?Yu Yu Rere Finis From Taem Ya We Bambae Yu Kasem Wan Bigfala Sik No Aksiden?
Bigfala sik no aksiden i save kasem yumi wantaem nomo, we yumi sek long hem. (Jem. 4:14) Taswe, man we i gat gudfala tingting, bambae i mekem evri samting we hem i naf blong mekem, blong rere sipos trabol i kasem hem. (Prov. 22:3) ?Olsem wanem? ?Yu yu jusum finis wanem tritmen mo meresin we bambae yu tekem, mo yu raetemdaon desisen ya long kad blong yu? Vidio ya, Transfusion-Alternative Health Care—Meeting Patient Needs and Rights, i stap blong givhan long yu. Hemia namba tu haf long DVD ya Transfusion-Alternatives—Documentary Series. Taem yu stap wajem DVD ya, yu traem ansa long ol kwestin we oli kam biaen. Long DVD ya, i gat sam sot pija blong dokta we i stap katem man. Ol papa mama oli mas skelem sipos i gud we ol smol pikinini blong olgeta oli lukluk DVD ya no nogat.
(1) ?From wanem sam dokta mo sam narafala we oli wok long saed blong helt oli stap jekem bakegen fasin ya blong givim blad long ol sikman? (2) Talem tri bigfala sik we ol dokta oli katem man from, be oli no yusum blad. (3) ?From wanem plante dokta blong katem man mo plante narafala dokta long wol, oli glad blong givim tritmen long ol sikman be oli no yusum blad? (4) ?Ol stadi we ol hospital oli mekem i no longtaem, oli soemaot wanem long fasin blong yusum blad? (5) ?Wanem ol sik we man i save kasem sipos hem i tekem blad? (6) ?Wanem ol gudfala samting we plante dokta oli talem se oli save kamaot, taem oli yusum tritmen mo meresin we i no gat blad long hem? (7) ?Wanem i save mekem se man i sot long blad? ?Ol dokta oli save mekem wanem blong halpem man we i sot long blad? (8) ?Olsem wanem ol dokta oli save mekem se bodi blong sikman i wokem plante moa red sel? (9) ?Wanem ol rod we ol dokta oli stap yusum blong mekem se sikman i no lusum tumas blad taem oli katem hem? (10) ?Oli save yusum tritmen mo meresin we i no gat blad long hem long ol smol pikinini, mo long ol man we oli kasem bigfala aksiden no we oli mas katem olgeta hareap? (11) ?Wanem faswan rul we ol dokta oli mas folem blong lukaot gud long ol sikman?
Sam long ol tritmen we yumi luk long DVD ya, i stap long wanwan man blong jusum se bambae oli agri long olgeta, no nogat. Tingting blong olgeta wanwan we oli trenem folem Baebol, bambae i halpem olgeta blong mekem desisen ya. Taswe, yu no mas wet se yu kasem trabol ale yu jes tingting se bambae yu jusum wanem tritmen. Japta 7 blong buk ya “God i Lavem Yu,” mo ol save we oli stap long pepa we i joen wetem Kingdom Wok Blong Yumi blong Novemba 2006, bambae oli givhan long yu blong yu gat save long saed ya, mo blong yu mekem ol desisen blong yu folem ol save ya. Sipos yu yu baptaes finis, yu mas raetemdaon tritmen we yu yu jusum long DPA kad, mo yu holem kad ya wetem yu oltaem.
[Tok blong pija long pej 3]
?Yu yu jusum finis wanem tritmen mo meresin we bambae yu tekem, mo yu raetemdaon desisen ya long kad blong yu?