Fasfas Ḇewarpu
1. Babel Ḇeba Kyur ḇe Rosairi?
”Babel Ḇeba” kyur ḇe agama ḇekaku ḇa nakam. (Fasasna 17:5) Moḇsa kofawi roi ine rai? Kokara roi nane pan:
Isya kaku ma nya papoik ro supswan ine ḇesiper. Refo ya doḇe Babel Ḇeba kyain ro ’er ma kawasa’ sya. Isya nya ’karajan ro raja-raja ro supswan’ ine.—Fasasna 17:15, 18.
Ima fararur polotik ma farḇaḇyan disya ḇa. Raja-raja ro supswan ine ma ”ḇefarḇaḇyan” sya nari sores bo smam Babel Ḇeba imkok.—Fasasna 18:9, 15.
Fyarkor snonggaku sya fa skara sasar Manseren Allah. Refo ya dap Babel Ḇeba ine ḇe bin ḇefrur farḇuk kukro ifrur wis kuker pamarenta sya insama ismai pipi ḇaido insama smanen i. (Fasasna 17:1, 2) Dawninyan kawasa ḇero er-er nakam. Ḇyesasar kukro myun snonggaku ḇebor sya fa simar.—Fasasna 18:23, 24.
Kwaḇer ḇe farkarkor 13 nomor 6 ya
2. Fafisu Risai Mesias Ryamuma ya?
Refo ya ikofen ḇepon kwar nari swaf minggu ri 69 nawas kwar, insape Mesias ryama.—Kowasya Daniel 9:25.
Fafisu risai swaf minggu ri 69 irandak ya? Ro taun 455 MḆ. Kukro ro taun anya, Gubernur Nehemia ryama ḇe Yerusalem fa ḇyawes kaḇer na.—Daniel 9:25; Nehemia 2:1, 5-8.
Swaf minggu ri 69 ine kawanwan ya ḇyefis? Nano ido, ḇardadi ro Refo dap taun oser ḇe ras oser monda. (Bilangan 14:34; Yehezkiel 4:6) Inja, swaf minggu oser kyur ḇe taun ri fik. Rarirya ro ḇardadi ine, swaf minggu ri 69 kawanwan ya iso swaf taun ri 483 (minggu ri 69 x ras ri 7).
Fafisu risai swaf minggu ri 69 ine imnai ya? Kokor swaf taun ri 483 ro taun 455 MḆ ido, nari isapi ro taun 29 M.a Ro taun ine iso, Yesus ḇyebaptis ma ismai ramrem ḇe Mesias!—Lukas 3:1, 2, 21, 22.
Kwaḇer ḇe farkarkor 15 nomor 5 ya
3. Nyan Pararei kuker Sbuk Rik
Nyan pararei ono naisya sun snonggaku ḇeduf oso manggundi rik ḇyena. Nyan pararei ḇeradine, ono naisya snonggaku Kristen sya jadi fa siso na ḇa. Rupa ra, snonggaku oso byuk rik ḇyena faro snonggaku ḇese ḇaido ikram ḇepon rik ḇyena fa sepake operasi manggundi.—Ulangan 15:23.
Imbape nyan pararei ono bisa snonggaku Kristen sya siso na. Imnis ra, sun rik fa smam na, sifrur rik sena fa nasren (hemodialisis), sḇe rik sena insama npakrek ḇa (hemodilusi), ḇaido sbuk mesin sor ḇe penyelamatan sel ḇaido mesin ḇefnoḇek paru-paru ma barmor. Snonggaku Kristen oser-oser na skinfir ro manggunsi moḇsa sbuk rik sena fafisu operasi ya imbrane, fafisu smam dafduf na, ḇaido fafisu siso terapi ḇebabo na. Moḇ dokter sya siso nyan nane naḇesisye. Inja, fafisu snonggaku Kristen oso imbe ismai operasi, smam dafduf ḇyena, ḇaido iso terapi oso ḇaime, syewar ḇepon fa ifawi kaku moḇsa nari dokter sya sbuk rik ḇyena rai. Nari kyara ḇepon fakfuken nane:
Sḇe mesin fa siksasyar rik ayena ḇe bandi, mura namnai fasaw ido na rariso? Na yamam rik anna ḇe rik ayena kaker ke, ipyum ya yasḇawer na ḇe saprop ya?—Ulangan 12:23, 24.
Sun rik ayena kerno, srir obat ro na, mura sisun kaḇer na ḇe baken ayeja ido na rariso? Raris rosai yafarkor ro Refo ya kwar, yaso nyan nane ido, nari nakyaren sneuser yeja ḇa ke?
Kwaḇer ḇe farkarkor 39 nomor 3 ya
4. Roi Ḇefnai fa Mambeswa Imbeswa Suḇesisye
Refo ya doḇe snon ma bin ḇefarḇuk kwar supok suḇesisye awer. Oso wer ido, ikofen kaku fa suḇesisye ido, supok sufarḇuk wer awer. (1 Korintus 7:10, 11) Imbape, samswen ono naisya nafnai ra snonggaku Kristen oso kyinfir fa ḇyesisye kuker swari.
Ismai roi sfandun ro ras-ras na ḇaḇeri: Eḇe snon ya imewer fyasos fandun ro ras-ras faro kina ḇyesi rawo sna roḇean ma sansun oḇa.—1 Timotius 5:8.
Swari myun fafaya i: Swari myun ker i ra idafduf ḇaido imbe myun i fa imar.—Galatia 5:19-21.
Swari idwarek marmar i fa wis ḇyena kuker Yahwe I imbe namuk: Swari ifrur i ra jadi fa ifarmyan ḇe Yahwe I ḇa.—Farfyar 5:29.
5. Ras Ḇeba ma Munara Ḇese
Snonggaku Kristen sima sakso ḇa ro munara ras ḇeba Yahwe imewer na. Inja snonggaku Kristen ḇefarkor sneri imnis farkankin ro Refo ya, ifawi rosai nari ifrur kaku fafisu snonggaku ḇese sor i fa dakfrur ras ḇeba na. Kwarapan Ausya wakro fafisu ḇeradine.
Oso ikofen ḇe Au radine, ”Slamat Natal”. Na wakofen monda, ”Kasumasa.” Imbe ifawi syadi ido, fasnaiḇair ḇe i roi ḇefrur fa Auma wakso ro ras ḇeba anya ḇa.
Swambri dakḇe Saksi Yahwe ḇa bo dor Au fa munan kayam kuker karyer muḇesi ro ras ḇeba ya. Sneuser Bedi ikyaren Au ḇa ido, wakofenḇair myaren ḇepon ḇe swambri bo woḇe anan kayam anya daksun ro munara ras ḇeba anya ido, na wakso si ḇa.
Bos Bedi byuk pipi ro fafisu ras ḇeba ya. Na pampum pipi byuk anna ke? Kwara na resari. Bos Bedi byuk pipi anya ḇe Au kukro myam ro ras ḇeba ani ke, imarisen fyasnai monda kasumasa kukro myam Auma wafararur pyum.
Oso byuk roi ḇepyum ḇe Au ro fafisu ras ḇeba ya. Ḇebuk roi ḇepyum ani imbude ikofen radine, ”Yafawi kwar auma wakfrur ras Natal ya ḇa, imboi yamarisen yabuk ine ḇe au.” Snonggaku ine rya imbe fyasnai frur pyum monda. Imbape kwara resari, isya syewar fa ifrowes kakyar Bedi ke, imbe idif Au fa wakso ro ras ḇeba anya. Kwara pyum na kwar ido, insape kwinfir ro manggundaw imbe wun roi byuk anya ke roḇa. Komarisen insama wos snemuk koḇena nafrur fa sneuser koḇena nasren ma kosouser ḇe Yahwe I.—Farfyar 23:1.
Kwaḇer ḇe farkarkor 44 nomor 1 ya
6. Dafduf Ḇepampam
Koswar snonggaku ḇese, inja na kosasor ko insama kofnai awer dafduf ḇepampam na nakren ḇe ḇesesya. Iso ḇefnai fa kosmai dafduf ḇepampam ḇaido kokara kosmai dafduf anna kwar ma kofawi nari nakren ḇe ḇesesya ido, fandun fa kosasor pyum ko. Kofrur roi ine kukro Refo ya doḇe, ”Waswar min snonkaku ḇese, imnis waswar mankundaw.”—Roma 13:8-10.
Moḇsa snonggaku ḇeduf na fyasnai iswar snonggaku ḇesesya rai? Ipok fa fyasnai awer sawarwar ḇyena kuker dawrepen si ḇaido isyum si awer. Kyara sasar awer fafisu sor i ḇe rum sena ḇa kukro imbe skadaunwarek kina sesi. Rofyor ḇyebaptis ḇaim, fandun fa ikofenḇair ḇe koordinator badan penatua fa sifawi dafduf ḇyena insama sifrur fasasos faro ḇeyakḇebaptis ḇesesya. Imarisen fa smam rik ḇyena rofyor ifrur kabrai saswar ḇaim. Kofrur roi ine kada, koisya kofasnai koswar snonggaku ḇese, isoine kosewar fandun manggun koḇena ḇardi ḇa, ḇape snonggaku ḇesesya fandun sena kako.—Filipi 2:4.
Kwaḇer ḇe farkarkor 56 nomor 2 ya
7. Sasewar ma Parkara Hukum
Rofyor kona wos oser ḇekur pipi ma sasewar koḇena kuker snonggaku ḇese, iḇye syadi naek srar Kristen koḇesi ido, fandun fa kofasepen pyum na. Nane nafnoḇek ko fa kobinggwan ro samswen na. (Yeremia 32:9-12) Imbape, snonggaku Kristen sia sisya sna wos oser ḇa ḇekur pipi ma roi ḇesena, mura srakrok kermgun. Rarirya ido, bisa sisewar fa smam mnis na kuker nyan ḇepyum insama skain pyum kaḇer.
Fama rofyor kosmai samswen ḇeba syadi, rupa ra sanggar ko ḇaido sawos roi ḇekaku ḇa ḇekur ko ido na rariso? (Kowasya Matius 18:15-17.) Yesus danun ḇe ko fa koso nyan ri kyor nane:
Kosewar fa kofrur samswen anna fa namnis ro fandu ko monda.—Mam mnuk ḇe 15.
Jadi ḇa ido, kor snonggaku ro sidang ḇemas kwar ro rur, oser ke suru fa suso ko.—Mam mnuk ḇe 16.
Samswen anna namnai ḇa ido, insape kokofenḇair na ḇe penatua sya.—Mam mnuk ḇe 17.
Fafisu ono, kopok kun awer naek srar koḇesi ḇe kankain karkara kukro nari nane nafnai fa sanonef Yahwe snonsnon Ḇyedi ma sidang ya. (1 Korintus 6:1-8) Imbape parkara ono naisya fandun fa sun na ḇe kankain karkara, raris imbe simuk farḇakḇuk sena, mansei ḇena hak fa ḇefaduru romawa sya, ma sap ḇepon kumpan nari sisasyar na. Oso wer iso parkara asuransi, perusahan nambran wer ḇa, ḇaido sifrur surat wasiat. Snonggaku Kristen oso dun parkara ḇeradine ḇe kankain karkara ma ifrur na kuker nyan ḇepyum ido, imbran sasar farkankin ro Refo ya ḇa.
Sifrur roi ḇeḇarḇor syadi raris roi sor ḇe pemerkosaan, sifrur roi ḇeḇye ḇa faro romawa sya, spakpik, skarawraw, ḇaido smamun ido, snonggaku Kristen oso bisa ikofenḇair roi nane ḇe ḇeyuf papoik sya. Ifrur na ido, imbran sasar farkankin ro Refo ya ḇa.
a Ro taun 455 MḆ isof ro taun 1 MḆ, kawanwan ya iso taun ri 454. Ro taun 1 MḆ isof ro taun 1 M, kawanwan ya iso taun oser (taun nol naisya ḇa). Ro taun 1 M isof ro taun 29 M, kawanwan ya iso taun ri 28. Kokor nakam ido, na kosmai taun ri 483.