Lukaotgud Long Tijing Blong Yu
1 Bambae nyufala program blong Tiokratik Ministri Skul i stat long Janewari 1995. ?Wanem samting i nyu long program ya? Long manis Septemba we i jes pas, yumi stat blong rid buk blong Jenesis. Long yia ya, bambae yumi finisim mo gohed wetem buk blong Eksodus mo Ol Sam. Maet sam long yumi oli neva ridim ol buk ya. Taswe yumi mas mekem plan blong ridim ol japta we oli stap long program blong wik. ?Yumi save mekem wanem moa blong lukaotgud long tijing blong yumi mo mekem blong kasem moa samting from?—1 Tim. 4:16.
2 Long nyufala yia ya, bambae yumi stadi long buk ya All Scripture Is Inspired of God and Beneficial. Buk ya i save givhan long yumi blong laekem Baebol riding moa. (Sam 119:105) Sipos yumi save ridim Engglis no Franis, ?From wanem yumi no putum wan taem blong lukluk bakegen ol haf we oli jusum long buk ya All Scripture?
3 Ol Faswan Tok We Oli Laef Mo Wekemap Intres: Oli mas mekem ol faswan tok we oli stanap long buk ya All Scripture, long wan fasin we i laef mo i wekemap tingting. Oli soemaot olsem wanem ol tok ya oli gat paoa long laef mo olsem wanem oli mekem respek long Tok blong Jeova mo ol plan blong Hem, oli kam bigwan moa. Taem oli mekem faswan tok long buk ya Joen Tugeta Long Wosip, yumi mas gat prapa kopi blong yumi mo yumi mas lesingud long faswan tok ya. Man we i givim tok ya i mas soem olsem wanem i wokgud long laef blong “gohed kwik blong kam bigman.”—Hib. 6:1, NW.
4 Baebol Riding We i Mekem Man i Tingtinggud: Ridimgud, long fasin we i soemaot stret mining mo fasin we i gat filing, hemia i wan impoten haf blong wan gudfala tijing. Antap bakegen, i no gat tumas vas blong ridim long ol haf blong Tok No.2, taswe brata we i mekem tok ya i save yusum smoltaem blong eksplenem sam poen long fastok mo lastok blong hem. Fastok ya i mas wekemap tingting blong man long ol haf we tok i stanap long hem. Oli save mekem ol man oli rere blong luksave olsem wanem ol tok ya i save i wokgud long laef blong olgeta. Taem hem i kasem lastok hem i save eksplenem sam vas mo fasin blong ona long olgeta. Hemia we i givim tok, i mas yusumgud taem we oli givim.
5 Yu save ridim moa samting long saed blong program blong skul mo long fasin blong mekem ol tok long “Program Blong Tiokratik Ministri Skul Long Yia 1995.” Yumi mas lukaotgud long ol tijing blong yumi, taem yumi lukluk bakegen ol rod blong mekem skul ya, taem yumi mekem rere ol tok blong yumi, taem yumi folem ol advaes we oli givim. Olsemia nao, yumi save kam gud moa long fasin ya blong toktok mo tij. Olgeta we oli no joen yet, be mifala i invaetem yufala blong joen long skul ya.