Ol Buk Stadi
Haf 5: Visit Blong Elda We i Lukaot Long Wok Blong Prij
1 Elda we i lukaot long wok blong prij i mas wan man blong talemaot gud nyus mo wan tija. Hem i gat impoten wok blong halpem kongregesen blong talemaot mo tijim gud nyus long teritori blong hem. (Mak 13:10) Taem hem i tinghevi long responsabiliti ya blong hem mo taem evriwan i wok gud wetem hem, bambae ol pablisa oli save kam gud moa long wok blong prij mo oli wokem gud teritori blong olgeta.
2 Elda we i lukaot long wok blong prij i tingting blong mekem wok blong prij i gru moa. Hem i yusum ol Buk Stadi blong mekem olsem. I stret nomo blong elda ya i lukaot long wan Buk Stadi. Be wantaem long wan manis maet narafala brata we i givhan long hem i lukaot long Buk Stadi blong hem, taem hem i go visitim ol narafala grup.
3 Rere Blong Mekem Visit: Wan wik bifo we hem i mekem visit long wan grup, elda ya i mas jekem ol kad blong ol pablisa long grup ya. Hem i mas toktok fastaem wetem brata we i lukaot long grup ya blong jekem bakegen wok blong ol pablisa insaed long grup ya. Brata we i lukaot long grup i save talemaot sam trabol no sam nid we oli no stap long ol kad blong pablisa. Brata we i lukaot long stadi ya i mas tingbaot we stadi i blong 45 menet nomo mo i letem 15 menet blong elda i tokbaot wok blong prij.
4 Tok blong hem i blong leftemap mo pulum ol man blong oli gat fasin tangkyu long wok blong prij. Sipos ol pablisa oli nidim help long wok blong prij, elda ya i save soemaot sam rod we oli save folem blong kam gud moa long hem. Ol tok blong hem oli mas stret mo leftemap tingting blong ol pablisa. I no blong mekem olgeta i sem no blong daonem olgeta wetem ol nogud toktok, from we fasin olsem i save daonem visit ya blong hem. Tok blong hem i blong leftemap tingting blong ol pablisa blong oli kam gud moa long wok blong prij.
5 Elda ya i save traem blong toktok wetem ol wanwan brata mo sista sipos i gat taem blong mekem. Hem i save mekem plan blong wok wetem sam long olgeta long wok blong prij. Taem oli go long ol haos wanwan, hem i save talemaot sam rod we wan pablisa i save yusum blong kam gud moa long wok blong prij. Hem i no mas tok strong long pablisa ya. Hem i mas tingbaot se hem i wantem givhan long hem. Hem i save askem blong go wetem wan pablisa long ol visit mo ol Baebol stadi. Sipos i gat pablisa long grup ya we i nidim help, hem i save go luk hem long dei blong wik blong halpem hem. Ale hem i save tokbaot wetem brata we i lukaot long grup, long ol samting we hem i givhan long pablisa ya long hem. Olgeta we oli no moa wok strong long wok blong prij oli harem gud long ol visit olsem.
6 Miting Blong Prij: Elda ya nao i mekem ol miting blong prij long wik we hem i visitim wan grup blong Buk Stadi. Oli mas stat long stret taem. Hem i no mas wet sipos i no gat plante pablisa i kam. Miting ya i mas stap long 10 no 15 menet nomo. I no nid blong oli mas lukluk Vas Blong Dei. Bifo we grup i goaot, evriwan i mas save se oli wok wetem hu mo oli wok long weples. (1 Korin 14:33, 40) Elda ya i mas talem long olgeta blong oli go stret long teritori blong prij mo oli no lusum taem.
7 Ol visit we elda ya i stap mekem long ol grup stadi i save givim blesing long kongregesen. Taem yumi wok gud wetem hem long visit blong hem, wok blong prij blong yumi i no fasfas mo wok i save karem frut. Samting ya i save mekem hem i glad long wok blong hem. (Hib. 13:17) Mo bambae yumi save hivimap ol man we oli olsem sipsip. Bambae yumi glad se yumi stap mekem wok ya we God i givim long yumi. Yumi stap prij long olgeta man we oli wantem harem yumi.—Aes. 61:1, 2; Esik. 9:11; Jon 17:26.