Talemaot Gud Nyus—Long Teritori We Yumi Stap Wokem Evritaem
1 Taem yumi mas prij long sem teritori evritaem, samting ya i save traem yumi. ?Olsem wanem yumi save mekem we toktok blong yumi i pulum man mo i wekemap tingting blong hem? ?Yumi save talem wanem long ol man we i luk olsem se oli rili no intres long trutok? ?Yumi save ansa olsem wanem long ol man we oli talem se oli taed long yumi?
POSITIV TINGTING
2 Maet sam long yufala i ting se i nogud blong wokem sem teritori evritaem. Be tingting ya i no tru. Teritori we yumi wokem gud mo yumi wok plante taem long hem i karem moa frut i bitim teritori we yumi wokem samtaem nomo. Taswe sipos yumi holem rong tingting ya, hemia nao faswan samting we yumi mas winim. Yumi mas givim fulap jans long ol man blong harem mesej blong Kingdom. From we yumi gobak plante taem long ol man mo oli no wantem harem trutok yet, maet yumi ting se Jeova i jajem olgeta finis. Be tingting ya i rong bakegen.
3 Yumi mas traehad blong putum yumi long ples blong ol man we yumi storeyan wetem olgeta. Samting ya i impoten moa long teritori we yumi wokem evritaem. Sipos storeyan blong yumi i stret long ol nid blong ol man long ples blong yumi, ating yumi save pulum sam man we fastaem oli no lesin long yumi. ?Yu yu stap lesin long ol nyus long wol? ?Yu yu rere blong soemaot long ol man olsem wanem mesej blong Baebol i save givhan long olgeta blong winim ol trabol we oli fesem?
JENISIM FAS TOK
4 I gud blong jenisim fas tok blong yumi long ol teritori we yumi wokem evritaem. Fastaem, maet yumi yusum wan traket long fas tok blong yumi. Nekis taem, yumi save yusum wan long ol 40 fas tok long pej 9 kasem 15 long Reasoning buk, mo yumi save jenisim lelebet blong joen wetem ol nid blong ol man long ples blong yumi. Ating yu save talem long wan man se yu visitim finis olgeta man long ples blong hem i no longtaem. Olsem nao, i hadwok blong bambae man ya i talem samting ya bakegen blong finisim storeyan blong yu. Ating lastaem yu visitim man ya, yu yu bin makem wan gudfala tingting we hem i talemaot long yu. Sipos i olsem, nekis taem yu save yusum samting ya blong mekem storeyan i go moa.
5 Yumi mas tingbaot ol man olsem Jeova i stap tingbaot ol man. Yumi mas soemaot se yumi stil kea long olgeta we lastaem oli no wantem harem mesej blong trutok. Long taem bifo, nating we ol man oli no wantem harem mesej blong ol man blong Jeova, be Jeova i sanem ol man blong hem blong traem pulum olgeta bakegen, bakegen, bakegen. (2 Kron. 36:15; Jer. 7:13) Plante man we fastaem oli talem se oli no intres long mesej blong yumi, naoia oli brata no sista blong yumi. Plante man we oli agensem trutok strong bifo, oli jenisim tingting, mo naoia oli stap long trutok. Naoia oli talem tangkyu tumas we wan man i soemaot longfala tingting long olgeta, we hem i visitim olgeta bakegen evritaem blong talemaot gud nyus.
RAETEMDAON
6 I impoten tumas we yumi yusum ol pepa blong prij. Sipos yumi raetemdaon ol haos we oli no gat man, nao yumi gobak bakegen long ol haos ya, samting ya i save mekem se yumi faenem olgeta man long teritori blong yumi, mo yumi no finisim teritori blong yumi kwiktaem tumas. Mo sam pablisa we oli prij long wiken nomo, oli raetemdaon ol haos we i no gat man, nao oli givim pepa ya long wan pablisa we i prij long ol dei blong wik. Hemia i wan gudfala rod blong traem faenem man blong haos long wan defren dei. Mo hem i wan gudfala rod blong faenem ol man we oli wok mo oli stap long haos samtaem nomo. Wajtaoa (Engglis mo Franis) blong Julae 15, 1988, pej 15 kasem 20, i talem sam narafala rod bakegen.
7 Jeova nomo i save mak we yumi mas kasem blong traem faenem ol man we oli wantem harem trutok. Bambae yumi gohed blong folem lida blong yumi Kraes. Bambae yumi gohed blong obei long God, from we yumi save se bambae hem i finisim wok ya long stret taem blong hem.—Esik. 9:11.