Umukululo wa Mepusho

◼ Finshi twingacita pa kwafwa bapainiya?

Mwi sonde fye lyonse mu mwaka wa 2009, mupepi na 800,000 bamunyina na banakashi balibombeleko bupainiya bwa nshita yonse e lyo na bupainiya bwaibela. Aba bonse bapainiya ba nshita yonse balipeele ifisabo fyabo ifya kubalilapo pa kubomfya inshita yabo, amaka, ne fyuma fyabo pa kuti bafwilisheko mu kutwala pa ntanshi umulimo wa kushimikila imbila nsuma ya Bufumu. (Amapi. 3:9) Yehova afwile alatemwa pa kubombesha kwabo! Kuti twacita shani pa kulanga ukuti na ifwe tumona bapainiya nge fyo Yehova abamona no kubafwa ukuba ne nsansa no kushipikisha ilyo balebomba uyu mulimo?

Tulingile ukusala bwino amashiwi ya kulanda pa kubakoselesha ukutwalilila ukubomba bupainiya. (Amapi. 25:11) Bushe te kuti twaluleko ifyo tubomba cila mulungu pa kuti tukabombeko nabo mu mulimo? Ilyo tulebomba nabo mu mulimo kuti twabeba ukuti tubomfye motoka yesu ukucila ukubomfya iyabo. E lyo nga twabomfya motoka yabo, nalimo kuti twasangwilako indalama pa kuti twabafwako ku ndalama balebomfya. (1 Kor. 13:5; Fil. 2:4) Na kabili tulalanga ukuti tulafwilisha bapainiya nga ca kuti tulebasekelela e lyo na mu nshita mu nshita tulebeta ku mwesu ukwisalila pamo ica kulya.—1 Pet. 4:8, 9.

Amalembo yalatulaya ukuti Yehova akatwalilila ukupeela abafwaya Ubufumu intanshi fyonse ifyo bakabila. (Amalu. 37:25; Mat. 6:33) Inshila imo apeelelamo abamubombela kupitila mu Bena Kristu ababa mwi sonde lyonse abakwata ukutemwa. (1 Yoh. 3:16-18) Lelo kwena bapainiya tabafwile ukwenekela bambi ukuti e bakulabapeela indalama isha kubomfya mu mikalile yabo. E lyo limbi te kuti bebeko bambi nga kuli ifyo balekabila. Lelo, bapainiya aba cishinka kuti twabafwa pa kuti ‘tulunde pa finono ifyo bakwete.’ Kuti twabafwa mu nshila ishapusanapusana nga tulebika amano ku fyo balekabila.—2 Kor. 8:14, 15.

Lintu Febi, kabomba uwali uwakosa mu kushimikila mu Cilonganino icali mu Kenkerea, aile ku Roma, Paulo akoseleshe bamunyina mu Roma ukuti: ‘Mumupokelele muli Shikulu nga filya fine mupokelela aba mushilo, no . . . kumwafwa muli fyonse ifyo engakabila kuli imwe.’ (Rom. 16:1, 2) Na ifwe bene twalikwata ishuko lya kulanga ukuti tulatungilila bapainiya ba nshita yonse na baibela aba mu cilonganino cesu ababilisha imbila nsuma ukwabula ukuleka.—Imil. 5:42.