Ulubali 1—Nonkelamo mu Isukulu lya Butumikishi bwa Teokrasi Ilya 1996
1 Bushe walibelenga amakambisho yaba pa “Ukutantika kwe Isukulu lya Butumikishi bwa Teokrasi ukwa 1996”? Bushe walimonapo ukwaluka kumo kumo? Ukufuma mu January ukupulinkana ukufika mu April, Ilyashi Na. 3 likashimpwa pa citabo ca Ukupelulula, ukufuma mu May ukufika December, likashimpwa pa citabo cakakwilwe cipya ica Ukwishiba. Ilyashi Na. 4 likashimpwa pa citabo ca Abaikatana mu Kupepa.
2 Amalyashi ya Basambi: Ilyashi Na. 3 lipeelwa kuli nkashi. Lintu lyashimpwa pa citabo ca Ukupelulula, imitantikile ilingile ukusanshamo ukushimikila kwa ku ŋanda ne ŋanda nelyo ubunte bwa mu lyashi. Lintu lyashimpwa pa citabo ca Ukwishiba, lilingile ukupeelwa kwati ni pa cipempu ca kubwelelamo nelyo isambililo lya Baibolo ilya mu ŋanda. Ici cikaba ca kwaafwa, apantu icitabo ca Ukwishiba cikabomfiwa apakalamba mu kutungulula amasambililo ya Baibolo aya mu ŋanda.
3 Nga ca kuti imitantikile ili ya pe sambililo lya Baibolo ilya mu ŋanda, bankashi bonse babili kuti baikalako. Ingileni mwi sambililo mu kulungatika ukupitila mu kulandapo amashiwi ya kwiswila ayanono, no kwipusha icipusho cili mu citabo. Mwine ŋanda ali no kubomba ulubali lwakwe nga mwine ŋanda wa cine cine. Amalembo yaloshiweko kuti mwayafwaya no kuyabelenga nge nshita ilesuminisha. Nkashi alingile ukubomfya ukulamuka kwa kusambilisha ukupitila mu kulenga mwine ŋanda ukulanda pa kumwipusha ifipusho ku kupelulushanya pa malembo yabomfiwe.
4 Cinshi cingacitwa nga ca kuti amalembo yaloshiweko muli ilyo lyashi yafulisha ukucila pa yengalanshanishiwa mu maminiti yasano? Kusoobolamo amalembo ya mpikwe ayalekomaila pa fishinka fikalamba. Nga muli fye amalembo yanono, ifishinka fikalamba ifya ilyo isambililo kuti fyalanshanishiwa mu kutanunuka. Mu nshita mu nshita, kuti mwabelenga paragrafu nelyo sentensi ukufuma mu citabo lyene ukulanshanya na mwine ŋanda.
5 Kasabankanya uyo ilyashi lyakwe lisanshishemo amaparagrafu ya kulekelesha aya cipandwa mu kwipifya kuti apituluka mu mukululo ukwete umutwe wa kuti “Mona nga Nawishiba,” uulesangwa pa mpela ya cipandwa cimo na cimo ica mu citabo ca Ukwishiba. Imikululo yabamo ifyebo iili mu maparagrafu yashimpilwepo ilyashi nayo ine kuti yalanshanishiwapo nga ca kuti inshita ilesuminisha. Nga ca kuti umukululo wabamo ifyebo uli pa kati ka malyashi yabili, nkashi uulebombela pa lyashi lya kubalilapo kuti alandapo. Ifikope fya mu citabo kuti fyalandwapo ilyo lyonse fikumine ku fyebo filelanshanishiwapo.
6 Ilyashi Na. 4 lilingile kuba ilya kulengo buseko kabili ilya kunonsha. Ukulanguluka kwesu icitabo ca “Amalembo Yonse Yantu Yapuutwamo Kuli Lesa” kukalenga tukamone icimonwa cawamisha ica bumulopwe bwa kwa Yehova ne mifwaile Yakwe iya Bufumu. Tukamone fyo Baibolo yaba fye citabo cimo, icakwata umutwe wa maka—ukwebelwa kwa bumulopwe bwa kwa Yehova no kufikilishiwa kwa kupelako ukwa mifwaile akwatile sonde ukupitila mu Bufumu bwakwe pe samba lya kwa Kristu, Ulubuto Lwalaiwa. Icitabo ca Abaikatana mu Kupepa cakwatamo ukufunda kusuma ukwa kukoselesha kabili ukwa kukunta, no kulundapo cikacincimusha ukufwaisha kwesu ukwa kukwata ukwishiba kwa ku mupashi. Amaka yesu aya kupelulula yalakoshiwa mu nshila ifyebo fyapeelelwamo. Ukupituluka mu fyebo no kubomfya ukufunda kwaba mu citabo ca Abaikatana mu Kupepa, uko kulanda pa mafya no kutitikisha ifyo tulolenkana na fyo ilelo, kukatukosha ilyo tuletwalilila ‘ukulwila icitetekelo.’ (Yuda 3) Ukupitila mu kukula mu kwishiba kwalungikwa ukwa cine no kukuntwa ukubomfya kwene mu bumi cila bushiku, bonse tukasungilila ‘ukulundikana mu mucetekanya umo wine na mu kulinga kumo kwine.’ Kabili ilyo tulelanguluka ifi fitabo fibili cila mulungu, amatontonkanyo yesu yakapembesulwa pali iyi milandu ya mu malembo ibili. Tukaafwiwa ukumona imbali shalekanalekana isha cine no kupimununa ifyo ifishinka fyampene ne fyo filebomba kuli ifwe pa lwesu. (Amapi. 1:1-5) Kanshi, pekanya bwino pa kuti ilyashi mu cine cine likabe ilya kufunda kabili ilya kunonsha kuli bonse abakomfwako.
7 Nga ca kuti mu kukumanina twashukila ukukansha ukupayanishiwa mu sukulu, tukaba na maka ya ‘kubile cebo’ mu nshila iilangisha “ukulamuka kwa kusambilisha” (NW) ukusuma.—2 Tim. 4:2.