Yusumgud Taem We Yu Spenem Long Wok Blong Prij
1 Yumi gat fulap wok blong mekem yet, be i gat smol taem nomo i stap. (Jon 4:35; 1 Kor. 7:29) Sipos yumi plan gud fastaem, bambae yumi save yusumgud taem we yumi spenem long wok blong prij.
2 Rere Gud Fastaem: Bifo we yu go long miting blong prij, yu mas meksua se yu karem evri buk we yu nidim, mo tingting blong yu i mas kliagud long saed blong wanem fastok we bambae yu yusum. Afta we miting blong prij i finis wetem wan prea, yu mas go stret long teritori. Olsem nao, yu mo olgeta we oli stap wetem yu, bambae yufala i save mekem moa wok, long taem we yufala i plan blong spenem long wok blong prij.
3 Sipos elda i jusum yu blong lidim miting blong prij, yu mas statem miting ya long stret taem. Miting i mas sot nomo—i no mas bitim 10 no 15 minit. Bifo we yu talem long ol brata mo sista blong go long teritori, yu mas meksua se evriwan i save se bambae oli go wea mo bambae oli wok wetem hu.
4 Taem Yu Prij: Taem we miting blong prij i finis, yu no mas tektaem tumas, yu mas go stret long teritori we bambae yu prij long hem. Sipos yu plan blong stap smoltaem nomo long teritori, i gud yu faenem transpot blong yu wan, blong mekem se ol narafala oli no nid blong aot semtaem wetem yu, oli save gohed blong prij. Maet ol narawan we yu stap long grup blong olgeta, oli wet long yu blong finisim storian blong yu, taswe i gud blong tingbaot olgeta. Taem yu tingbaot olgeta ya, i min se maet yu mas endem storian blong yu wetem man we hem i wantem agiu nomo, no maet yu mas mekem plan blong gobak luk man we i intres.—Mat. 10:11.
5 Taem yu go visitim wan man bakegen, i gud blong mekem plan blong visitim sam narafala man tu long semfala eria ya, olsem nao yu no wokbaot longwe blong go luk wan man nomo. Sipos man ya we yu bin mekem plan blong go luk hem bakegen i gat telefon, yu save ring long hem blong save sipos hem i stap no nogat. (Prov. 2:15) Sipos yu tingting blong storian longtaem wetem visit blong yu, yu save mekem plan wetem sam narafala blong oli folem yu nao oli save prij smol no mekem visit long eria ya we yu gat visit long hem.
6 Yumi stap laef long taem naoia we fulap kakae oli rere finis long garen. (Mat. 9:37, 38) Klosap nao wok ya bambae i finis. Taswe, impoten samting we yumi mas mekem, i blong yusumgud taem we yumi spenem long wok blong prij.