Ubushiku bwa Kutendeka Amasambililo ya Baibolo

¹ Ukutendeka mu January, cila cilonganino cili no kusala ubushiku bumo mu mweshi ubo bakalaya mu kweba abantu nga bengatemwa ukusambilila Baibolo. Ubu bushiku bufwile ukuba pa mpela ya mulungu, napamo mu mulungu wa kubalilapo mu mweshi. Kuti mwasala ukulabomba uyu mulimo pa Cibelushi nelyo pa Mulungu. Pali ubo bushiku, nga ca kuti abene ba mayanda bakaana ukulasambilila Baibolo, bakasabankanya kuti babashila icitabo ca kuti Ico Baibolo Isambilisha nangu magazini iipya. Baeluda bonse na babomfi batumikila bafwile ukubombako sana uyu mulimo no kwafwilisha bakasabankanya ukutendeka amasambililo ya Baibolo.

² Komiti ya Mulimo iya Cilonganino ikamona umulungu wingawama ukusalamo ubushiku bwa kulaya mu kweba abantu pa lwa kusambilila Baibolo. Kuti cawama ukulacinkulako bakasabankanya mu nshita mu nshita pa kuti bengalaipekanya na pa kuti ilyo baleshimikila ku ng’anda ne ng’anda na lintu babwelela mu kupempula ababasekelele, bengalabikako sana amano ku kweba abantu ukuti balebasambilisha Baibolo.

³ Ifyo Mwingaipekanya: Ifyo twingalanda nga tulefwaya ukutampa amasambililo ya Baibolo kuti twafisanga mu ca mu kati ica Ubutumikishi Bwesu Ubwa Bufumu ubwa January 2006, na mu citabo ca Ukupelulula, pe bula 12. Bamo kuti batemwa ukubomfya trakiti, pamo nga trakiti ya kuti, Bushe Kuti Mwatemwa Ukwishiba Icine? E lyo kabili, mu Ubutumikishi Bwesu Ubwa Bufumu ubwa August 2007, pe bula 3, balitulanga ifyo twingacita pa kuti twingatendeka amasambililo ya Baibolo nga twabwelela ku bapokeleko magazini. Baeluda na babomfi batumikila bali no kupeelwa inshiku sha kutungulula pa kukumana ukuya mu mulimo wa mwi bala, pa mamineti fye 10 ukufika kuli 15. Pali uku kukumana, balingile ukulanshanya ifyo bakasabankanya bengatendeka amasambililo ya Baibolo nelyo ukulangilila ifyo bengacite fyo.

⁴ Kwena, te bonse bakasumina ukutendeka ukusambilila Baibolo nangu ukutwalilila ukusambilila pa nshita iikalamba. Ici tacifwile ukulenga twaleka ukweba abantu pa lwa kusambilila Baibolo, pantu Yehova e ukulila abafuuka nge mpaanga mu kuteyanya kwakwe. (Yoh. 6:44) Umulimo wesu te wa kutanda fye imbuto sha cine lelo tufwile no kulashisakamana e lyo no kulatapilila ishamena, ne ci cisanshamo ukulasambilisha aba mitima isuma Baibolo. Nga tulebasambilisha Baibolo ninshi tulebombela pamo na Lesa, kabili ili lishuko sana.—1 Kor. 3:9.