Citeni Icisuma E lyo Mukatashiwa!

¹ “Nshatalamona abantu ba mutende nga aba.” “Kwena aba bantu basuma.” Aya e mashiwi yamo yamo fye pa mashiwi yasuma ayengi ayalandilwe na bantu pa numa ya mabungano ya citungu aya uyu mwaka wapwile. Ico kuti calanga ishina twapanga pamo nga ukuteyanya. (Amapi. 27:2; 1 Kor. 4:9) Umucinshi wa musango yo onse pa kulekesha uya kuli Yehova. (Mat. 5:16) Ishuko na limbi ilisuma nga nshi ilya kulumbanya Lesa likabako kuli ifwe pe Bungano lya Citungu ilya uno mwaka ilileti: “Bakasambilisha wa Cebo ca kwa Lesa.”

² Cila mwaka tulacinkulwako ukuba ne mibele isuma pe bungano. Mulandu nshi? Pantu ilyo imibele, imifwalile, ne misango ya bantu mu calo filebipilako, tatufwaya ukulabakonkelesha. Tatufwaya ukonaula ishina lyesu ilisuma. (Efes. 2:2; 4:17) Natuleibukisha uku kusoka twalalanda pano.

³ Citeni Icisuma—Pe Bungano: Calyumfwika ukuti bamo abasangwa pe bungano balakaana ukumfwila bakapyunga, limo no kubeba fye amashiwi ayashingalinga ukufuma mu kanwa ka Mwina Kristu. Kwena, umupashi wa kufwaya lyonse ukucilawila bambi taulanga ukuti umo alacita icisuma, kabili taucindika Yehova Lesa. E co natube no kutemwa, ukutekanya no kubombela pamo na bambi.—Gal. 5:22, 23, 25.

⁴ Pa mabungano yamo, bamunyinefwe ne nkashi balimonwa balebutuka nelyo ukusunka abanabo no kupumpana pa kuti bayeikala pa fipuna fimo ifyo abene balemona ukutila e fisuma sana. Bamo no kucenwa balicenwa pa kucita ica musango yu. Kwena cisuma ukusenda ifya kulya fyalinga ifya kasuba, lelo te kuti cibe bwino ukuya ne fya kulya ifingi nga nshi na matebulo no kuyabika umwa kwimika bamotoka. Ico kuti camoneka kwati tulecita parte ya ku calo iyapala yalya ayabako ilingi line mu fibansa fya mangalo.

⁵ Citeni Icisuma—Ku Mifwalile Yenu no Kupempenkana: Pa numa ye bungano lya citungu limo ilya uyu mwaka wapwile, umukalamba wa nyunshipepala imo ifi alembele ukuti: “Imibele fye ya Nte sha kwa Yehova abene e cintu icaweme sana. Te pa busuma ukumona abantu abengi aba mucinshi kabili abaicindika. Indupwa ishingi isha mishobo yapusanapusana, nabafwala ne fya kufwala fyabo ifisuma, nabateeka no mutima pa kwingila mu cibansa. Imibele yabo yalipusene nga nshi ne mibele ya bantu bambi abengila mu cibansa. Na kuba, Inte sha kwa Yehova balipusana sana na mabumba ya bantu bambi. Pantu lyonse fye tumona amabumba ya bantu abacita fye ifishalolamo. . . . Cine cine te pa busuma ukumona ibumba lya Nte.” Shi twileka imifwalile no kupempenkana nelyo imibele yesu fikalenge ibungano lyesu ilya ku mupashi ukupanga ishina libi.—Fil. 1:10; 1 Tim. 2:9, 10.

⁶ Citeni Icisuma—Pa Kubatishiwa: Abaleya ku kubatishiwa bafwile ukucindika nga nshi ulubatisho. Ukufwala ifya kufwala fya mucinshi ifya kubatishiwa na fyo kukalanga kuti nabacindika bumushilo bwa lubatisho. Ilyo bashilaya kwi bungano, kuti cawama sana ukuti bakatungulula ba masambililo ya Baibolo bapituluka na basambi babo mu cipande ca “Ifipusho Ukufuma ku Babelenga” mu Ulupungu lwa kwa Kalinda ulwa April 1, 1995.

⁷ Imifwalile no kupempenkana pamo fye ne mibele yesu iya bulesa fiba bushininkisho bwa fyo twasuminamo nga Bena Kristu kabili filenga aba mitima yafumaluka ukwishibe cine ukwabula ubwafya. Kanshi, ‘natucite cisuma’ no kutashiwa pa kusangwa kwi bungano lya citungu ilya “Bakasambilisha wa Cebo ca kwa Lesa.”—Rom. 13:3.

⁸ Ukuteyanya Ifintu “Busaka Busaka Kabili mu Kukonkana”: Pa kuti ibungano lya citungu libeko, kulaba ukubombesha kwa bantu abengi. Bamunyinefwe abatungulula ibungano balapekanya ukwa kulonganina no mwakusendama. Abantu umo umo ne ndupwa na bo balapekanya abene ifya kwenda no kwa kusendama. Ifilonganino na fyo filabombela pamo umulimo wa kuitemenwa pa kuti kube bamunyinefwe abengi aba kubombela mu madipartimenti ayengi ayakabilwa pe bungano. Ubuyo buba bwa kuti “fyonse ficitwe busaka busaka kabili mu kukonkana.”—1 Kor. 14:40.

⁹ Ilyo mulebombela pamo na bamunyinenwe abaletungulula pe bungano, ishibeni ukuti imyeshi ya kupekanya ilakabilwa, inshita shimo nangu fye imyaka. Bamunyinefwe abengi balabomfya inshita yabo ku kupekanya ifye bungano. Kulaba ukwashima ififulo, ukulonganika ifipe fya kubomfya no kufwaya aba kubomba. Ukupekanishisha libela ukwa musango yo kulenga bonse ukupaalwa lwa ku mupashi. Cinshi twingacita ku kwafwilishako?

¹⁰ Bombeleni Pamo no Kupekanya Konse: Calicindama ukuti bonse twabombela pamo no kuteyanya kwe bungano. Fwe babomfi ba kwa Yehova Lesa twalikwata ishuko lya kupashanya ubuntu bwakwe muli fyonse ifyo tucita. Tufwile ukumupashanya na pa kupekanya no kusangwa ku mabungano uko ishina lya kwa Lesa lilumbulwa. Ibukisheni ukuti “Lesa te wa cimfulumfulu, lelo wa muyano.” (1 Kor. 14:33) E ico lyonse natupampamine pa kuti bonse abatumona baleiluka ukuti Yehova e fyo aba ilyo bamona imibele yesu ne misango ilyo tuleipekanya no kusangwa kwi Bungano lya Citungu ilya “Bakasambilisha wa Cebo ca kwa Lesa.” Shi abatumona aba mitima yafumaluka nabaleiluka ukuti ulukuta lwa bantu ba kwa Yehova lulateyanya ifintu “busaka busaka kabili mu kukonkana.”—Amalu. 68:26.