Mwenenimo Muli Programu we Sukulu lya Butumikishi bwa Teokrasi uwa 1999
1 Yesu ali e Kasambilisha Mukalamba. Abantu “balipapile isambilisho lyakwe.” (Marko 1:22) Nangu cingati tapali uwingalanda no kusambilisha nga Yesu, kuti twatukuta ukumupashanya. (Imilimo 4:13) Pa kumupashanya bwino, ukuibikilishako muli programu we Sukulu lya Butumikishi bwa Teokrasi kukatwaafwa ukuwamyako imilandile ne misambilishishe.
2 Mu 1999, Ilyashi Na. 1 likalafuma mu fipande fya mu Ulupungu lwa kwa Kalinda na Loleni! ifya mu 1997. Ukumfwikisha bwino ifya ku mupashi kukawaminako nga nshi nga ca kuti twabelenga ifi fipande libela e lyo no kwisa fyumfwa muli programu we sukulu. Abalelanda ifi fyebo bafwile ukulangilila ifya kufibomfya, no kufilanda mu nshila isuma kabili iya kucincimusha. Amalyashi Na. 3 na Na. 4 yakalafuma mu citabo ca Icaba Inkaama ku Nsansa sha Lupwa nelyo ica Umuntu Wakulisha Uwabalile Abako Uwa Mweo. Kangalila we Sukulu afwile ukutontonkanya pa fyebo intanshi talapeela aba kulanda amalyashi. Bonse ababa mwi sukulu abalelanda amalyashi ukufuma mu citabo ca Insansa sha Lupwa bafwile baba ne mikalile ya lupwa iyawama.
3 Bomfyeni Ukufunda, Kabili Pekanyeni Bwino: Bonse kuti twawamyako ukulamuka mu kulanda no kusambilisha. (1 Tim. 4:13) E ico, tufwile ukufwaya ukupandwa amano, kabili te kwesha ukupata ukufundwa. (Amapi. 12:15; 19:20) Ukulondolola icine bwino pa kulongana na mu butumikishi bwa mwi bala kwalicila pa kulanda fye ifishinka nelyo ukubelenga ilembo mu nshila ya kuti cikulu fye twalanda no kubelenga. Tufwile ukufika pa mutima wa balekutika no kubacincisha. Kuti twacite co pa kulande cine no kushininwa ukufuma ku mutima. (Linganyeniko Imilimo 2:37.) Fintu tufundwa mwi sukulu filatwaafwa ukucite co.
4 Cilya fye bamupeela ilyashi, tontonkanyeni pa lwa mibele ya milandile intu mukalabombelapo nga fintu yalondololwa mu Icitabo ca Kutungulula Isukulu. Tontonkanyeni fintu mulingile ukucita pa kuti mwingabomfya fintu mwafundilwe pe lyashi mwalandile ku numa. Tontonkanyeni pa mutwe we lyashi, na pa mitantikile mukabomfya nga ca kuti ikafwaikwa, e lyo na fintu mukabomfya amalembo yali mu fyebo fya lyashi lyenu. Tontonkanyeni fintu mwingabomfya ifyebo bwino bwino ku kusambilisha no kucincisha.—1 Timote 4:15, 16.
5 Nga ca kuti mulatiina ukulembesha mwi sukulu, pepeni e lyo no kulanda na kangalila we sukulu. Bonse kuti twamwenamo pa kupooseshako sana amano kuli programu akaba mwi Sukulu lya Butumikishi bwa Teokrasi uwa 1999.