Ol Buk Stadi
Haf 2: Yumi Mas Rere Mo Ansa
1 Tok blong Jeova i talem se man we i kasem waes mo fasin luksave i save harem gud, from we bambae i kasem plante gudfala samting from. (Prov. 3:13, 14, 16-18) Waes long saed blong speret i gud tumas, mo i save sevem laef blong man. Wan Kristin we i waes, hem i save yusum gud ol save long Tok blong God. Samting ya i givhan long hem long wosip, blong winim ol trabol evri dei, mo blong mekem ol gudfala disisin long saed blong ol mak we hem i wantem kasem long laef blong hem.
2 Buk Stadi i blong givhan long yumi blong stadi mo mekem Tok blong God i wok long laef blong yumi. From samting ya, bambae yumi kasem moa save long saed blong speret, mo fasin waes blong yumi i kam bigwan moa. Taswe yumi mas go long Buk Stadi oltaem. Hem i mas haf long program blong yumi wanwan, blong kasem waes.—Prov. 4:7-9.
RERE GUD FASTAEM
3 Long faswan handred yia, samfala long kongregesen oli no traehad blong lanem trutok mo blong kasem save long ol nyufala trutok. Olgeta oli stap olsem ol smosmol pikinini long saed blong save blong Kraes. Taswe oli no save kasem ol tok blong stret fasin. (Hib. 5:11-13) Aposol Pol i givim advaes long kongregesen se oli mas traehad blong “kam bigman long Kraes.” (Hib. 6:1) I klia nomo se hemia i no minim we yumi lesin long ol narafala nomo, taem oli storeyan long trutok. Yumi mas tingting mo stadi blong wekemap yumi, ‘blong mekem tingting blong yumi i stret.’ Mo yumi mas traehad.—2 Pita 3:1, 2; Luk 13:24.
4 Sipos yumi rere gud long Buk Stadi, yumi kasem save moa, mo yumi tinghae moa long ol save ya. Be blong rere gud, i no min se yumi ridim ol haf mo makem ol ansa long ol kwestin nomo. Blong harem gud long ol save ya, yumi mas tingtinggud long mining blong hem mo olsem wanem i save givhan long yumi wanwan. Jekemap ol vas long stadi, mo traem tingbaot olsem wanem oli joen long ol haf long buk. Jekemap mining blong ol bigfala wod long diksonari.
5 Samfala oli faenem se i hadwok blong stadi, mo i tekem taem tu. !Be hem i save givhan bigwan long yu! Pol i tokbaot gudfala frut blong dip stadi, i se: “Be strong kakae i blong olgeta we oli kam bigman finis, we oli stap traehad longtaem finis, nao oli kam we oli naf blong jusumaot wanem fasin i gud mo wanem fasin i nogud.” (Hib. 5:14) Stadi wanwan i givhan long yumi blong kam bigman long saed blong speret. Olsem nao, taem yumi mekem wan disisin, yumi save jusum stret rod.
ANSA
6 Yumi mas traehad blong ansa long evri miting. ?From wanem? Taem yumi ansa i olsem we yumi talemaot bilif blong yumi. Be i no hemia nomo. Ol ansa we yumi rerem gud fastaem, oli leftemap tingting blong ol brata mo sista blong yumi. (Rom 10:10; Hib. 10:23-25) Mo tu, taem yumi ansa long Buk Stadi, hemia wan bigfala samting we i givhan long yumi blong gru long saed blong speret. Taem ol olfala long trutok, ol pikinini, mo olgeta we oli jes kasem trutok oli ansa oltaem, grup i harem gud long ol defdefren gudfala ansa blong olgeta. Samting ya i tijim yumi evriwan mo i mekem yumi harem gud.—km 4/86 pej 3.
7 Sipos yumi traehad blong rere gud long Buk Stadi, kam oltaem long hem, mo ansa long hem, bambae yumi kasem waes. Mo bambae yumi “faenem save blong God.”—Prov. 2:4, 5.