wingatweba ifingalenga ulupwa luleba ne nsansa.—Ukutendeka 2:18-24.

• Lesa alamusakamana. Aba mu lupwa kuti baba ne nsansa nga balekonka ifyo Yehova alanda mu Cebo cakwe Baibo. Mulandu nshi? “Pantu alamusakamana.” (1 Petro 5:6, 7) Yehova alimutemwa sana kabili ifyo atufunda filatwafwa lyonse!—Amapinda 3:5, 6; ­Esaya 48:17, 18.