Yu No Mas Fraet Blong Prij Long Ol Stoa Mo Ol Ofis
1. ?From wanem yu no mas harem nogud sipos yu fraet blong prij long ol stoa mo ol ofis?
1 ?Olsem wanem? ?Yu yu fraet taem yu tingbaot se bambae yu go prij long ol stoa mo ol ofis? Sipos yes, yu no mas harem nogud. Pol i no wan man blong fraet, be Baebol i talem se hem tu i mas ‘mekem tingting blong hem i strong’ blong prij. (1 Tes. 2:2) Bambae yumi luk sam kwestin we plante long yumi oli askem, mo sam advaes we yumi save folem.
2. ?From wanem yu no mas ting se bambae ol wokman oli kros long yu?
2 ?Bambae Ol Wokman Oli Kros Sipos Mi Mi Stopem Olgeta? Long plante stoa mo ofis, ol wokman oli stap blong lukaot long ol kastoma. Taswe oli lan finis long ol man we oli kam stopem olgeta. Ating bambae oli ting se yu yu wan kastoma, taswe bambae oli toktok gud long yu. Sipos yu jenis gud, yu kaen, mo yu toktok gud long olgeta, bambae oli gat respek long yu.
3. ?Yu save mekem olsem wanem blong ol kastoma oli no kros long yu?
3 ?Bambae Mi Mas Toktok Long Fored Blong Plante Kastoma? I gud blong prij long ol stoa long taem we i no gat tumas man long olgeta, maet long moning taem oli jes open. Sipos bos i bisi, yu wet blong hem i finis bifo we yu toktok long hem. Yu storian smoltaem nomo wetem hem.
4. ?Taem yu prij long ol stoa mo ol ofis, yu save talem wanem?
4 ?Bambae Mi Talem Wanem? Sipos i gat plante wokman, i gud yu toktok wetem hemia we i bos blong olgeta. Maet yu talem se: “Mifala i kam luk yufala long ples blong wok from we i had blong faenem yufala long haos. Mi save se yu yu bisi, be bambae mi no blokem yu longtaem.” I nogud oli ting se yu yu sem mak long ol man we oli kam blong salem samting long olgeta. Taswe i moagud yu no tokbaot presen mane, maet yu tokbaot nomo sipos oli askem kwestin long saed blong mane. Maet yu askem long bos sipos yu save toktok smol wetem ol wokman, taem yu luk se i stret blong mekem olsem. Sipos wan wokman i bisi, yu save sotem storian blong yu mo givim wan traket nomo long hem. Sipos bos i no wantem se yu toktok long ol wokman, maet hem i letem yu yu putum sam buk long ples we oli dring ti long hem no ples blong spel blong olgeta.
5. ?From wanem yu no nid blong fraet taem yu prij long ol stoa mo ol ofis?
5 Jisas mo Pol, tufala i no fraet blong prij long ol bisnesman. Mo yu tu, yu no nid blong fraet. (Mat. 4:18-21; 9:9; Wok 17:17) Yu save askem long Jehova blong i givhan long yu blong yu gat kwaet tingting, mo blong yu mekem tingting blong yu i strong. (Wok 4:29) Taem yumi prij long ol stoa mo ol ofis, i defren long wok blong prij long ol haos. Long sam haos i no gat man, be long ol stoa, oltaem i gat man. From samting ya, i gud yu traem fasin ya blong prij we i save karem plante gudfala frut.