Kusheni Insala ya Cine Ukupitila mu Kubatwalila Bamagazini Lyonse
1. Kuti twakusha shani insala ya balefwaya ukusambilila ukupitila mu kubatwalila bamagazini lyonse?
1 Abengi abo tusanga ilyo tuleshimikila balatemwa ukubatandalila kabili balapoka ne mpapulo shesu lelo balashimunuka ukusumina isambililo lya lyonse ilya Baibolo. Inshila imo iingalenga ukuti batemwe ukusambilila kulabatwalila magazini lyonse. Nga mwashalika bamagazini, lembeni ishina lya muntu, na keyala, ubushiku mwacibasanga, bamagazini mwacibashila, ne lembo mwacilanshanya na bo, pamo pene ne fyo mwacimona bacitemwa ukumfwa. Lyonse ilyo mwapokelela bamagazini abapya fwayenimo ifishinka ifingasekesha balya mushalikako magazini lyonse, no kulanda pali fyene ilyo mwabatandalila. (1 Kor. 9:19-23) Mu kupita kwa nshita, limbi filya balebelenga muli bamagazini kuti fyabalenga baba ne nsala ya cine no kufwaya ukusambilila ifingi.
2. Mulandu nshi ibelele ni nshita ye pamfya iya bantu ukufwaya Yehova nomba, kabili finshi fimbi twingacita pa kubafwa?
2 Lelo twalishibo kuti, te bonse abengaba baNte ukupitila mu fyo babelenga muli bamagazini abene beka. Apo nomba ni nshita ye pamfya ukwafwa abantu ukufwaya Yehova, finshi fimbi twingacita pa kubafwa? (Sefa. 2:2, 3; Ukus. 14:6, 7) Kuti twakusha insala yabo iya cine pa kubabelengela ilembo tupekenye bwino bwino lyonse lintu twabatwalila bamagazini.
3. (a) Kuti twapekanya shani ifyebo fya kulanshanyapo ifyo twingabomfya fye ilembo limo? (b) Malyashi nshi abantu bengatemwa ukulanshanyapo mu cifulo cenu?
3 Ukulanshanya Fye Ilembo Limo: Tontonkanyeni pali balya mutwalako bamagazini lyonse, e lyo pekanyeni ifya kulanda ifyapusanapusana ukubomfya ilembo fye limo ukulingana no kukabila kwabo. (Fil.2:4) Ku ca kumwenako, nga ca kuti umo pa bo mutandalila ali ne cililo, pa nshiku ishingi isha fipempu fya kubwelelamo kuti mwalanshanya ifyo Baibolo ilanda pa bafwa na pe subilo lya kubuuka. Ifyebo fya mu citabo ca Ukupelulula pa mitwe ikalamba “Imfwa” na “Ukubuuka” kuti fyabomfiwa lintu mulepekanya ukulanshanya fye ilembo limo. Ukulanshanya na kumbi pa fyebo fimo fine, pa fyo ukulwala, ukukota, ne mfwa fikapwa, kuti kwaingilamo fye ukwine. Icacindama kupekanya ifyebo fingomfwika bwino ku muntu kabili no kumulanga ifyo Baibolo ilanda.
4. Mulandu nshi cacindamina ukwafwa abantu ukumfwikisha Amalembo, kabili kuti twacita shani ifyo?
4 Landeni Ifyebo Ifileumfwika: Nelyo caliwamisha ukulanda ifyebo ifyayanguka kabili ifipi, fingi fikabilwa ukucila ukubelenga fye amalembo yanono. Satana alipofwisha amatontonkanyo ya bantu pa kuti beumfwa imbila nsuma. (2 Kor. 4:3, 4) Nelyo fye bantu babelenga na Baibolo balakabila ukubafwa ukumfwa fintu ilanda. (Imil. 8:30, 31) E ico kanshi, mulekabila ukutekanya pa kulondolola no kulangilila umo ilembo lilolele, nga fintu fye mwingalondolola lintu mulelanda ilyashi mwi Sukulu lya Butumikishi Ilya Bulesa. (Imil. 17:3) Lekeni uo muleshimikila amone ifyo Icebo ca kwa Lesa cacindama mu mikalile yakwe.
5. Abo mutwalila bamagazini lyonse kuti baba shani isambililo lya Baibolo?
5 Umuntu nga aleumfwa bwino ifyo alesambilila, kuti mwatampako panono panono ukulabelengako amalembo yabili nelyo yatatu mu kulanshanya kwenu. Moneni inshita iingawama ukumulanga broshuwa wa Cintu Lesa Afwaya nelyo icitabo ca Ukwishiba. Ukucita ifi, cikalenga abo mutwalila bamagazini lyonse ukuba isambililo lya Baibolo.