?Olsem Wanem Yumi Save Joenem Stret Fasin Long Bilif Blong Yumi?
“Yufala i gat fasin blong bilif, ale yufala i joenem long stret fasin.”—2 PITA 1:5.
1, 2. ?From wanem yumi mas gat tingting se ol man blong Jeova oli mas mekem fasin we i stret?
OLTAEM Jeova i stap mekem ol samting long wan fasin we i stret. Hem i stap mekem i stret mo i gud. From samting ya, aposol Pita i save tokbaot God olsem hemia we i singaot ol tabu Kristin tru ‘long haenem mo stret fasin blong Hem.’ (NW) Stret save long gudfala Papa we i stap long heven, i soemaot samting ya we oli nidim blong oli save folem wan laef blong trufala fasin blong fasgud long God.—2 Pita 1:2, 3.
2 Aposol Pol i askem ol Kristin blong oli ‘mas traehad blong folem fasin blong God, from we oli pikinini blong hem.’ (Efesas 5:1) Ol man blong wosip long Jeova oli olsem Papa we i stap long heven, oli mas mekem i stret nomo long eni kaen samting. ?Be, wanem ya stret fasin?
Stret Fasin
3. ?Olsem wanem oli talem mining blong “stret fasin”?
3 Ol diksonari blong tede oli givim mining blong “stret fasin” olsem “fasin we i nambawan; gud fasin.” Hem i “gudfala fasin mo gudfala tingting; ol fasin we oli stret.” Wan man we i stret, hem i gat stret fasin. Stret fasin i save minim tu olsem “laef we i folem wan rul blong stret fasin.” Yes, long saed blong ol Kristin, God nao hem i givim “rul ya blong stret fasin” mo hem i mekem i klia long Tabu Tok blong hem, Baebol.
4. ?Wanem ol fasin i stap long 2 Pita 1:5-7 we ol Kristin oli mas traehad blong gat?
4 Ol trufala Kristin oli folem ol stret rul blong Jeova God, mo oli lesin long ol nambawan promes blong hem wetem bilif. Mo tu oli folem advaes blong Pita se: “Yufala i mas traehad blong mekem fasin blong yufala i kam gud moa. Yufala i gat fasin blong bilif, ale yufala i mas joenem long stret fasin. Yufala i gat stret fasin, ale yufala i mas joenem long waes. Yufala i gat waes, ale yufala i mas joenem long fasin blong bos long tingting. Ale yufala i mas joenem fasin blong stanap strong longtaem long fasin blong bos long tingting. Ale yufala i mas joenem fasin fasgud long God long fasin blong bos long tingting. Ale yufala i mas joenem fasin blong laekem tumas ol brata blong yufala long fasin fasgud long God. Yufala i gat fasin blong laekem tumas ol brata blong yufala, ale yufala i mas joenem long fasin blong laekem tumas ol man.” (2 Pita 1:5-7, NW) Wan Kristin i mas traehad blong gat ol fasin ya. Oli no save mekem samting ya long sam dei no sam yia nomo, no gat, be oli mas traehad oltaem blong mekem long ful laef blong olgeta. !Yes, blong joenem stret fasin long bilif blong yumi, samting ya nomo i no wan isi samting!
5. ?Baebol i talem wanem long saed blong stret fasin?
5 M. R. Vincent, man blong raetem diksonari, i talem se, bifo mining blong Grik tok ya we oli tanem i kam “stret fasin” i minim “ol samting we oli nambawan.” Pita i yusum tok ya taem hem i talem se ol Kristin oli mas talemaot “ol gudfala wok,” no ol stret fasin blong God. (1 Pita 2:9) Long saed blong Baebol, stret fasin i no olsem wan samting we i haed be hem i olsem “strong tingting blong mekem gudfala fasin, paoa blong laef.” Taem Pita i tokbaot stret fasin, hem i stap tingbaot strong tingting blong gudfala fasin we ol man blong God oli mas soem long laef blong olgeta mo holemtaet. Be, from we yumi no stretgud olgeta ?yumi rili save mekem samting we i stret long ae blong God?
No Stretgud Olgeta Be Oli Gat Stret Fasin
6. ?Nating se yumi no stretgud olgeta, from wanem oli talem se yumi save mekem fasin we i stret long ae blong God?
6 Taem yumi bon yumi no stretgud olgeta mo yumi gat sin, taswe maet yumi stap tingting se olsem wanem nao yumi save mekem samting we i stret long ae blong God. (Rom 5:12) Yumi rili nidim help blong Jeova blong yumi save gat wan klin hat, we ol stret tingting, toktok, mo ol fasin oli save kamaot long hem. (Lukluk Luk 6:45.) Afta we hem i mekem sin wetem Batsiba, Deved man ya blong raetem sam, i tanem tingting blong hem long sin blong hem mo i askem God i se: ‘God, plis yu mekem hat blong mi i klin olgeta. Plis yu mekem tingting blong mi i kam nyuwan bakegen, mo i stap strong long yu oltaem.’ (Ol Sam 51:10) Deved i kasem fasin fogif blong God mo help ya we hem i nidim blong folem wan stret rod. Olsemia nao, sipos yumi mekem bigfala sin be yumi tanem tingting blong yumi mo akseptem help blong God mo ol elda long kongregesen, yumi save gobak long wan stret rod mo stap oltaem long rod ya.—Ol Sam 103:1-3, 10-14; Jemes 5:13-15.
7, 8. (a) ?Blong yumi stap gohed blong mekem stret fasin, yumi nidim wanem? (b) ?Ol Kristin oli kasem wanem help blong oli stap mekem ol stret fasin?
7 From we yumi bon wetem sin, yumi mas gohed blong mekem wan faet insaed long yumi blong yumi stap folem rod blong stret fasin. Sipos yumi wantem stap mekem stret fasin, neva yumi mas letem yumi wanwan blong sin i bos long yumi. Be defren, yumi mas letem “stret fasin i olsem bos” blong yumi, oltaem yumi mas tingting, toktok, mo mekem ol samting long fasin we i stret. (Rom 6:16-23) I tru, ol samting we yumi wantem long saed blong bodi mo paoa blong sin long tingting blong yumi oli strong, mo wan faet i stap kamaot bitwin ol samting ya we yumi nomo yumi wantem mo ol stret samting we God i wantem yumi blong mekem. ?Taswe, yumi mas mekem wanem?
8 Wan samting se, yumi mas letem tabu speret, no paoa blong Jeova i lidim yumi. Ale yumi mas tingtinggud long advaes blong Pol se: “Sipos Tabu Speret i stap lidim yufala, bambae yufala i no stap mekem ol samting ya we tingting blong yufala nomo i wantem. Ol rabis samting we tingting blong yumi i wantem i agensem ol samting we Tabu Speret i wantem. Mo ol samting we Tabu Speret i wantem i agensem ol rabis samting we tingting blong yumi i wantem. Tufala samting ya i olsem we tufala i enemi long tufala. From samting ya, yufala i no save mekem ol gudgudfala samting we yufala i wantem mekem.” (Galesia 5:16, 17) Yes, yumi gat speret blong God, olsem wan paoa blong pusum yumi blong mekem stret fasin, mo yumi gat Tok blong hem, olsem wan samting we i lidim yumi long gudfala fasin. Mo tu yumi gat ogenaesesen blong Jeova we i stap givhan long yumi long kaengud fasin mo ol advaes blong “slef ya we i stret mo waes.” (Matyu 24:45-47, NW) Olsemia nao, yumi save winim faet agensem ol rabis fasin we tingting blong yumi nomo i wantem. (Rom 7:15-25) I tru, sipos wan tingting we i no klin i kam insaed long yumi, yumi mas sakemaot kwiktaem mo prea from help blong God blong blokem eni samting blong traem man, we i traem yumi blong mekem samting we i no stret.—Matyu 6:13.
Stret Fasin Mo Ol Tingting Blong Yumi
9. ?Stret fasin i nidim wanem kaen tingting?
9 Stret fasin i stat wetem tingting we man i stap gat. Blong yumi haremgud long gladhat blong God, yumi mas tingbaot ol samting we oli stret, oli gud, mo we oli klin. Pol i talem se: “Ol brata mo sista. Hemia las tok blong mi. I gat ol fasin i stap we oli stret gud, mo we i stret nomo blong yumi presem olgeta. Mo yufala i mas putum tingting blong yufala i stap strong long ol fasin we oli tru, mo ol fasin we oli hae, mo ol fasin we oli stret, mo ol fasin we oli klin gud, mo ol fasin we oli mekem yumi harem gud mo ol fasin we ol man oli stap ona long olgeta.” (Filipae 4:8) Yumi mas putum tingting blong yumi i stap strong long ol samting we oli stret gud, oli klin, mo yumi no mas laekem nating samting we i no stret. Pol i talem se: “Yufala i mas holem ol fasin ya we mi mi soemaot long yufala long ol tok mo ol wok blong mi, mo we mi tijim yufala long olgeta, nao yufala i lanem olgeta.” Sipos yumi olsem Pol—we tingting, toktok, mo fasin blong yumi i stret—bambae yumi ol gudfala man we ol narafala oli glad blong joen wetem yumi mo yumi soem gudfala eksampel blong Kristin laef, mo ‘God ya we i stampa blong pis bambae i stap kampani wetem yumi.’—Filipae 4:9.
10. ?Olsem wanem fasin blong folem advaes long 1 Korin 14:20 i save givhan long yumi blong stap mekem stret fasin?
10 Sipos yumi wantem stap holem tingting we i stret mo mekem Papa blong yumi long heven i glad long yumi, i impoten we yumi folem advaes blong Pol, se: “I nogud yufala i stap we tingting blong yufala i olsem tingting blong smol pikinini nomo. Long fasin blong yufala, yufala i mas stap longwe long ol sin, olsem smol pikinini nomo. Be long tingting blong yufala, yufala i mas kam olsem we yufala i bigman finis.” (1 Korin 14:20) Samting ya i min se, yumi ol Kristin, yumi no stap traem faenem save blong rabis fasin no lukaot ekspiryens long rabis fasin. No gat. Yumi no letem tingting blong yumi i kam doti long rod ya, be yumi waes i naf blong jusum blong yumi stap olsem we yumi no gat save, mo tingting blong yumi i klin olsem blong pikinini nomo long saed ya. Be, yumi savegud tu se rabis fasin blong seks mo ol nogud fasin oli olsem fasin blong mekem sin long ae blong Jeova. Sipos yumi rili wantem tumas blong mekem Jeova i glad taem yumi stap mekem ol gudfala fasin, samting ya bambae i givhan long yumi, from we bambae hem i pusum yumi blong yumi no wantem lukluk no harem ol nogud samting mo spolem tingting blong yumi wetem ol narafala rabis samting blong wol ya we Setan i bos long hem.—1 Jon 5:19.
Stret Fasin Mo Toktok Blong Yumi
11. ?Blong yumi stap mekem stret fasin, toktok blong yumi i mas olsem wanem, mo long saed ya wanem eksampel blong Jeova God mo Jisas Kraes yumi gat?
11 Sipos ol tingting blong yumi oli klin, toktok blong yumi i mas soemaot samting ya. Blong gat stret fasin i min se toktok blong yumi i mas klin, i gud, i tru, mo i leftemap tingting blong ol man. (2 Korin 6:3, 4, 7) Jeova hem i “God blong trutok.” (Ol Sam 31:5, NW) Hem i stap tru long ol fasin we hem i mekem long ol narafala, mo ol promes blong hem oli mas kamtru from we hem i no save gyaman. (Namba 23:19; 1 Samuel 15:29; Taetas 1:2) Jisas Kraes, Pikinini blong God, hem i “fulap long gladhat mo trutok.” Taem hem i stap long wol, oltaem hem i stap talem trutok ya olsem we hem i bin kasem long Papa blong hem. (Jon 1:14; 8:40) Antap moa, Jisas “i no mekem wan samting nogud. Mo i no gat man we i harem wan gyaman tok i kamaot long maot blong hem.” (1 Pita 2:22) Sipos yumi ol trufala man blong God mo blong Kraes, bambae yumi stap talem trutok nomo mo fasin blong yumi i stret, olsem ‘strap we yumi taetem finis long bel blong yumi.’—Efesas 5:9; 6:14.
12. ?Sipos yumi wantem stap mekem ol stret fasin, wanem kaen toktok yumi no mas talem?
12 Sipos yumi gat stret fasin, i gat sam kaen toktok we yumi no mas talem. Advaes blong Pol bambae i soem long yumi, hem i talem se: “Yufala i mas lego olgeta fasin blong kros. Yufala i mas no holem kros, mo yufala i mas no kros kwik. Yufala i mas no sakem tok blong yufala i go antap, mo yufala i mas no tok nogud long yufala. Mo yufala i mas finis long fasin ya we yufala i stap badfren long yufala.” “From we yufala i tabu, yufala i man blong God, i no stret nating blong yufala i stap tokbaot ol rabis fasin. Fasin we man i ronem woman, mo ol fasin nogud blong man wetem woman, mo fasin blong man we i wantem evri samting, bambae yufala i no tokbaot. Mo i no stret blong yufala i yusum ol rabis tok, mo ol krangke tok, mo ol tok plei we i nogud. I stret blong yufala i stap talem tangkyu long God.” (Efesas 4:31; 5:3, 4) Bambae ol narafala man oli faenem se i gud blong stap kampani wetem yumi, from we hat blong yumi we i stret i pusum yumi blong yumi no talem ol toktok ya we oli no stret nating long wan Kristin.
13. ?From wanem ol Kristin oli mas bos long tang blong olgeta?
13 Tingting blong wantem mekem God i glad mo talem ol samting we oli stret, bambae oli givhan long yumi blong bos long tang blong yumi. From we yumi gat sin, samtaem yumi mekem i no stret long toktok blong yumi. Be, disaepol Jemes i talem se ‘yumi stap putum smol aean long maot blong ol hos, blong mekem oli obei long yumi,’ nao oli obei oli save go long weples we yumi lidim olgeta. Olsemia nao, yumi mas wok strong blong bos long tang mo traem blong yusum long ol fasin we oli stret nomo. Wan tang we man i no bos long hem, hem “i olsem wol ya we i fulap long ol samting nogud.” (Jemes 3:1-7) Evri nogud fasin blong rabis wol ya oli joen long tang we i no save stap kwaet. Tang i gat fol from ol nogud toktok blong givim gyaman wetnes, fasin blong tok nogud blong spolem narafala, mo talem ol gyaman toktok blong spolem nem blong narafala. (Aesea 5:20; Matyu 15:18-20) Mo taem wan man we i no bos long tang blong hem, i sakem ol tok kros no ol gyaman tok, tang blong hem i fulap wetem posen we i save kilim man i ded.—Ol Sam 140:3; Rom 3:13; Jemes 3:8.
14. ?Ol Kristin oli no mas gat wanem tufala fasin blong toktok?
14 Olsem Jemes i soem, bambae i no stret blong yumi ‘presem Jeova’ wetem ol gudfala toktok be semtaem yumi yusum tang blong yumi blong “tok nogud long ol narafala man” wetem ol tok we i daonem olgeta. !I nogud blong singsing presem God long ol miting mo biaen yumi tok nogud long ol fren blong yumi we oli man blong bilif! Wora mo solwora tufala i no save kamaot long wan hol blong springwora. Sipos yumi stap mekem wok blong Jeova, i stret nomo we ol narafala man oli tingting se yumi mas talem ol samting we oli stret be i no ol rabis tok. I gud yumi sakemaot ol nogud tok mo traem talem ol samting we bambae oli leftemap ol brata sista blong yumi mo bildimap olgeta long saed blong speret.—Jemes 3:9-12.
Stret Fasin Mo Ol Fasin Blong Yumi
15. ?From wanem i impoten blong no folem ol kruked mo gyaman fasin?
15 From we tingting mo toktok blong ol Kristin i mas klin, ?nao olsem wanem long ol fasin blong yumi? Wan rod nomo blong mekem Jeova i glad long yumi, hemia blong stap klin long ol fasin blong yumi. I no gat wan man blong Jeova we i save lego stret fasin, nao hem i folem kruked mo gyaman fasin, mo i gat tingting se bambae God i save akseptem ol samting ya. No gat. Proveb 3:32 i talem se: “Jeova i no laekem nating man we ol rod blong hem oli kruked, be Hem i laekem tumas man we i gat stret fasin.” Sipos yumi tinghae long fasin fren blong yumi wetem Jeova, nao ol gudfala toktok ya oli mas blokem yumi blong yumi no mekem ol nogud plan blong spolem man no yumi mekem eni samting we i no stret. !Yes, wan long ol seven samting we Jeova i no laekem nating, hemia wan “hat we i wokem ol rabis plan”! (Proveb 6:16-19) From samting ya, i gud yumi no mekem ol fasin olsem, be yumi mekem ol fasin we oli stret, blong givhan long ol man mo leftemap nem blong Papa blong yumi long heven.
16. ?From wanem ol Kristin oli no mas mekem ol fasin blong man we i gat tu tingting?
16 Yumi mas gat trufala fasin blong yumi save soem stret fasin. (Hibrus 13:18) Man we i gat tu tingting, i olsem se ol fasin blong hem oli no laenap wetem ol toktok blong hem, man ya i no gat stret fasin. Grik tok ya we oli tanem i kam “tu tingting” (hy·po·kri·tesʹ) i min se “man we i ansa” mo tu i minim wan man we i plei long drama. Ol man Gris mo ol man Rom we oli stap plei long drama, oli stap werem ol gyaman fes, olsemia nao oli yusum tok ya olsem wan pija tok long wan man we i stap gyaman long fasin blong hem. Olgeta ya we oli gat tu tingting oli “man we oli no bilif.” (Lukluk Luk 12:46 mo Matyu 24:50, 51.) Fasin blong gat tu tingting (hy·poʹkri·sis) i save minim tu se nogud fasin mo fasin blong mekem gyaman trik. (Matyu 22:18; Mak 12:15; Luk 20:23) !Sore tumas taem yumi trastem wan man, be man ya i stap smael, i stap leftemap yumi, mo mekem ol fasin we oli blong gyaman nomo! Be long wan saed, yumi haremgud taem yumi save se yumi stap fren wetem ol Kristin we yumi save trastem olgeta. Mo God bambae i blesem yumi from we yumi stap mekem fasin we i stret mo yumi no gat tu tingting. God i stap laekem olgeta ya we oli ‘laekem ol brata blong olgeta long fasin we i stret’ mo we ‘bilif blong olgeta i no blong gyaman.’—1 Pita 1:22; 1 Timote 1:5.
Stret Fasin Hem i Gud Fasin
17, 18. ?Olsem wanem long fasin blong yumi long ol narafala man, taem yumi stap soem gud fasin we i frut blong speret?
17 Sipos yumi joenem stret fasin long bilif blong yumi, bambae yumi traehad blong blokem tingting, toktok, mo no mekem ol samting we God i no laekem. Be, blong yumi soem Kristin stret fasin yumi mas mekem ol gudfala fasin tu. Yes, mining blong stret fasin i olsem gud fasin. Mo gud fasin hem i wan frut blong tabu speret blong Jeova, hem i no kamaot from we man nomo i wantem olsem. (Galesia 5:22, 23) Taem yumi soem gud fasin we i frut blong speret, bambae fasin ya i pusum yumi blong gat gudfala tingting long ol narafala man, mo tokbaot ol gudfala fasin blong olgeta nating se oli no stretgud olgeta. ?Oli stap holemstrong wok blong Jeova long plante yia finis? Ale yumi mas soem respek long olgeta mo toktokgud long saed blong olgeta mo wok we oli stap mekem long God. Papa blong yumi long heven i luksave lav we olgeta ya oli soemaot long nem blong hem mo ol gudfala wok we i kamaot from bilif blong olgeta, mo yumi mas mekem i sem mak.—Nehemaea 13:31b; Hibrus 6:10.
18 Stret fasin i mekem yumi gat longfala tingting, yumi kasem save, mo yumi sore long narafala man. Sipos wan man blong wosip long Jeova i harem nogud from wari no tingting blong hem i foldaon, bambae yumi toktok gud long hem blong leftemap tingting blong hem mo traem blong givhan long hem blong hem i haremgud, olsem gudfala Papa blong yumi long heven i stap givhan blong mekem yumi haremgud. (2 Korin 1:3, 4; 1 Tesalonaeka 5:14) Yumi sore long olgeta ya we oli stap krae, maet from we wan famle blong olgeta i ded. Sipos yumi save mekem hem i haremgud smol, bambae yumi mekem, from we tingting blong mekem stret fasin i pusum yumi blong mekem ol gudfala fasin blong givhan long ol man.
19. ?Sipos yumi gat gudfala, tingting, toktok mo fasin, bambae oli narafala man oli mekem wanem long yumi?
19 Olsem we yumi stap presem Jeova taem yumi toktok gud long saed blong hem, sem mak ol narafala man oli save presem yumi sipos, tingting, toktok, mo fasin blong yumi oli stret. (Ol Sam 145:10) Wan waes proveb i talem se: “Wan stret man bambae i kasem plante blesing, be maot blong ol rabis man, hem i kavremap raf fasin.” (Proveb 10:6) Wan rabis man mo wan man blong faet, i no gat stret fasin we bambae i mekem se hem i fren wetem ol narafala. Hem i kasem frut blong ol fasin we hem i stap mekem, from we ol man oli no save presem hem long toktok blong olgeta. (Galesia 6:7) !I moa gud long ol man blong Jeova we oli tingting, toktok, mo mekem ol samting long fasin we oli stret! Ol man ya blong Jeova oli winim lav, fasin blong trastem man, mo respek blong ol narafala man we oli stap presem olgeta mo toktok gud long saed blong olgeta. Mo tu stret fasin blong olgeta i mekem se oli kasem rij blesing blong Jeova.—Proveb 10:22.[15]
20. ?Ol gudfala tingting, toktok, mo fasin oli save mekem wanem insaed long wan kongregesen blong ol man blong Jeova?
20 Ol gudfala tingting, toktok, mo ol fasin oli rili save givhan long wan kongregesen blong ol man blong Jeova. Taem ol narafala man blong bilif oli gat tingting we i kaengud blong respektem olgeta wanwan, fasin blong laekem tumas ol brata bambae i gru long medel blong olgeta. (Jon 13:34, 35) Ol gudfala toktok, olsem trufala fasin blong presem mo leftemap tingting blong narafala, i givim wan gudfala filing blong wok tugeta mo joengud. (Ol Sam 133:1-3) Mo ol gudfala stret fasin we oli mekem man i haremgud long hat blong hem oli pulum ol narafala blong oli mekem olsem tu. Antap moa, fasin blong folem ol gudfala Kristin fasin bambae i mekem Papa blong yumi long heven, Jeova, we hem i gat stret fasin, i glad long yumi mo bambae i blesem yumi. Taswe i gud yumi traehad blong lesin long ol gudfala promes blong God wetem bilif. Mo tru ya yumi mas traehad blong joenem stret fasin long bilif blong yumi.
?Wanem Ol Ansa Blong Yu?
◻ ?Olsem wanem yu save talem mining blong “stret fasin,” mo from wanem ol man we oli no stretgud olgeta oli save gat stret fasin?
◻ ?Stret fasin i nidim wanem kaen tingting?
◻ ?Olsem wanem stret fasin i mas gat paoa long ol toktok blong yumi?
◻ ?Stret fasin i mas gat wanem paoa long ol fasin blong yumi?
◻ ?Wanem sam blesing yumi save kasem from stret fasin?
[Tok Blong Pija Long Pej 21]
Wora mo solwora tufala i no save kamaot long sem hol blong springwora, from samting ya i stret nomo we ol man oli gat tingting se ol man blong Jeova oli mas talem ol samting nomo we oli stret