Endeni mu Myendele Icindika Lesa
1 Konse kuntu tuli, imyendele yesu, imifwalile, ne misakwile filashimika ubunte pa lwa ifwe na Lesa tupepa. Ici cimonekesha sana pa kubungana kukalamba ukwa bantu ba kwa Lesa, apo abengi batubebeta. Lintu twaenda bwino, ishina lya kwa Yehova lilacindikwa. (1 Pet. 2:12) Lelo, imyendele yalubana nelyo incitilo sha buwelewele ku banono fye aba muli ifwe kuti fyaleta umuseebanya pe shina lya kwa Lesa na pa bantu bakwe. (Luk. Mil. 9:18b) Ukulaibukisha ukuti aba ku nse bapingwila ukuteyanya kwesu na Lesa tupepa ukupitila mu myendele yesu kulingile ukutulenga ukusakamanishisha pa kuti ‘tulecita fyonse ku kucindika Lesa.’—1 Kor. 10:31.
2 Imimonekele Yayana pe Bungano: Te mulandu ne cifulo tulebomfya, cimonwa nge Ng’anda ya Bufumu iikalamba pa nshita ye bungano. Kufwile ukuba imifwalile yalinga ne misakwile kwati fye ni fintu ciba ilyo tulesangwa ku kulongana pa cilonganino cesu. Pa nshita ye bungano na pa numa, bamunyina ne nkashi tabafwile ukufwala ifishili bwino nelyo ifishayamo, ifilangisha imibele ya ku calo kabili ifingalenga cayafya ukwishiba ukuti twalipusanininako. Bankashi bafwile ukumona ukuti imibilile ya fya kufwala fyabo no butali bwa fiko fili ifyalinga. (1 Tim. 2:9, 10) Nampo nga tuli mwi bungano, nelyo tulelya pa matuuka, atemwa tuleshita mu mashitolo, inshita shonse tufwile ukulangisha ukuti tuli batumikishi ba kwa Lesa, abashibika ca kupunwisha.—2 Kor. 6:3.
3 Ulubatisho lukabako ulucelo pa bushiku bwa cibili ubwe bungano. Ulupungu lwa kwa Kalinda ulwa April 1, 1995, pe bula 30, lulondolola imibele tufwile ukuba na yo pali aka kashita. Lulondolola ukuti “tulingile ukumona ulubatisho ngo lwakatama nga nshi. Tayaba ni nshita ya ciwowo, iya mutebeto, nelyo ukwaula kwacishamo. Lelo kabili tayaba ni nshita ya cintefwila nelyo iyaundalila.” Te kuti cibe icalinga nangu panono ku balebatishiwa ukufwala ifipi nelyo ifya lubeebeelu, nampo nga baume nelyo banakashi. E co bonse balingile ukucindika inshita ya lubatisho lwa Bwina Kristu no kuba no buseko.
4 Petro atucinkulako ulwa ‘kwenda mu mibele ya mushilo kabili iya bukapepa.’ (2 Pet. 3:11) Shi ifyo tukasosa no kucita pe Bungano lya Citungu ilya “Bakacita wa Cebo ca kwa Lesa” fikafwe abafumacumi abakalamonako ukwishiba no kupepa Lesa wesu mukulu, uwawaminwa umucinshi onse no bukata.—1 Kor. 14:24, 25.