Statem Baebol Stadi Long Desemba
1 Jisas i givim oda long ol disaepol blong hem blong oli kam tija blong gud nyus. (Mat. 28:19, 20) Bigfala rod we yumi yusum blong tijim ol man, hemia taem yumi mekem ol Baebol stadi. ?Yu yu stap joen long wok ya? Sipos no, ?olsem wanem yu save statem wan Baebol stadi blong yu save mekem moa long wok blong tijim ol narafala mo haremgud from?
2 Ating yumi bin livim wan kopi blong traket long man blong haos mo yumi bin promes blong gobak.
Taem yumi gobak long wan man blong haos we yumi bin livim traket ya “?Wol Bambae i Lus No i Stap?” long hem, yumi save talem se:
◼ “Taem mi kam long ples ya sam dei i pas finis, yumi bin tokbaot olsem wanem taem blong yumi tede i impoten mo se Jisas i talemaot klia wanem i stap hapen tede. Mi wantem blong spenem sam menet mo lukluk kwiktaem nomo long sam save long traket ya we mi bin livim wetem yu. Makem wanem oli talem long ples ya aninit long stampa tok ya ‘Saen.’ ” Openem traket long pej 3, mo storeyan long tu no tri faswan paragraf aninit long stampa tok ya, ridim ol vas blong Baebol we oli stap long ol haf ya, sipos i gat inaf taem. Soemaot olsem wanem profet tok blong Jisas i stap kamtru tede. Mekem plan blong gobak mo storeyan long ol narafala paragraf aninit long sem stampa tok ya. Leftemap tingting blong man blong haos blong ridim haf ya bifo we yu gobak.
3 No yu save talem samting olsem:
◼ “Lastaem we yumi bin storeyan, mi bin livim traket ya ?Wol Bambae i Lus No i Stap? wetem yu. Long taem ya yumi bin tokbaot wok blong Jisas Kraes long ol bisnes blong wol. Yumi ridim tok blong hem we i stap long Baebol long Jon 17:3. [Ridim.] From we i impoten blong yumi save long God mo Jisas sipos yumi wantem kasem laef we i no save finis, i gud blong yumi mekem wanem we yumi save mekem naoia blong kasem save ya. Taem Jisas i stap long wol, hem i soemaot plante gudfala fasin blong God. ?Yu no ting se i stret nomo se moa yumi kasem save long Jisas mo minista wok blong hem, moa yumi kasem save long saed blong Papa blong hem? [Letem man i ansa.] Makem wanem we buk ya, Man We i Hae Moa Long Olgeta Man, i talem.” Ridim faswan mo seken paragraf long pej ten blong japta 116. Soemaotgud se buk ya i gat olgeta save blong store blong ol fofala Gospel long saed blong Jisas mo i putum ol samting long stret oda. Poenemaot sam stret nem blong ol japta, ol pija, mo map we i stap long stat blong buk. Afta askem man blong karem buk.
4 Afta we yumi talem halo long man blong we i bin karem buk “Man We i Hae Moa,” yumi save talem se:
◼ “Olsem we mi bin talem long las visit blong mi, oli wokem buk ya Man We i Hae Moa, blong mekem Baebol stadi. Mi wantem soem kwiktaem nomo olsem wanem blong yusumgud.” Openem buk i go long japta 1, “Tufala Mesej We i Kamaot Long Heven.” Pulum tingting blong man blong haos i go long ol kwestin we oli raetem i stap. Ridim faswan kwestin, afta lukluk long ol paragraf we oli statem haf ya. Joenem wetem pija we i stap long seken pej. Storeyan long ol narafala kwestin we oli stap yet, mo soemaot ol ansa sipos i gat inaf taem. Bifo yu finisim visit ya, mekem plan blong gobak mo gohed long storeyan.
5 Taem yumi gat positif tingting oltaem, reregud, mo holem olgeta jans, bambae yumi naf blong statem wan Baebol stadi long Desemba.