Soem Eksampel Long Ol Toktok Mo Fasin Blong Yu
1 Aposol Pol i talem long Timote blong soem eksampel long ol toktok mo fasin blong hem. (1 Tim. 4:12) Yumi tu, yumi mas soem eksampel long ol toktok mo fasin blong yumi, antap moa taem yumi stap prij. Samting ya i save mekem se yumi kasem hat blong olgeta we yumi mitim olgeta.
2 Yumi mas soemaot olgeta gudfala fasin, olsem respek, tingbaot narafala, kaen fasin, toktok long gud mo waes fasin. Taem yumi mekem ol samting ya, yumi soem se yumi tingbaot blong no spolem filing blong narafala from ol samting we yumi mekem. Ol gudfala fasin ya long wok blong prij oli olsem sol we yumi ademap long kakae blong mekem hem i tesgud. Sipos yumi no putum sol, nating se yumi mekem gudfala kakae, be maet i no tes gud mo maet ol man oli no wantem kakae. Sem mak nao, sipos yumi no soemaot gudfala fasin, maet ol narafala oli no laekem, mo oli no wantem lesin long mesej blong yumi.—Kol. 4:6.
3 Soem Gudfala Eksampel Long Toktok: Taem yumi stap talemaot gud nyus, i impoten blong smael mo talem halo wetem gudfala fasin fren. Taem yumi mekem man blong haos i haremgud long fastok blong yumi from we yumi tok wetem kaen fasin we i kamaot long hat, yumi soemaot long hem se yumi rili intres long hem. Taem hem i toktok, lesingud mo soem respek long hem from tingting we hem i talemaot. Taem yu yu toktok, soem waes fasin mo toktokgud.—Skelem wetem Ol Wok 6:8.
4 Sam samtaem yumi mitim wan man we hem i no wantem toktok wetem yumi, no maet hem i agensem yumi stret. ?Yumi mas mekem wanem? Pita i talem se yumi mas toktok “long kwaet fasin we i gat ona long hem.” (1 Pita 3:15; Rom 12:17, 18) Jisas i talem se sipos wan man i agensem yumi mo i no wantem mesej blong Kingdom, yumi mas jes ‘ravemaot graon long leg blong yumi.’ (Mat. 10:14) Sipos yumi soem eksampel blong gudfala fasin long taem olsem, bambae samting ya i save mekem hat blong man ya we i agens i kam sofsof.
5 Soem Gudfala Eksampel Long Ol Fasin: Taem yumi talemaot gud nyus long ol bisi rod mo ples we i gat plante man long hem, yumi mas tingbaot narafala. Yumi no mas toktok long bigfala voes tumas no long strong fasin, mo yumi no mas blokem ol man we oli stap traem blong pas. Taem yumi go long haos blong ol man we oli intres, yumi mas folem stret fasin mo mekem ol samting we man i haremgud long hem. Yumi mas soem tangkyu from kaen fasin blong olgeta blong tekem yumi long haos blong olgeta. Ol pikinini we oli folem yumi, oli mas soem respek long man blong haos mo olting blong hem, mo oli mas gat gudfala fasin mo lesin taem yumi stap storeyan. Sipos ol pikinini oli ronron olbaot mo mekem plante noes, samting ya i save mekem man blong haos i tingting nogud long yumi.—Prov. 29:15.
6 Klos mo lukluk blong yumi i mas soemaot klia long ol narafala se yumi ol man blong talemaot Tok blong God. Klos mo hea blong yumi oli no mas olbaot mo doti, no flas tumas we i bitim mak. Oltaem lukluk blong yumi i mas soem se ‘laef blong yumi i stretgud long mak blong gud nyus blong Kraes.’ (Skelem wetem Filipae 1:27.) Sipos yumi lukaotgud long klos mo hea blong yumi mo long ol samting we yumi yusum long wok blong prij, bambae yumi no givim risen long ol narafala blong foldaon, no blong faenem poen long minista wok blong yumi. (2 Kor. 6:3, 4) Eksampel blong yumi long toktok mo fasin i save mekem ol man oli lesin moa long mesej blong Kingdom, mo i save givim ona long Jeova.—1 Pita 2:12.