Bushe Mukasangwako?
1 Inshita imo, Nte umukokole atile: “Nga wapuswa ubushiku bwa kubalilapo ubwe bungano, ala ninshi wapuswa ifingi sana!” Mulandu nshi alandile fyo? Pantu ubushiku bwa kubalilapo e bwa kutendeka umutebeto wa ku mupashi untu ukuteyanya kwa kwa Yehova kutupekanishisha. (Esa. 25:6) Lintu twasangwako ukufuma fye pa bushiku bwa kubalilapo, cilangilila ukuti tulasuminishanya na mashiwi ya kwa kemba wa malumbo uwatile: “Nasaminwe ilyo basosele kuli ine, abati, Tuleya ku ng’anda ya kwa Yehova.”—Amalu. 122:1.
2 Nangu cibe fyo, uyu mwaka wapwile, abasangilwe ku Mabungano ya Citungu aya “Icebo ca Kusesema Ica kwa Lesa” bali abanono sana pa bushiku bwa kubalilapo nga kulinganya na basangilweko pa bushiku bwa cibili no bwa citatu. Ici cilepilibula ukuti bamunyina abengi balipuswa ku kumfwa amalyashi ye bungano ayakwete ifyebo fyacindama pa lwa cebo ca kusesema. Kabili baliipusula no kubishanya kwa nsansa na basumina banabo.
3 Mwileka Incito ya ku Mubili Imupumfyanye: Napamo icalengele bamo ukukanasangwa ku bushiku bwa kubalilapo cali kutiina ukubatamfya incito. Lelo Inte sha kwa Yehova ishingi shalisanga ukuti abakalamba ba ncito balasuminisha nga babebela kabela ukuti balefwaya inshiku sha kutusha. Umukalamba wa ncito umo alitemenwe umupampamina wa kwa nkashi painiya uwa kusangwa ku kulongana konse na ku kulongana kukalamba ica kuti alilongeneko ubushiku bumo kwi bungano nkashi aile!
4 Tamufwile ukumona ukuti abakalamba ba ncito tabakamupe inshiku sha kutusha, nelyo ukutontonkanya ukuti cili fye bwino nangu mwapuswa ku bushiku bumo ubwe bungano. Pekanyeni kabili beni abashininwa no mutima onse ukuyalanga abakalamba ba ncito ukufuma mu Malembo umulandu ukusangilwa kwi bungano kwabela lubali lwacindama ulwa kupepa kwenu. (Heb. 10:24, 25) Lyene cetekeleni no mutima onse amalayo ya kwa Yehova, no kwishiba ukuti nga mwatangisha ifya ku mupashi mu mikalile yenu, fyonse fyo mukabila lwa ku mubili fikapayanishiwa.—Mat. 6:33; Heb. 13:5, 6.
5 Icacindama sana caba kutasha pa “fyacilamo.” (Fil. 1:10, 11; Amalu. 27:4) Ici citulenga tupekanye pa kuti tukamwenemo sana muli uku kupayanya kwa kwa Yehova. Tendekeni ukupekanya nomba, kabili pampamine pa kuti na imwe mukasangweko inshiku shonse shitatu!