Pekanishisha Ukulongana kwa Cilonganino no Kuipakisha Kwene
1 Pamo ngo kuteyanya kwa bamunyina, mano mano tulalongana lyonse ukulongana kwesu ukwa cila mulungu. (1 Tim. 4:15, 16) Ni shani fintu twingaipakisha kwene no kunonkelamo apakalamba?
2 Inshita ilingile ukupaatulwako lyonse ku kupekanishisha ukulongana. Bamo kuti pambi baba na maka ya kupoosa inshita yafulilako iya kupekanya ukucila bambi. Nangu cibe fyo, te mulandu na fintu tuli abapamfiwa, caliba bwino ukusangako inshita ya kupekanya ukulongana. Ukupekanishisha capamo ngo lupwa kulaba ukwa kunonsha nga nshi.—Efes. 5:15, 16.
3 Ukupekanishisha Isukulu lya Butumikishi bwa Teokrasi: Tukuta ukwendela pamo no kutantika kwa kubelenga Baibolo ukwa mulungu no mulungu. (Yosh. 1:8) Pituluka mu fyebo fili no kusambililwa, kabili senda impapulo shilekabilwa pa kuti wingalakonka bakalanda. Tontonkanya pa nshila wingabomfeshamo ifi fyebo mu butumikishi bobe.
4 Ukupekanishisha Ukulongana kwa Mulimo: Pituluka muli programu yatantikwa mu Ubutumikishi Bwesu Ubwa Bufumu. Belenga ifipande fili no kusambililwa. Nga ca kuti ifyebo ukufuma mu cipande ca mu Ulupungu lwa kwa Kalinda nelyo ulupapulo lumbi fili no kulangulukwa, fifwaye no kufibelenga na fyo fine. Nga ca kuti imipeelele ya mu mulimo wa mwi bala ili no kulangililwa, pitulukila libela muli yene pa kuti wingaba uwaiteyanya ukubomfya yene mu butumikishi bobe.
5 Ukupekanishisha Isambililo lya Ulupungu lwa kwa Kalinda: Belenga mwi sambililo libela, ukushila ifyasuko ku fipusho. Ukubelenga amalembo yaloshiweko kuli no kukwaafwa ukumfwikisha bwino. Ukwetetula pa fyo isambililo lyampene na cintu waishiba kale kuli no kukushako ukwishiba kobe. Pekanya ukwakanamo mwi sambililo pa kupekanya ifyasuko ifipi pali paragrafu imo nelyo yabili. Iyi yaba ni nshila yacindama iya ‘kulumbulwilamo ukucetekela kwesu.’—Heb. 10:23.
6 Ukupekanishisha Isambililo lya Citabo pa Cilonganino: Intanshi, ceba fye mu fyebo; languluka umutwe wa cipandwa no tumitwe tunono. Lyene, ilyo ulebelenga, fwailisha imfundo shikalamba. Pituluka mu fikomo fya mu Baibolo ifiletungilila isambililo. Esha ukwasuka ifipusho mu mashiwi yobe yene. Pa numa ya kupekanya isambililo, pituluka muli lyene mu muntontonkanya obe. Esha ukwibukisha ifishinka fikalamba ne mipelulwile.—2 Tim. 2:15.
7 Ipakishe Ukulongana: Pa kuipakisha ukulongana mu kukumanina, caliba icacindama ukufika mu nshita pa kuti twingakanamo mwi pepo lya kwiswila, ukulomba umupashi wa kwa Yehova. Na kabili uli no kunonkelamo mu nyimbo sha Bufumu ishipembesula. Nga ca kuti tawakwata abana banono nelyo taukwete umulandu umbi uwa kwikalilila ku numa mu Ŋanda ya Bufumu, uli no kusange fyo nga ca kuti waikalila lwa ku ntanshi, kuli no kubako ifya kupumfyanya ifinono na muli fyo uli no kunonkelamo sana muli programu. Abafyashi abakwata abana banono abo pambi bali no kulatwalwa pa nse mu kati ka kulongana kuti bacefyanyako ukupumfyanya pa kwikalila mupepi ne nshila kabili lwa kunumako.
8 Tukuta ukumona Amalembo ayalebelengwa. Ici cikakwaafwa ukwibukisha cintu uleumfwa. Ukulanda no lupwa lobe ne fibusa pa lwa co wasambilila kukalimba ifyebo mu muntontonkanya obe. Ukubomfya iyi mitubululo kuli no kulenga ukulongana ukucilapo kubamo ubupilibulo kabili ukwa kuipakisha, kabili mu cine cine kuli no ‘kutucincimusha ku kutemwa kabili ku kubombe milimo isuma.’—Heb. 10:24, 25.