Bushe Muli ba Nsoni?
1 Tatupapa nga twamona umwana munono alebelama ku numa ya banyina nelyo bawishi e lyo aletulolesha. Ca cifyalilwa fye ukuba ne nsoni ku bwaice. Nelyo fye ku bukalamba, bamo mu cifyalilwa fye ba nsoni. Nga mulomfwe nsoni mu butumikishi, cinshi mwingacita?
2 Ifya Kucita Nga Muli ba Nsoni: Calicindama ukwangwa “umuntu uwabelama uwa mu mutima.” (1 Pet. 3:4) Kosheni ukutemwa mwatemwa Yehova na banenu. Shininweni ukwabula no kutwishika ukuti ukubomba umulimo wa kushimikila e nshila imo iyawamisha iya kulangililamo ukutemwa kwa kuipeelesha. Kwateni imitantikile isuma iye sambililo lya pa lwenu no kusangwa ku kulongana. Pepeni lyonse kabili mu kulungatika ukuti Yehova amwafwe. Ukutetekela wene mu kukosa no kumucetekela kukalenga mukaicetekele no kumulenga “ukushipo kulande cebo ca kwa Lesa ukwabulo mwenso.”—Fil. 1:14.
3 Lwisheni ukucimfya imyumfwile ya kuti mwalipelebela. Cimoneka kwati na Timote akabile ukucite fyo. Paulo alimukoseleshe ‘ukukanaleka muntu nelyo umo asuule ubulumendo bwakwe,’ ukumucinkulako ati “Lesa tatupeele umutima wa bukuuwe, lelo uwa maka.” (1 Tim. 4:12; 2 Tim. 1:7) Timote alibomfiwe sana na Yehova, uwingabomfya na imwe nga ca kuti mwatukusha ukulunduluka no kumucetekela mu kukumanina.—Amalu. 56:11.
4 Ukutontonkanya pa malembo ya mu Baibolo, pamo nga Mateo 10:37, kwayafwile nkashi umo uwaletiina sana umulume uwalemukaanya. Ilyo aleshipikisha, ubutumikishi bwalimwangukile, na kuli pele pele umulume wakwe, banyina, ne ndume yakwe balipokelele icine!
5 Ukupekanya Kulafwaikwa: Mwakulaicetekela bwino sana nga ca kuti mulepekanishisha kabela ubutumikishi. Soboleni imilandile yayanguka mu citabo ca Ukupelulula nelyo mu Ubutumikishi Bwesu ubwapita, isambilileni no kupitulukamo bwino. Mu cifulo ca kuti mulesakamikwa apabula umulandu, beni abaishininkisha mu muntontonkanya. Sangeniko ubukose ukupitila mu kubomba na bambi. Ibukisheni ukuti abengi mukasanga pa mayanda ba nsoni, kwati fye ni mwe. Umuntu onse alakabila ubukombe bwa Bufumu.
6 Nga muli ba nsoni, mwiyumfwa abapelelwa. Ilyo muleibikilishako, Yehova akamwafwa ukuba kashimikila musuma uwa mbila nsuma. Lyene mukaba aba buseko mu butumikishi bwenu.—Amapi. 10:22.