Cindamikeni Ifipe fya Teokrasi
1 Ilyo Imfumu Yoshia yaleteyanya ukuwamya itempele, yatashishe abapeelwe ukubomba umulimo, ati: “Tabalingile kuli bene isha silfere ishapeelwa mu minwe yabo; pantu balecita mu cishinka.” (2 Isha. 22:3-7) Aba baume bashininkishe ukuti balicindamike ifyashila ku fyo balebomfya ifipe bapeelwe. Muno nshiku, na ifwe ilyo tulebomba umulimo washila uwa mbila nsuma ya kwa Lesa, tufwile ukuba aba cishinka mu kubomfya ifyo twapeelwa.
2 Mu Butumikishi bwa mwi Bala: Ukumfwikisha ubukombe bwacindama ubwaba mu mpapulo shesu no kwishibe ndalama shipooswapo pa kushipanga kutulenga ukushicindamika nga nshi. Tatufwile ukupeela impapulo shesu ukwabula ukusakamana ku bashicindamika ubukombe bwa mu Baibolo. Ngo muntu tangilwe sana ku mbila nsuma, kuti twamushiila trakti ukucila ukumupeela ulupapulo lumbi.
3 Shalikeni impapulo mu nshila ilanga ukuti mwalishiba ubucindami bwa shiko. Mwilasha mpapulo mu ncende umo shingapoosaikwa fye. Pa kuti tashonaike, bomfyeni impapulo mukwete ku ng’anda ilyo mushilapokako impapulo na shimbi. Nga ca kuti lyonse palashala bamagazini pabo mupoka, kuti mwacefyako impendwa mupoka.
4 Impapulo sha Kubomfya Mwe Bene: Tufwile ukuorda fye impapulo isho tulekabila. Tufwile sana sana ukulinga ilyo tuleorda amaBaibolo ya nkupo yanaka, Reference Bible, ne mpapulo shimbi ishikalamba, pamo nga Concordance, Index, ama Insight, ne citabo ca Proclaimers, fyonse apapooswa indalama ishingi pa kufipanga.
5 Bushe mulashininkisha ukuti mwalemba ishina lyenu na keyala mu mpapulo shenu? Ukucite ifi kulaafwa ukucefyako ukulaorda impapulo shimbi ukupyanika pali shilya shaluba. Nga mwalufya icitabo ca nyimbo, Baibolo, nelyo ulupapulo lwa kusambililamo, nalimo mukalusanga pa fyaluba ifisangwa pa Ng’anda ya Bufumu nelyo ku cifulo kubela ukulongana kukalamba.—Luka 15:8, 9.
6 Shi natubombeshe ukubomfya bwino impapulo shesu. Iyi ni nshila ya kulangilamo bucishinka bwesu mu kubomfya ifipe fya Bufumu ifyo Yehova atuseekesha.—Luka. 16:10.