“Ukushimikisha Ubunte Imbila Nsuma”
1. Ni mbila nsuma nshi tufwile ukushimikila abantu?
1 Pali lelo amalyashi ayengi ayo abantu bomfwa malyashi ya bulanda, kanshi tufwile “ukushimikisha ubunte imbila nsuma iya cikuuku ca bupe fye ica kwa Lesa” ku bantu. (Imil. 20:24) Ici cisanshamo ukubeba ukuti nomba line fye “inshiku sha kulekelesha” shalapyanikwapo ne calo cipya ica kwa Yehova umukaba ubulungami kabili umo ‘ifya ntanshi fikaba nafiya.’ (2 Tim. 3:1-5; Ukus. 21:4) Pali ilya nshita takwakabe ukulwala. (Esa. 33:24) Abafwa bakabuuka ukufuma mu nshiishi no kwisaikala capamo na kabili na balupwa lwabo ne fibusa. (Yoh. 5:28, 29) Icalo conse cikasanguka paradise. (Esa. 65:21-23) Ala ifi twalanda pano fya kumwenako fye finono ifya mbila nsuma iyo tufwile ukushimikila abantu!
2. Mulandu nshi, inshita ya Cibukisho (March-May) ibela ni nshita iisuma nga nshi iya kushimikila imbila nsuma?
2 Mu myeshi ya March, April, na May tukakwata ishuko lya kushimikila abantu amalyashi ayapala nga ya ayasuma. Muli iyi myeshi mu ncende ishingi ishe sonde imiceele ilaba bwino, kabili na kasuba takawa bwangu, kanshi myeshi iisuma iyo twingapoosa inshita iikalamba mu mulimo wa mwi bala. Na kabili isonde lyonse fye abantu ba kwa Lesa bakalasefya Icibukisho icaba icacindama nga nshi mu bumi bwabo. Bakacite fyo pa Cibelushi, pa March 22, ilyo akasuba kawa. Kanshi ino e nshita tufwile ukutendeka ukuipekanya pa kuti tukabombeshe mu mulimo.
3. Cinshi cikatwafwa ngo lupwa ukubombesha mu mulimo wa kushimikila?
3 Bupainiya bwa Kwafwilisha: Bushe kuti mwabombako bupainiya bwa kwafwilisha pa mweshi umo, ibili nelyo itatu? Nalimo kuti cawama ilyo mulecita isambililo lya lupwa mwashako inshita ya kulanshanye fyo muli no kubomba ngo lupwa. Nga mwaumfwana bwino, umo mu lupwa lwenu nelyo abengi kuti babombako bupainiya bwa kwafwilisha. (Amapi. 15:22) Mufwile ukupepelapo pa fyo mulepanga ukucita, kabili mukamona ifyo Yehova akamupaala. (Amapi. 16:3) Nangu ca kutila takuli nangu umo uwingabomba nga painiya wa kwafwilisha mu lupwa lwenu, bonse mufwile ukumona ifyo mwingabombesha mu mulimo wenu uwa kushimikila ilyo mulebombela capamo na balebombako bupainiya.
4. Kuti twapekanya shani pa kuti tubombeko bupainiya bwa kwafwilisha nangu ca kutila tulabomba incito?
4 Nga mulabomba incito, kuti mwabombako bupainiya bwa kwafwilisha nga mwapekanya bwino. Nalimo kuti muleshimikilako panono pa nshita ya kutuusha. Nelyo kuti mwalomba ukumupeelako icifulo ca kubombelamo icabela mupepi na kuntu mwikala nelyo uko mubombela incito pa kuti mulebombako iawala limo nelyo ukucilapo ilyo mushilatendeka incito nelyo pa numa ya kwinuka ku ncito. Kuti mwakwata inshita ya kushimikila na imbi pa kukanacita ifintu ifishicindeme sana muli uyo mweshi lelo ukwisaficita mu mweshi umbi. Na kabili kuti mulebomba akasuba konse pa Cibelushi e lyo na pa Mulungu. Bamo balapoka cuti wa bushiku bumo nelyo inshiku shibili pa kuti fye babombeko mu mulimo wa mwi bala.
5. Kuti mwayafwa shani abakoloci nelyo abalwalilila ukubombako bupainiya bwa kwafwilisha?
5 Nga ca kutila muli bakoloci nelyo mulalwalilila nelyo tamwakwata amaka sana, kuti mwabombako bupainiya bwa kwafwilisha nga muleshimikila inshita fye inono cila bushiku. Lombeni Yehova ukumupeela “amaka ayacila aya lyonse.” (2 Kor. 4:7) Nkashi umo alibombeleko bupainiya bwa kwafwilisha ilyo ali ne myaka 106. Balupwa lwakwe Abena Kristu na bambi mu cilonganino balemwafwa, ica kutila aleshimikila ku ng’anda ne ng’anda, alecita ifipempu fya kubwelelamo, aleya na ku masambililo ya Baibolo, kabili alebombako ne mbali shimbi isha mulimo wa kushimikila. Alyafwile abantu 10 ukutendeka ukusambilila Baibolo. Uyu nkashi atila, “Nga natontonkanya pe shuko ilishaiwamina ilyo nakwete ilya kubomba nga painiya wa kwafwilisha umutima ulesulamo ne nsansa, ndatemwa no kutasha Yehova no Mwana wakwe, e lyo no kuteyanya kwakwe ukwabamo abantu abakwata ukutemwa. Ukufuma pa nshi ya mutima wandi ndefwaya ‘ukutasha Yehova pali ici!’”
6. Bushe abaice ababatishiwa, abacili ku sukulu kuti bacita shani pa kuti babombeko bupainiya bwa kwafwilisha?
6 Nga ca kutila uli mwaice, uwabatishiwa, kabili ucili ku sukulu na iwe wine kuti wabombako bupainiya bwa kwafwilisha. Nga filya bacita ababomba incito, na iwe kuti walabomba sana lyonse pa Cibelushi na pa Mulungu. Nalimo kuti walabombako iawala limo nelyo ukucilapo pa numa ya kufuma ku sukulu inshiku shimo shimo. Bushe kuli inshita imo ilyo mukesala amasukulu iyo wingafwaya ukubombako umulimo wa mwi bala? Nga ulefwaya ukubombako bupainiya bwa kwafwilisha kuti cawama waeba abafyashi bobe.
7. Finshi baeluda bengacita ku kucincisha bakasabankanya ukubomba umulimo wa mwi bala mu nshita ya Cibukisho?
7 Bacincisheni: Ifyo baeluda balebomba kuti fyacincisha sana icilonganino. (1 Pet. 5:2, 3) Kuti cawama batantika ukukumana kwa mulimo wa mwi bala na kumbi kubalefwaya ukubombako ulucelocelo na pa numa ya kwinuka ku sukulu nelyo ku ncito. Kangalila wa mulimo afwile ukupeela bakasabankanya abafikapo ukulatungulula ukukumana kwa mulimo wa mwi bala kabili afwile ukushininkisha ukuti nabakwata icifulo ica kushimikilamo e lyo na bamagazini ne mpapulo ishingi isha kubomfya muli iyi myeshi iya kubombeshamo.
8. Cinshi twasambililako ku fyacitike mu cilonganino cimo?
8 Mu cilonganino cimo baeluda batendeke ukukoselesha icilonganino ukubombako bupainiya bwa kwafwilisha imyeshi iingi mu kubangilila. Batwalilile ukubilisha ku cilonganino cila mulungu bakasankanya abalembeshe ukubomba bupainiya bwa kwafwilisha. Ne ci calengele ukuti abalefwaya ukubombesha mu mulimo wa mwi bala beshibe ukuti bakakwata abakubomba nabo abengi. Balitantike ukukumana kwa mulimo wa mwi bala na kumbi, lucelocelo e lyo ne nshita ya cungulo. Ici calengele bakasankanya 53 ukubombako bupainiya bwa kwafwilisha mu April, kanshi kuti twatila mupepi na hafu mu cilonganino balibombeleko bupainya!
9. Mulandu nshi inshita ya Cibukisho yabela ni nshita iisuma kuli abo abafikapo ukulashimikila imbila nsuma?
9 Afweni Bambi Ukulashimikila: Ilyo abapya na baice bafikapo ukuba bakasabankanya, kuti cawama bakasabankanya ababelesha ukubalalika ukubomba nabo mu mulimo wa mwi bala. Kuti bacite fyo nalimo mu nshita ya Cibukisho lintu abengi mu cilonganino bakalabombesha mu mulimo wa mwi bala. Bushe mwalikwata umusambi wa Baibolo uulunduluka, uukonka amafunde ya kwa Yehova ayalungama? Bushe mwalikwata abana bakwata imibele iisuma abalelunduluka lelo abashilaba bakasabankanya? Nga ca kutila abo bantu balilanda ukutila balefwaya ukuba bakasabankanya abashabatishiwa kabili mulemona ukuti nabafikapo, ebeniko eluda umo mu cilonganino. Kangalila wa kutangilila akeba baeluda babili ukulanshanya na imwe no mwana wenu nelyo uo musambilila na o Baibolo.
10. Finshi baeluda bengacita ku kwafwa abanaka?
10 Imyeshi iikonkelepo nayo kuti yaba ni nshita iisuma kuli abo abanaka ukutendeka ukubomba na kabili ne cilonganino. Bakangalila ba Masambililo ya Fitabo na baeluda bambi bafwile ukubombesha ukutandalila abanaka no kubalalika ukubomba nabo mu mulimo wa mwi bala. Nga ca kutila balinaka pa nshita yalepa, baeluda babili bafwile intanshi ukulanda nabo ukumona nga ca kutila na balinga ukushimikila na kabili.—km 11/00 ibu. 3.
11. Ni muli cinshi umo Yehova alangila sana ‘icikuuku cakwe ica bupe fye’ ku bantunse?
11 Pekanishisheni Icibukisho: Mu cilubula e mo Lesa alangila sana ‘icikuuku cakwe ica bupe fye’ kuli ifwe fwe bantu. (Imil. 20:24) Abantu abengi isonde lyonse bakalongana pa Cibelushi, pa March 22, ilyo akasuba kawa ukusefya imfwa ya kwa Kristu. Tulefwaya ukwita no kwafwa abafumacumi ukusangwa ku Cibukisho icilanga ifyo Yehova alanga icikuuku cakwe ica bupe fye ku bantunse.
12. Ni bani tufwile ukwita ku Cibukisho?
12 Lembeni amashina ya bantu mulefwaya ukwita ku Cibukisho. Pali ayo mashina palingile ukuba amashina ya balupwa lwenu, abena mupalamano, abo mubomba nabo incito nelyo abo musambilila nabo ku sukulu, abo mwalesambilila nabo Baibolo kale nabo musambilila nabo Baibolo nomba, kabili na bonse abo mutandalila lyonse. Nga ca kuti bamo abo mwaita balefwaya ukwishiba bwino ifyo Icibukisho caba, kuti nalimo cawama ukubomfya ifisontelelo pa mabula 206 ukufika ku 208 mu citabo ca Ico Baibolo Isambilisha. Ukubomfya icisontelelo kuti kwalenga limbi mwatendeka isambililo lya Baibolo, pantu mukalanga uyo muntu icitabo tubomfya pa kutungulula amasambililo ya Baibolo.
13. Bushe Yehova apalile shani bakasabankanya babili abaibikilisheko ukutila mpaka fye bete abantu ku Cibukisho?
13 Nkashi umo alembele amashina ya ndupwa 48 abakwita ku Cibukisho. Nga abeta aleconga amashina yabo no kulemba ubushiku abeshibishapo. Ali ne nsansa ukumona abantu 26 abo aitile ukusangwa ku Cibukisho! Munyinenfwe umo uwakwata ishitolo aitile umubomfi wakwe uwali kale shimapepo. Uyu shimapepo alisangilwe ku Cibukisho, kabili pa numa ya Cibukisho atile, “Nasambilile ifingi sana pali Baibolo mwi awala fye limo ukucila ne fyo nasambilile mwi Calici lya Katolika pa myaka 30.” Ilyo Icibukisho capitile uyu shimapepo atendeke ukusambilila Baibolo mu citabo ca Ico Baibolo Isambilisha.
14. Ni kampeni nshi tukalacita isonde lyonse ukutendeka pa March 1?
14 Kampeni: Ukutendeka pa Cibelushi, pa March 1, ukufika fye na ku March 22, tukalasabankanya ku bantu akapepala kaibela aka kubetilapo ku Cibukisho isonde lyonse fye. Natukabombeko bonse iyi kampeni iyaibela. Kuti cawama ukupeela abantu mu minwe aka kapepala, ukucila ukusha mwi samba lya ciibi. Lelo, nangu cibe ifyo, nga ca kutila icifulo mushimikilamo cikalamba sana, baeluda kuti bapekanya ukuti mulesha akapepala pa bashili pa mayanda mu mucenjelo. Na kabili pa Cibelushi na pa Mulungu tukalashalika ku bantu bamagazini ba nomba line.
15. Finshi twingalanda pa kupeela abantu akapepala ka kubetilapo ku Cibukisho?
15 Apo tukwete fye inshita iinono iya kusabankanyamo utu tupepala, kanshi kuti cawama ukulanda fye fyebo ifinono. Mufwile ukuba abacincimuka kabili aba bucibusa. Pa kushila umuntu, kuti nalimo mwalanda ifyapala ifi: Tulefwaya ukushininkisha ukuti imwe no lupwa lwenu ne fibusa mwapokelela akapepala kesu aka kumwita ku kusefya ukwacindama nga nshi ukukabako pa March 22. Mukwai akapepala ka kumwitilapo aka. Inshita ya kulongana ne cifulo tukalonganinapo fili pali aka kene kapepala.” Umwine wa ng’anda kuti nalimo afwaya ukumwipusha icipusho nelyo kuti apoka akapepala no kusumina ukuti akasangwako ku Cibukisho. Lembeni bonse abo mwamona ukuti na batemwa ukwisasangwako kabili panganeni nabo ilyo mukabwelelako.
16. Cinshi cacitike icilelanga ukuti kampeni ya kwita abantu ku Cibukisho mu fifulo tubombelamo yalicindama?
16 Umwaka wafumineko umushilika umo asangile akapepala ka kumwitilapo ku Cibukisho pe samba lya ciibi cakwe. Alefwaya ukusangwako, lelo alekabila ukupoka ulusa intanshi ku mushilika mukalamba. Ilyo alangishe umushilika mukalamba akapepala, aikele fye tondolo, lyena atile abafyashi bakwe ni baNte kabili aleya capamo nabo mu kulongana. Icaweme sana ca kutila uyu mushilika mukalamba tasuminishe fye umushilika munankwe ukusangwa ku Cibukisho, lelo baile bonse!
17. Bushe tucita shani pa kulanga ukuti tatupokelele ibusha icikuuku ca bupe fye ica kwa Lesa?
17 Tuletasha: Ilyo tulepalamina ku nshita ya Cibukisho ica 2008, shi ifwe bonse tuletontonkanya pa cikuuku ca bupe fye ico Yehova alanga kuli ifwe. Umutumwa Paulo alembele ukutila: “Na ifwe tulemupaapaata ukukanapokelela ibusha icikuuku ca bupe fye ica kwa Lesa.” (2 Kor. 6:1) Bushe kuti twacita shani pa kulanga ukuti tatupokelele ibusha icikuuku ca bupe fye ica kwa Lesa? Paulo alembele ati: “Lelo mu nshila yonse tulaishininkisha fwe bene nga bakapyunga wa kwa Lesa.” (2 Kor. 6:4) E ico kanshi tulanga ukuti tulatasha Yehova pa bupe atupeela, pa kulalanga imibele yesu isuma no kuba abacincila mu kubilisha imbila nsuma. Uno mwaka natukwata ishuko lya kushimikisha ubunte imbila nsuma mu nshita ya Cibukisho.
[Akabokoshi pe bula 3]
Ni Bani Bafwile Ukubombako Bupainiya bwa Kwafwilisha?
◼ Indupwa
◼ Ababomba incito
◼ Abalwalilila na bakoloci
◼ Abana be sukulu
[Akabokoshi pe bula 4]
Ifya Kucita pa Kusabankanya Akapepala ka Kwitilapo Abantu ku Cibukisho:
◼ Landeni fye ifyebo ifinono kabili beni abacincimuka
◼ Lembeni amashina ya bantu abalefwaya ukwisasangwako kabili bweleleniko
◼ Lyonse pa Cibelushi na pa Mulungu shalikeni bamagazini