Beni “Abape, Aba Nkumbu”
1 Kale sana, umutumwa Paulo aebele Timote ukukonkomesha abasumina banankwe “ukucite cisuma, ukuba abacindama ku milimo isuma, ukuba abape, aba nkumbu.” (1 Tim. 6:18) Paulo wine acinkwileko na Bena Kristu ba ciHebere ukwibukisha “ukucite cisuma ne fye senge.” (Heb. 13:16) Mulandu nshi abalembeele aya makambisho? Pantu alishibe ukuti “ubucindami no bukata no mutende fikaba kuli onse uubombo busuma.”—Rom. 2:10.
2 Yehova Lesa e Mwine fyonse, pantu e Kalenga. (Ukus. 4:11) Tulatasha icine cine pa fyo aletucitila ku fintu fyakwe. Nangu line abantunse abengi tabatasha, Uwapulamo alakonkanyapo ukuleka bonse bamwenamo mu bupe ubo apayanya ubulenga ukuti batwalilile no mweo. (Mat. 5:45) Apeele fye na Mwane untu atemenwe sana pamo nge lambo pa kuti tube no mweo wa muyayaya. Bushe ukutemwa atulanga takufwile ukutucincisha ukuba abatootela pa kuba aba nkumbu ku bantunse banensu?—2 Kor. 5:14, 15.
3 Cinshi Twingapeela? Cisuma ukubomfya ifyuma ifili fyonse ifyo twakwata mu nshila ingasekesha Lesa. Cine cine tufwaya ukwafwilisha umulimo wa Bufumu uwa mwi sonde lyonse lwa ku mubili na lwa ku mupashi. Kwena, imbila nsuma e cuma cacindamisha ico umuntu enganonka, “pantu e maka ya kwa Lesa” aya kupususha. (Rom. 1:16) Mu nkumbu, cila mweshi nga tulebomfya inshita yesu ne fyuma ku mulimo wa kushimikila no kusambilisha, kuti twapeelako bambi ici cuma ca ku mupashi, pa kutila baisakwata ubumi bwa muyayaya.
4 Yehova alatemunwa icine cine ilyo amona tuleafwilisha abapiina. Aatulaya ukuti akatupaala. Alatucinkulako no kuti: “Ifyuma tafyafwa kantu mu bushiku bwa kububuka, lelo ubulungami bupokolola ku mfwa.” (Amapi. 11:4; 19:17) Ukwafwilisha umulimo wa Bufumu lwa ku mubili no kubombako apapela amaka yesu mu mulimo wa kushimikila imbila nsuma ni nshila shisuma nga nshi twingalangilamo ukuti cine cine twaba aba nkumbu kabili abape.