Baba ne Cishinka Icalinga Ukupashanya
1 Mu mwaka wa 1937 umulimo umbi uwa nshita yonse walitendeke, no yu mulimo, ni bupainiya bwaibela. Abaume bafikapo na banakashi abalebomba bwino umulimo wa Bwina Kristu, baliipeeleshe ukuyabombela uko ukuteyanya kwabebele ukuya. Ukufika na ino nshita, pa numa ya myaka iingi, bapainiya baibela balitwalilila ukubomba ne cishinka ico tulingile ukupashanya.—Heb. 6:12.
2 Baali pa Ntanshi: Pa kubala bapainiya baibela balebomfya ifilimba fya maseleti pa kushimikila abantu pa mayanda yabo. E lyo nga babwelelako baleleka abantu bakutika ku malyashi ya mu Baibolo ayo babikile pa cilimba. Ici calecitwa mu misumba iikalamba sana umwali kale ifilonganino. Mu kupita kwa nshita, bapainiya baibela balebatuma mu fifulo umo bakabilisha ba Bufumu balefwaikwa sana. Balitwalilile ukutandalila abalefwaya ukumfwa ubukombe bwa Bufumu e lyo no kutungulula amasambililo ya Baibolo. Pa mulandu wa kubombesha kwabo, ifilonganino ifipya ifingi fyalipangilwe. Ukubombesha kwabo, e kwaleta uku kulunduluka tumona muno nshiku mu kuteyanya. (Esa. 60:22) Bapainiya baibela balitwalilila ukubombesha uyu mulimo wa kushimike mbila nsuma ku “cibumbwa conse ica mwi samba lya muulu.”—Kol. 1:23.
3 Balilinga Ukubapashanya: Bapainiya baibela bamo balibomba umulimo wa nshita yonse pa myaka iingi sana. Muli iyi myaka, aba baume ba cishinka na banakashi balikosha icitetekelo cabo ku fingi ifyacitika mu mulimo wabo. (1 Pet. 1:6, 7) Baliitemenwa ukusha ifyuma pa kuti bayebombela ukuli ukukabila. Bamo bakalamba sana ino nshita kabili balalwalilila, nelyo baba na mafya yambi. (2 Kor. 4:16, 17) Lelo “bacili baletwala mu bukote.” (Amalu. 92:14) Balicetekela Yehova kabili alabapaala.—Amalu. 34:8; Amapi. 10:22.
4 Bapainiya baibela balinga ukutashiwa. Nga ca kutila mwakwata ishuko lya kuba na bo mu cilonganino, mulefwayako inshita ya kuba na bo ilingi pa kuti balemwebako ifyo babomba. Mulebatasha pa fyo babomba umulimo wa kubila Ubufumu mu busumino. Lekeni icishinka cabo cilemukosha. Bonse abapashanya icitetekelo cabo na bo bene bakalenga Yehova ukusekelela kabili akabapaala pantu “abacite cishinka balamutemuna.”—Amapi. 12:22.