Talemaot Gud Nyus—Yumi Seremaot Ol Magasin
1 Tufala magasin Wajtaoa mo Wekap! i pulum plante man blong mekem gudfala fasin. I no gat wan narafala magasin bakegen we i mekem olsem samtaem. Evri namba oli tokbaot ol samting blong speret we i naf blong givim laef long man. Ol man we oli raetem tufala magasin ya oli mekem bigfala wok blong lukaot sam gudfala tok fastaem, mo oli traehad blong faenem olgeta vas we oli laenap wetem ol tok ya. Samting ya i mekem se mesej blong trutok i stap strong long tingting blong yumi, mo i godaon long hat blong yumi tu.
2 Wajtaoa i talemaot mining blong ol tijing blong Baebol mo hem i givhan long yumi blong luksave ol profet tok we oli stap kamtru. Hem i pulum olgeta we oli hanggri long saed blong speret blong oli jenisim tingting blong olgeta, ale oli mekem ol fasin we i stret gud long nyufala laef blong olgeta. (Rom 12:2; Efes. 4:22–24) Ol man we oli ridim magasin Wekap! oli tingtinggud long ol samting we i stap kamaot long wol tede. Magasin ya i pulum olgeta blong mekem olsem. Ol gudfala pija blong hem oli soemaot gud ol nambawan samting we God i mekem. From ol pija ya, ol man we oli stap ridim ol magasin ya oli intres moa long promes blong nyufala wol we God i mekem. Mo oli gat bigfala tangkyu long God we i wokem olgeta from we hem i laekem tumas ol man.
OLI DEFREN LONG OL MAGASIN WE YUMI SAVE PEM LONG STOA
3 Ol magasin we yumi save faenem long ol stoa tede oli no talemaot rod blong kasem wan gudfala laef long wol ya. Oli no givim hop long fyuja, mo oli no soemaot rod blong kasem laef blong olwe. Wok blong ol magasin ya i blong soemaot long ol man ol samting blong wol ya nomo. Tru, ol magasin ya oli defren tumas long Wajtaoa mo Wekap!.—1 Jon 2:15–17.
4 Mifala i bilif we yufala i gat bigfala tangkyu long evri namba blong Wajtaoa mo Wekap! we yufala i kasem, from we i olsem we ol magasin ya oli smel gud long naesfala senta blong trutok we “slef we i stret mo waes” i givim long yumi. (Luk 12:42) ?Be yumi save mekem wanem blong seremaot plante moa magasin? ?Sipos yumi gohed long rod ya, olsem wanem yumi save halpem ol man blong oli kasem gudfala frut long laef blong ol?
YUMI MEKEM WOK BLONG YUMI
5 Bifo we yumi go pulum tingting blong ol narafala blong oli ridim ol magasin blong yumi, i impoten tumas we fastaem yumi savegud wanem i stap insaed long olgeta magasin ya wanwan. Samting ya i min se yumi mas ridim evri namba wanwan bifo we yumi go seremaot olgeta long wok blong prij. Taem yumi kasem save finis long ol samting we i stap long ol magasin ya, yumi save go long evri haos wanwan, mo yumi save tekem evri jans blong talemaot trutok.
6 Mo tu, sipos yumi karem oltaem ol nyufala magasin taem yumi go pem ol samting long stoa, taem we yumi tekem bas, long ples blong wok, no weples yumi go, bambae yumi save tekem evri jans blong givim wetnes. Sipos yumi jusum gud wan fas tok we i stap long buk Reasoning, mo yumi joenem tok ya wetem wan haf blong wan magasin we yumi holem, bambae ol man oli intres blong ridim ol magasin blong yumi.
7 I tru se taem we yumi seremaot ol magasin, yumi tekem smoltaem nomo long ol man. Be samting ya i no min se yumi mas spenem wan menet nomo wetem wan man sipos hem i rere blong toktok moa wetem yumi. Yumi mas wok had blong save sipos man ya i intres long mesej we yumi stap talem long hem no sipos hem i wantem ridim ol magasin nomo. Sipos man ya i askem sam kwestin, yumi mas traehad oltaem blong yusum Baebol mo buk Reasoning blong ansa long ol kwestin we hem i askem. Sipos yumi stap rere blong talemaot bilif blong yumi taem ol man oli putum kwestin, bambae yumi save kasem plante blesing from.—1 Pita 3:15.
8 Sipos yumi toktok wetem wan man, nao hem i agri blong ridim ol magasin we yumi soemaot long hem, yumi save tokbaot wok we yumi stap mekem. Yumi save talem long hem se ol magasin blong yumi oli kamaot wan taem long wan manis (tu taem long wan manis long Engglis mo Franis) mo we yumi yusum ol magasin ya blong tijim ol man long evri ples long wol long saed blong Baebol. Poen ya i klia nomo long fas tok we i stap long pej 2 blong Wajtaoa mo long pej 4 blong Wekap! Insaed long evri magasin long engglis mo franis, Sosaete i talemaot wanem tok bambae i kamaot long nekiswan. Taswe, yumi save askem sam kwestin we oli laenap wetem ol poen we i no longtaem bambae oli kamaot long nekis magasin ya. Maet man ya bambae i intres mo i wantem kasem namba ya taem we hem i kamaot, ale long fasin olsem yumi save kasem wan rod blong magasin.
9 En blong wol ya i stap kam kolosap moa oltaem, taswe yumi mas traehad blong givhan long ol man we oli intres blong oli kamaot long Bigfala Babilon mo blong oli joen long trutok. (Rev. 18:4) Tufala magasin Wajtaoa mo Wekap!, tufala i impoten tumas. Yes, Sosaete i stap yusum tufala tul ya nao long bigfala wok blong tijim ol man long Baebol raonabaot long wol. Yumi save talem tangkyu long Jeova from we hem i givim ol magasin ya long yumi, nao yumi gat jans blong yusum olgeta long wok blong prij. Mo taem yumi tingtinggud mo yumi hadwok blong seremaot olgeta, yumi save prea long God blong hem i blesem yumi.