Imbila Nsuma ku Bafuuka
1 Tuleikala mu nshita lintu ubupingushi busungamine. (Esek. 9:5, 6) Cili ice pamfya ukuti abafuuka ukuli konse bebwe pa kuti bengaipekanya ku lwa cileisa. Mu cikuuku cakwe ica kutemwa, Yehova alituma abantu bakwe “ku kubile mbila nsuma ku balanda.” (Esa. 61:1, 2) Bamagazini besu batwafwilisha ukubilisha imbila nsuma mu kusaalala kwa calo.
2 Ulupungu lwa kwa Kalinda na Loleni! fipayanya ica kulya cakosa ica ku mupashi icitukosha no kutukunta. Ulupungu lwa kwa Kalinda lusansamusha abalanda ne mbila nsuma ya kuti Ubufumu bwa kwa Lesa mu kwangufyanya bukaalule sonde ukuba paradise. Loleni! akuula ukucetekela mu bulayo bwa kwa Kabumba ubwa calo cipya ica mutende no mutelelwe. Ukwananya kwa mu kusaalala kwa calo ukwa aba bamagazini e imo iya nshila shacishapo kwangufyanya isha kuletelamo imbila nsuma ku balanda. Fishinka fya kulanshanyapo nshi fintu twingebekesha mu bafumine nomba line?
3 Kuti watambika “Ulupungu lwa kwa Kalinda” ulwa May 1 pa kusonta ku cipande cileti “Ukumwenamo Ukufuma mu Kubelenga Baibolo Cila Bushiku” no kwipushe cipusho ukuti:
◼ “Bunonshi nshi muletontonkanya twingasanga mu kubelenga Baibolo? [Leka asuke.] Baibolo iine, pa Abena Roma 15:4, itwaafwa ukupelulula pali ico cipusho. [Belenga Abena Roma 15:4.] Abantu abengi mu bwikashi bwesu balikwata Baibolo, lelo banono abasanga inshita ya kubelengamo lyonse. Twalisumina ukuti isubilo lyashininkishiwa fye ilya nshita ya ku ntanshi lili no kusangwa muli Baibolo, kabili tukapaalwa nga tulebelenga yene.” Konkeshapo ukulandapo kwalinga, kabili lyene tambika bamagazini no kutubulula ukulembesha kwa Ulupungu lwa kwa Kalinda.
4 “Ulupungu lwa kwa Kalinda” ulwa May 15 lukwete icipande ca kucincimusha icikwete umutwe wa kuti “Ifikolwe Fyesu Fikaba Ifya Mweo na Kabili.” Kuti pambi wabimbulo buseko mu kuba ne yi ntendekelo:
◼ “Abengi balitwishika fintu ifikolwe fyabo fyalemoneka. Apantu ifyo fikolwe fyalifwa no kupita, abantu abengi basondwelela ukuti tabakatale abeshiba. Bushe muletontonkanya kuti kwabako ukucitika ukuli konse ukwa kuti tukatala atumona ifikolwe fyesu?” Leka asuke. Belenga Yohane 5:28, 29, no kulondolola fintu Lesa alaya ukubapeela ubumi bupya mwi sonde lya paradise. Tambika ukulembesha.
5 Kuti watambika “Loleni!” uwa May 8 pa kwipushe cipusho ca kuti:
◼ “Cinshi muletontonkanya cingafwaikwa pa kulenga ubumi ukuba ubwalinga ukwikala?” Leka asuke. Losha ku cipande cileti “Cinshi Caba E Bupilibulo bwa Bumi?” pe bula 29, no kubelenga amashiwi ya kwa Solomone pali Lukala Milandu 2:11. Lyene, londolola ukupanda amano kwakwe pa cipandwa 12, icikomo 13. Shalika bamagazini kuli mwine ŋanda.
6 Nga ca kuti ulebomba na bamagazini pa ntanshi ya May 14, shininkisho kusendako amatrakiti ya Imbila ya Bufumu No. 34 kabili tambika yene ku uli onse uushilapokako. Tulingile lyonse ukuba abaiteyanya ukwakana impapulo shesu, ukwishibe fyo kuti shabelengwa na bantu bambi mu lupwa pamo ne fibusa abo pambi bengabatandalila. (1 Tim. 6:18) Imbila nsuma tutwala ku balanda kuti yapususha ubumi bwabo.—1 Tim. 4:16.