Bakangalila Abatungulula—Kalemba

¹ Kalemba wa pa cilonganino alabomba ulubali ulukalamba mu kushininkisho kuti ‘fyonse filecitwa busaka busaka kabili mu kukonkana.’ (1 Kor. 14:40) Pamo ngo waba muli Komiti wa Mulimo uwa Cilonganino alasakamana fyonse ifikumine ukulembeshanya kwa mu cilonganino kabili alasunga ne fyalembwa fyacindama ifya cilonganino. Nangu ca kuti imilimo yakwe ilingi line taimoneka ku menso ya bonse nge fimoneka iya baeluda bambi, tulamwenamo nga nshi no kutesekesha imibombele yakwe.

² Lintu amakalata yaisa ukufuma ku Sosaite nelyo ukufuma kumbi, kalemba alabelenga no kushininkisha ukuti kwaba ukwasuka ukulingana ne fyo kalata alelandapo. Alashininkisha ukuti baeluda bonse babelenga amakalata ayo icilonganino cipokelela kabili lyene alayabika mu faelo pa kuti kwingaba ukuyabelengamo inshita imbi. Alabebeta amaformu ya maorda aya bamagazini ne fitabo no kutuma ku Sosaite. E wangalila umubomfi wa ndalama no kulembesha kwa bamagazini, e lyo ne mibombele yonse iya mabungano.

³ Apo kalemba afwile ukutuma lipoti wa mulimo wa mwi bala uwa cilonganino cila mweshi ku Sosaite libe tacilafika pa 6, cintu cacindama nga nshi ukuti bonse twilacelwa ukutuma malipoti yesu aya mulimo wa mwi bala cila mweshi. Lyene alalemba amalipoti ya mulimo wa mwi bala pa Icalembwa ca Bukasabankanya ica Cilonganino. Kasabankanya onse uwingafwaya ukumona imibombele yakwe pa calembwa, kuti aipusha kalemba.

⁴ Lintu kasabankanya aisa ukufuma ku cilonganino cimbi, kalemba alalembela baeluda ba ku cilonganino uko afuma ukuti batume kalata wa kumwishibisha ku cilonganino capamo na Icalembwa ca Bukasabankanya ica Cilonganino. Lintu kasabankanya aya ukufuma pa cilonganino, kalemba alatuma icalembwa capamo na kalata ku cilonganino uko kasabankanya akuukila.—Ubutumikishi Bwesu, amabu. 104-5.

⁵ Kalemba alapituluka mu mibombele ya bapainiya, ukweba baeluda bonse, na kucilisha kangalila wa mulimo, amafya ayo bapainiya balepitamo. Aleshibisha bakatungulula ba Masambililo ya Citabo pa Cilonganino pa lwa bakasabankanya ababa bamanshintula mu mulimo wa kushimikila. Kangalila wa mulimo na kalemba babombela pamo mu butungulushi bwa kwafwilisha abaleka ukushimikila.—Ubutumikishi Bwesu Ubwa Bufumu, November 1987, ibu. 1.

⁶ Apo twaishiba bwino imibombele ya kwa kalemba, shi bonse natubombeshe pa kuti bukangalila bwakwe bulemwangukilako.—1 Kor. 4:2.