Programu Mupya uwa Bushiku bwa Kulongana Kwaibela
1 Ilyo imilabasa na bakafundisha balumbilisha icuma, Icebo ca kwa Lesa cena citukoselesha “Ukuba Abacindama ku Milimo Isuma.” (1 Tim. 6:18) Uyu ukaba e mutwe wa kulongana kwaibela ukwa bushiku bumo ukukatendeka mu September 2002. Kukoselesha nshi uko tukakoseleshiwa pali uku kulongana?
2 Kangalila wa muputule akalondolola umo calola “Ukuba Abacindama Kuli Lesa,” kabili akepusha bamo abalebombesha ukukwata ifyuma fya ku mupashi. Ilyashi lya kubalilapo ilyo kalanda umweni akalanda, akalanga ifyo abantu ba kwa Lesa balebomba “Imilimo Isuma Muli Ino Nshita ya Kulobolola.” Cila muntu pali ifwe akakoseleshiwa ukutontonkanya pa fyo engabombesha ukufishapo umulimo wa kulobolola uwa kwa Lesa uulecitwa lelo.
3 Mwandi tulasekelela pa kumona imisepela ya Bwina Kristu ilesupila ifyuma fya ku mupashi! Ukucite co kulakatamika Yehova kabili kulaafwa imisepela ukuba ne ntendekelo isuma iya milimo ya ku ntanshi. Ilyashi lileti “Ukutasha Imisepela pa Kubombako Imilimo Isuma mu Kulumbanya Yehova” likakomaila pa milimo isuma iyo abacaice ba Bwina Kristu muli iyo ncende babomba.
4 Finshi fitumbuka mu kusupila imilimo isuma? Kalanda umweni akalanda pali ci mu lyashi lyakwe ilya kulekelesha ilileti, “Twalilileni Ukubombe Milimo Isuma no Kulobolola Amapaalo ya kwa Yehova.” Akalanda pa mbali shine umo tulobolola amapaalo: (1) pa lwesu umo umo, (2) indupwa, (3) icilonganino, no (4) kuteyanya kwa mwi sonde lyonse.
5 Balya abaipeela kuli Yehova bali no kuba ne shuko lya kubatishiwa. Nga namuipekanya ukubatishiwa, ebeni kangalila wa kutangilila apo pene fye.
6 Nga babilisha ubushiku bwa kulongana mu ncende yenu, angufyanyeni ukuteyanya pa kuti mukasangweko. Esheni ukufika bwangu pa kuti mukasangwe ku lwimbo lwa kwiswila ne pepo. Ukusangwako no kukutikisha kuli programu onse uwa bushiku bwa kulongana kwaibela kukatukosha ukukonkelela inshila ya cine cine iikatulenga ukuba ne cuma kuli Lesa wesu, Yehova.