Ifingatwafwa Ukulashimikila Bwino—Mu Fifulo fya Makwebo

Umulandu Cacindamina: Apo abantu abengi bapoosa inshita iikalamba ku ncito, ilingi line inshita iisuma iya kubeba imbila nsuma ya Bufumu kubashimikila pa ncito pene. Ukubila imbila nsuma pa cifulo ca makwebo kwaliba bwino sana kabili mulafuma ifisuma, pantu abantu nabafuma pa mayanda kabili nga baleshitisha fimo balabika amano kubo balemona ukuti balefwaya ukushitako fimo. Pa kushimikila bwino imbila nsuma muli ifi fifulo, bakasabankanya bafwile ukuba abashilimuka kabili balingile no kufwala bwino no kuba abaipempenkanya. (2 Kor. 6:3) Kanshi, kangalila wa mulimo afwile ukulaishiba bwino ilyo ifi fifulo filebombelwamo na balebombelamo.

Ifyo Mwingacita:

Mufwile ukupekanya fye ifyebo ifinono ifya kulanshanya na babomfi. Nga mwapoosa inshita iikalamba ukulanshanya na babomfi pa ncito, nalimo ilyo mukabwelelako kuti bakaana ukuti mulanshanye nabo.
Kuti caba bwino ukushimikila mu fifulo fya makwebo ilyo abantu abakushita ifintu bashilafula sana, pamo nga lilya line baisula amatuuka.
Muleesha ukubalilapo ukulanda ku bene ba ncito. Muleba abacincimuka kabili abasansamuka. Nalimo kuti mwalanda ukuti, “Tuletandalila abantu pa ncito no kulanshanyako nabo panono pantu cilafya ukubasanga pa mayanda.” Lanshanyeni nabo panono, kabili bapeeleni trakiti, magazini, nelyo ulupapulo lumbi. Pa kuti cimoneka ukuti na imwe mulecita amakwebo, kuti caba bwino ukukanalanda pa musangulo kano fye nga ca kuti abene e baipusha ukufuma indalama tubomfya mu mulimo wesu.
Nga ca kuti umwine wa ncito ali uwasansamuka, mwipusheni nga kuti mwalanshanyako mu kwipifya na babomfi bamo bamo. Mu fifulo fya makwebo fimo, kuti nalimo cawama ukwipusha nga kuti bamusuminisha ukushako impapulo mu muputule umo ababomfi batushisha nelyo ukuliila.
Muleba abashilimuka, kabili mwilapampamina fye pali cimo. Tutile, umubomfi nga alelanda na balefwaya ukushitako fimo nelyo napamfiwa, mufwile ukulolela no kulanda nankwe inshita imbi.

Esheniko Ukucita Ifi Uno Mweshi:

Ilyo mukaba pa Mapepo ya Lupwa, mukacite icilangililo icipi pa fyo mwingashimikila mu cifulo ca makwebo.