Mulebomfya Bwino Impapulo Shesu
1. Kuti twapashanya shani Yesu ukutasha pa fyo Yehova atucitila?
1 Ilyo Yesu acitile icisungusho ca kupekanya ifya kulya no kupeela abantu, tapoosele ifyashelepo. (Mat. 14:19-21) Ifyacitile Yesu, ukukanapoosa ifya kulya ifyafumine kuli Yehova, filatulangilila ifyo tufwile ukulabomfya bwino ifyo Yehova atupeela ukupitila muli kangalila wa cishinka pa kuti na ifwe twingaba ‘abatotela.’—Kol. 3:15; Mat. 24:45-47; Luka 12:42.
2. Kuti twacita shani pa kuti bamagazini tabafulile sana mu ng’anda?
2 Bamagazini: Bamagazini kuti bafula sana mu ng’anda nga tatuleshiila abantu. Lyonse nga tulakwata bamagazini abashalapo, tulingile ukucefyako impendwa. Inga bamagazini ba kale? Nangu bengaba aba kale, abantu kuti basambililamo fimo. Nga twalikwata bamagazini aba kale, nalimo kangalila wa mulimo nelyo eluda umbi kuti atwebako inshila isuma iyo twingapeelelamo abantu aba bamagazini.
3, 4. Finshi tulingile ukulaibukisha ilyo tulepokako impapulo pa Ng’anda ya Bufumu?
3 Impapulo Shimbi: Nga twatendeka ukushiila abantu ulupapulo lumbi, tufwile intanshi ukumona nga natukwata isho mpapulo mu ng’anda ilyo tatulapoka na shimbi ku Ng’anda ya Bufumu. Mulepokako fye isho mulefwaya ukuyashiila abantu muli uyo mulungu, nga mwapwisha e lyo mwingayapokako na shimbi.
4 Nga mulefwaya impapulo sha kubelenga mwe bene, muleorda fye isho mulekabila. Lembeni ishina na keyala apo mulingile ukulemba. Nga mwalembamo nga caluba kuti mwacisanga. Nga mulabomfya Watchtower Library iya pa CD-ROM kabili mwalisunga na bamagazini balya mupokako lyonse, nalimo kuti mwaleka fye ukwabula ukuordako amabaundi volyumu ya Watchtower na Awake! Mwilaleka abana benu baleangasha impapulo nelyo bamagazini.
5. Finshi tushifwile ukulaba ilyo tuleshiila abantu impapulo?
5 Ukushiila Abantu Impapulo: Tulesha na maka ukushiila impapulo abalefwaya sana. Muleibukisha ukuti ni fwe twashingamwa ukulipila indalama sha kubomfya ukupangila impapulo shacindama ku mulimo wesu. Ilyo muleshiila abantu ulupapulo, mwilalaba ukubeeba ukuti na bo bene kuti bapeela ubupe ubwa kutungilila umulimo wa mwi sonde lyonse.
6. Mulandu nshi uo impapulo shesu shacindamina, kabili bushe ukucindama kwa ishi mpapulo kuti kwatwafwa ukucita cinshi?
6 Yesu alicitile ifisungusho fya kuliisha abantu abaumfwile insala ifya kulya, lelo ilingi line alebaliisha amashiwi ya kwa Lesa. Yesu atile: “Te ku fya kulya fyeka umuntu ekalila no mweo, lelo na ku mashiwi yonse ayafuma mu kanwa ka kwa Yehova.” (Mat. 4:4) Impapulo shesu shisambilisha icine ca mu Baibolo icingalenga umuntu ukuba no mweo wa muyayaya. (Yoh. 17:3) Kanshi te sha konaula!