Talemaot Gud Nyus—Wetem Ol Traket Mo Ol Pepa Blong Singaot Ol Man
1 Wan man i raet long Sosaete mo i talem se: “Mi mi pas long fored blong wan woman we i givim wan traket blong Baebol long mi. Mi ridim: ‘Laef Long Pis Blong Nyufala Wol.’ Bifo we mi ridim hem, tingting blong mi i slak, be biaen mi mi kam strong bakegen mo tingting blong mi i stap long pis nomo.” Man ya i wantem kasem save long sam moa samting bakegen: “Mi mi stap wet long yufala blong yufala i sanem buk ya ‘Yu Save Laef Foreva Long Paradaes’ i kam long mi.”
2 Yes, plante long olgeta we naoia oli mekem wosip long Jeova oli intres long trutok from we oli luk ol traket mo oli ridim mesej blong Baebol we i stap long baksaed blong ol pepa blong singaot ol man i kam long miting. ?Olsem wanem long yu? ?Taem yu yu stap long minista wok, yu yu yusum ol traket mo ol pepa blong singaot ol man? Plante oli mekem olsem. Long Bruklin nomo, oli prentem moa long 122 milyan traket Laef Long Pis Blong Nyufala Wol, mo kolosap 250 milyan kopi blong ol trifala narafala traket, ?From Wanem Yu Yu Save Bilif Long Baebol?, ?Wanem Bilif Blong Ol Wetnes Blong Jeova? mo ?Olsem Wanem Long Ol Fren Blong Yumi We Oli Ded? Antap bakegen, las yia oli prentem moa long 12 milyan pepa blong singaot ol man long Yunaeted Stet nomo.
3 Ol mesej ya oli sot nomo, be ol tok blong Baebol we i stap insaed oli gat bigfala paoa. Yumi no mas ting se oli nating nomo. (Hib. 4:12; ridim Sek. 4:10; Jem. 3:4, 5) Wan Wetnes blong Amerika i raetem ol tok ya: “Mi mi ridim plante traket we Sosaete Watch Tower i prentem, mo long fasin ya nao mi mi kam long trutok.” Hem i talem se: “Long wol we yumi laef long hem, evri samting oli go kwik nomo mo i no gat tumas man we oli agri blong tekem taem blong rid. Be ol traket ya oli longfala inaf blong talemaot wan impoten mesej, mo oli sot inaf blong mekem se man i no les blong ridim olgeta.”
4 From plante risen, ol man oli hafhaf lelebet taem yumi seremaot ol buk long olgeta. Be plante oli agri nomo blong tekem wan traket. Wan seket elda i talem se taem hem i go prij, hem i tekem wan pepa plastik mo hem i fulumap ol traket long hem mo long ol doa, hem i askem long ol man blong jusum traket ya we oli wantem. Hem i talem tu se: “Traket ya we ol man oli askem tumas, hem i ?Wanem Bilif Blong Ol Wetnes Blong Jeova?”
TAEM YUMI MITIM WAN MAN FASTAEM
5 Sam pablisa oli talem se i gud blong givim wan traket no wan pepa blong singaot ol man, blong statem wan toktok. Taswe, yumi save yusum rod ya blong mekem se wan we i no wantem tumas blong openem doa blong hem long yumi, hem i openem. Sipos yumi soemaot long hem program blong ol miting long pepa blong singaot ol man, bambae yumi save gat wan toktok long saed blong wok mo plan blong yumi.
6 Sipos yumi luk we wan man i gat plante wok blong mekem no hem i trabol tumas, maet yumi save yusum ol traket blong givhan long hem. Wan woman i harem nogud tumas from we hem i lusum wan famle blong hem, be traket long saed blong ol dedman i givhan bigwan long hem. Ale hem i raet long Sosaete blong askem sam moa advaes long saed ya. Taem i no gat man long haos yumi save livim wan traket, be wan samting nomo, traket ya ol man we oli pas long rod oli no mas luk hem.
LONG WAN VISIT
7 Taem yu yu go luk wan man we i bin intres lelebet fastaem, yu save talem long hem se: “Gud moning [nem blong man ya]. Mi mi glad tumas blong faenem yu long haos blong yu. Lastaem we yumi toktok, mi mi glad tumas from we yu tekem taem blong tokbaot Baebol. Mi mi glad blong talemaot sam moa poen bakegen we long tingting blong mi, mi ting se oli gudwan tumas. Olgeta oli stap long traket ya Laef Long Pis Blong Nyufala Wol. Maet yu yu rimemba yet, lastaem, yumitu i tokbaot promes blong Baebol se bambae olgeta man oli gat tru pis blong olwe. Taem plante man oli ridim ol promes ya, oli gat tingting blong go kasem pis long heven. Be traem tingbaot wanem Baebol i talem long Sam 37:29: Bambae yumi save kasem plante blesing long wol. [Ridim vas ya, mo soemaot long man ya weples vas ya i stap long traket.] ?Promes ya blong God i gudwan tumas, a? [Givim sam moa tok long sam haf blong traket.] Yu yu save faenem sam gudfala vas bakegen we oli stap long traket ya, mo yu yu save harem gud taem bambae yu ridim olgeta. Nekis taem we bambae mi kam, maet yumi save ridim samfala vas ya olsem we yumi mekem tede.”
8 Tru tumas, ol traket mo ol pepa blong singaot ol man long miting oli olsem presen we Jeova i givim long yumi. !Taswe, yumi mas yusum gud ol gudfala tul ya blong mekem gud wok long minista wok, ale bambae yumi presem Jeova mo yumi kasem blesing blong olwe!—Prov. 22:29.