Mi Winim Hasban Blong Mi, Nating Se Mi “No Talem Wan Samting”

Mi mi bon long 1952, long Romania. Nating se mama blong mi i baptaes olsem wan Witnes, be hem i no gohed gud long trutok, taswe mi no stap go long ol Kristin miting. Mo long taem ya, Romania i stap aninit long rul blong komunis, mo ol Witnes oli no save printim ol buk mo mekem wok blong prij. Taswe stat long taem we mi bon kasem taem we mi gat 36 yia, mi mi no save se Jehova hem i hu mo se Baebol i tijim wanem. Be long 1988, taem mi laef long taon ya Satu-Mare wetem hasban blong mi, István, wan samting i hapen we i jenisim laef blong mi.

Wan Invetesen We Mi No Save Talem No Long Hem

Wan dei, mama blong mi i kam visitim mi. Mo hem i talem long mi se: “Bambae mi go visitim anti blong yu, i gud yu folem mi. Taem yumitu finis, bambae yumitu go soping.” From mi no gat wan samting blong mekem long taem ya, mi agri blong folem hem.

Taem mitufala i kamtru long haos blong anti blong mi, mi luk se oli stap mekem miting blong ol Witnes blong Jehova long haos blong hem. Long taem ya, i gat samwe naen man we oli stap. Mo mi faenemaot se mama i stap gohed gud bakegen long trutok. Samting we mi harem long moning ya i gat bigfala paoa long mi.

Taem miting i finis, brata we i lidim miting ya i kam luk mi blong talem halo, mo i se: “Nem blong mi János. Mi makem se yu yu lesin gud. ?Yu yu laekem samting we yu harem tede?” Nao mi talem long hem se mi neva go long wan miting olsem, mo mi wantem blong kambak bakegen. Ale hem i askem long mi se: “Yu yu wantem stadi Baebol?” Hemia i wan invetesen we mi no save talem no long hem. Mi haremsave se God nao i pulum mi blong kam joen wetem ol man ya.

Long nekis dei, János i kam wetem Ida, mo sista ya nao i stat blong stadi Baebol wetem mi. Be, mi mi fraet long samting we István bambae i mekem sipos hem i faenemaot se mi stap stadi Baebol wetem ol Witnes blong Jehova. Mi traehad plante taem blong tokbaot ol samting we mi stap lanem, be hem i soemaot se hem i no intres nating. Mi save se hem i no glad long samting we mi stap mekem.

Nating se i olsem, mi gohed blong stadi Baebol mo mi baptaes long Ogis 1989. Fo manis biaen, komunis gavman long Romania i lusum paoa mo oli kilim i ded lida blong gavman ya.

Mi Kasem Moa Fasin Agens

Taem gavman i jenis, ol Witnes blong Jehova oli fri. Naoia oli save joen wanples mo prij long ol haos wanwan. Be long saed blong mi, fasin fri ya bambae i mekem se mi kasem moa fasin agens. István i talem long mi se: “Mi no kea long saed blong bilif blong yu, be mi no wantem luk yu yu go prij long ol haos wanwan.”

Be hemia i no stopem mi blong prij. (Ol Wok 4:20) Mi traehad blong lukaot gud blong hem i no faenemaot se mi stap go prij. Be wan dei ol fren blong István oli luk we mi stap prij long ol haos wanwan mo oli talemaot long hem. Taem mi gobak long haos, hem i singaot bigwan long mi se: “!Yu yu no respektem mi nating mo famle blong yumi!” Mo hem i tekem wan naef, i putum long trot blong mi mo i talem se bambae hem i kilim mi mi ded sipos mi no stop blong prij.

Mi traem blong toktok gud wetem István mo talem long hem se mi lavem hem. Mo hemia i mekem se kros blong hem i godaon. Be taem mi no wantem folem hem i go long mared blong wan famle we oli mekem long jej, hem i kam kros bakegen. Mo hem i stap sakem ol tok we i no kaen nating long mi.

Blong 13 yia mi mas stanap strong from we István i stap kros oltaem. Long ol taem ya, hem i stap gohed blong talem se bambae mitufala i divos. Sam samtaem, bambae hem i lokem doa mo i no wantem letem mi mi go insaed long haos. Mo long sam narafala taem, hem i stap talem long mi blong tekem olting blong mi mo aot long haos.

?Wanem i halpem mi blong stanap strong long ol hadtaem ya? Mi prea mo mi askem Jehova blong i halpem mi blong mi stap kwaet. Mo mi haremsave se Hem i stap sapotem mi. (Ol Sam 55:22) Kongregesen tu i sapotem mi bigwan. Ol elda mo sam gudfala sista oli leftemap tingting blong mi, blong mi no givap long wok blong Jehova. Mo tu, oli mekem mi tingbaot samting we Baebol i talem, se ol waef oli save winim hasban blong olgeta nating se oli “no talem wan samting,” taem oli gohed blong stanap strong mo fasgud long Jehova. (1 Pita 3:1) Mo hemia nao samting we i hapen long laef blong mi.

Taem Evri Samting i Jenis

Long 2001, István i kasem strok mo hemia i mekem se hem i no naf blong wokbaot. Hem i slip long hospital blong wan manis, mo blong sam wik hem i stap kasem sam spesel help. Long ol taem ya, mi mi stap klosap long hem oltaem. Mi fidim hem, mi toktok long hem, mo mi meksua se hem i kasem evri samting we hem i nidim.

Ol brata mo sista long kongregesen tu oli kam visitim hem. István i luksave se oli kea mo oli lavem hem. Plante long olgeta oli glad nomo blong halpem mitufala blong mekem ol defdefren wok. Mo ol elda oli rere oltaem blong leftemap tingting mo sapotem mitufala.

Lav we ol brata mo sista oli soemaot, i mekem István i sem mo i harem nogud from ol samting we hem i bin mekem long mi. Mo tu, hem i makem se i no bin gat wan fren blong hem we i kam visitim hem. From samting ya, taem István i kamaot long hospital, hem i talem se: “Mi wantem stadi Baebol mo kam wan Witnes blong Jehova.” !Taem mi harem samting ya, mi glad tumas mo mi krae!

Long Mei 2005, István i baptaes. From we hem i no save wokbaot, ol brata oli pusum wiljea blong hem i go klosap long pul blong baptaes, mo oli leftemap hem i go insaed long wota blong hem i save tekem baptaes. István i kam wan man we i wok strong long wok blong prij. Mo mi mi gat ol gudfala memori we mitufala i spenem tugeta long wok blong prij. !Taem mi tingbaot ol samting ya, hemia i mekem mi mi glad tumas! Traem tingbaot, man ya we bifo i stap agensem mi blong mi no talemaot trutok blong Baebol, naoia i stap long saed blong mi mo hem i glad tumas blong serem gud nius long ol narafala.

István i lavem Jehova tumas, mo hem i stap yusum taem blong hem blong stadi mo lanem ol vas blong Baebol baehat. Hem i laekem tumas blong tokbaot ol vas ya wetem ol brata mo sista long kongregesen. Mo hem i yusum janis ya tu blong leftemap tingting blong olgeta.

Helt blong István i stap kam moa nogud. From we hem i kasem plante smosmol strok, hemia i mekem se hem i no moa save toktok mo i stap slip nomo long bed. Nating se i olsem, hem i no stop blong mekem wok blong Jehova, mo hem i gohed blong ridim mo stadi Baebol. Taem ol brata mo sista oli kam visitim hem, hem i yusum wan elektronik divaes we i gat skrin long hem, blong toktok wetem olgeta mo leftemap tingting blong olgeta. Wan brata i talem se: “Mi mi laekem tumas blong visitim István from we ol samting we hem i talem long mi, oli leftemap tingting blong mi mo oli givim paoa long mi.”

Sore tumas long Disemba 2015, István i ded. Hemia i mekem mi mi harem nogud tumas, be long semtaem mi gat pis long tingting. Bifo we István i ded, hem i frengud wetem Jehova. Mo hemia nao wan long ol samting we i mekem se mi mi glad tumas. Naoia István mo mama blong mi oli stap long memori blong Jehova. Mo long niufala wol, bambae mi glad tumas blong hagem tufala mo welkamem bak tufala.

Bitim 35 yia i pas finis we mi mo mama i bin go visitim anti blong mi, mo hemia wan visit we bambae mi neva fogetem. Naoia mi gat bitim 70 yia, mo mi stap mekem wok blong fultaem paenia. Mi mi glad tumas, mo mi talem tangkiu long Jehova from olgeta samting ya we hem i mekem blong mi. (Ol Sam 116:12) Hem i halpem mi blong stanap strong mo stap kwaet taem mi fesem fasin agens. Nating se mi kasem fasin agens, be mi lanem se situesen blong yumi i save jenis. I tru se i no isi, be mi mi naf blong winim hasban blong mi, nating se mi no talem wan samting.