Bafweni Ukumfwilapo na Fimbi
1 Ilyo tuleshimikila imbila nsuma, ilingi line tulasanga abantu abashikala mu cifulo tushimikilamo nelyo abalanda ululimi lumbi e lyo na balanda ululimi lwa bacibulu. Bamo abo tulanshanya nabo bwino Baibolo nalimo kuti bakuukamo mu cifulo tushimikilamo. Kuti twacita shani pa kwaafwa aba musango uyo pa kuti bakomfwilepo na fimbi? Kuti twabaafwa ukubomfya formu wa S-43.
2 Abantu ilingi balakutika sana ku mbila nsuma nga mwalanda mu lulimi lwabo. (Imil. 22:1, 2) Kanshi nga twasanga umuntu uulanda ululimi lumbi tufwile ukulemba formu nangu ca kutila uyo umuntu talefwaya ukukutika ku bukombe bwa Bufumu. Lelo, nga ca kutila kuli abantu abanono abalanda ululimi lumbi abapokelela ubukombe lyonse mu lulimi lwabo, tamulekabila ukulemba formu kano fye nga kuli abalefwaya ukusambilila.
3 Ukulemba Formu: Mukucenjela ipusheni ishina lya uyo muntu, akeyala kakwe, ne nambala ya lamya wakwe. Londololeni nampo nga alefwaisha ukusambilila nelyo iyo, ilyo asangwa pa ng’anda, ulupapulo mwamupeele nelyo ulo alefwaya, no lulimi ulo omfwa sana. Nga mwalemba formu, bwangu bwangu peeleni kalemba wa cilonganino, e ukatuma ku cilonganino nelyo kwi bumba lilando ulo lulimi abengalondola uyu muntu.
4 Ifya Kutuma Formu: Kalemba nga teshibe icilonganino nelyo ibumba lya kutumina formu nelyo takwete akeyala, nalimo kuti atuma foni nelyo ukutuma uyo formu kwi ofesi lya musambo pa kuti bamulange ifya kucita nelyo pa kuti babombelepo. Pa kutuma uyu formu tamulekabila ukwipusha kangalila wa musumba.
5 Lyonse ilyo icilonganino nelyo ibumba bapokelela formu uwalembwa wa S-43, icilonganino cifwile ukutantika ukutandalila uyu muntu bwangu bwangu. Nga twabombesha, kuti twacetekela ukuti Yehova akalenga ‘abalemenena ku bumi bwa muyayaya’ ukucitapo cimo.—Imil. 13:48.