Halpem Ol Narafala Blong Kasem Save Long Pikinini Blong God, Jisas Kraes
1 Desemba i wan manis we bighaf blong ol man we oli talem se oli Kristin oli tingbaot Jisas moa bitim ol narafala taem blong yia. Taswe, hem i wan gudfala manis blong seremaot buk ya Man We i Hae Moa Long Olgeta Man. From we hemia wan gudfala buk, yumi mas luksave sipos man blong haos i intres tru blong lanem moa long saed blong Pikinini blong God bifo yumi askem hem blong karem buk. ?Olsem wanem yumi save mekem samting ya?
2 Traem go stret long wan storeyan we i stanap long Baebol we i pulum tingting i go long Jisas.
Afta we yu talem halo long man blong haos, maet yu save talem wan samting olsem hemia:
◼ “Tede mifala i stap askem long ol man raonabaot long mifala wanem tingting blong olgeta taem oli ridim long Baebol blong olgeta long saed blong laef we i no save finis. [Letem man i ansa] Samting ya i impoten tumas from we Baebol i tokbaot samting ya kolosap 40 taem. ?Laef olsem i save minim wanem long yumi? Makem wanem Revelesen 21:4 i talem. [Ridim.] ?Yu makem wanem hem i promes long hem? [Letem man i ansa.] ?Olsem wanem yumi save kasem laef we i no save finis?” Ridim Jon 17:3, mo makem nid blong kasem save long God mo long Pikinini blong hem, Jisas Kraes. Sipos man blong haos i soem sam intres, soem buk ya Man We i Hae Moa long hem, yusum smol stampa tok long fastok blong buk blong pulum intres blong man moa.
3 Sipos man blong haos i no wantem karem buk, yu save yusum ol nyufala namba blong Wajtaoa mo Wekap! no traket ya ?Wol Bambae i Lus No i Stap? Pulum tingting long wan no tu stret poen long buk we yu seremaot. Talem long hem se bambae yu glad blong kambak long wan taem we i stret blong gohed tokbaot poen ya wetem hem.
4 Sipos i luk olsem se man blong haos i bisi, maet i moa waes blong mekem storeyan blong yu antap i sot. Maet ol nyufala pablisa tu oli save faenem i moa isi blong yusum fasin blong storeyan ya we i kam biaen.
Afta we yumi talem nem blong yumi, yumi save talem se:
◼ “Tede mifala i stap askem long ol man raonabaot long mifala wanem tingting blong olgeta taem oli ridim long Baebol blong olgeta long saed blong kasem laef we i no save finis. Eksampel, makem wanem Jisas i talem long Jon 17:3. [Ridim.] Blong halpem ol man blong lanem moa long saed long Jisas mo wanem hem i bin tijim oli bin prentem buk ya.” Openem buk ya Man We i Hae Moa long sam long ol naesfala pija blong hem. Openem i go long fastok blong buk, mo ridim seken paragraf aninit long stampa tok ya “Stadi Long Laef Blong Hem i Save Givhan Long Yumi.” Yu no fraet blong askem hem blong karem buk.
5 Sipos yu seremaot buk, putum fandesen blong wan Baebol stadi taem yu askem hem sipos bambae hem i glad blong storeyan wetem yu long faswan japta, “Tufala Mesej We i Kamaot Long Heven,” long taem ya nomo no long wan visit bakegen we yu mekem afta sam dei i pas. I no nid blong talem long man blong haos hamas taem stret bambae yufala i yusum long nekis visit, jes talem nomo se long sam menet nomo, hem i save lanem plante gudfala save long saed blong Jisas Kraes long Tok blong God, Baebol.
6 Yes, evriwan long yumi i mas yusum taem ya blong holede blong ol man blong wol blong pulum tingting long trutok long saed blong Pikinini blong God, Jisas Kraes, blong halpem ol narafala man blong wokbaot long rod blong laef we i no save finis.—Mat. 7:14.