“Mi Wantem Tumas Se i Gat Jastis”

Mi bon long Eprel 1951, long Nairobi, Kenia. Perens blong mi oli blong India mo tufala i stap joenem jej ya Sikh. Papa blong mi i gat tu waef, from we hem i maredem waef blong brata blong hem we i ded. Mo nating se mama blong mi i faswan waef blong hem, be mama i no save mekem wan samting long saed ya. Plante taem, mama mo step mama blong mi, oli stap gat pikinini long semtaem. Taswe mi gruap wetem ol stret brata mo sista, ol haf brata mo sista, mo wan kasen brata blong mi. Mo mifala i seven evriwan. Long 1964, taem mi gat 13 yia, papa blong mi i ded.

Mi Lukaotem Jastis

Taem mi stap gruap, mi makem se plante man oli no gat sem tingting mo oli no stap mekem i sem mak long evri man. Biaen, taem mi stadi Baebol, mi luksave se laef blong famle blong mi i sem mak long stori blong Lea mo Rejel. Mo mi makem se famle blong mi i stap tritim nogud ol man Kenia we oli stap wok blong mifala. Papa i wantem se mifala i fren gud wetem ol neba blong mifala we oli blong Yurop, from hem i se mifala i save lanem plante samting long olgeta. Be hem i talem se mifala i no mas joen wetem ol man Afrika, from we bambae mifala i no save lanem wan samting long olgeta. Mo tu, hem i no wantem se mifala i joen wetem ol man Pakistan, be mifala i mas luk olgeta olsem ol enemi blong mifala. Mi mi wantem tumas se i gat jastis, taswe mi no agri long tingting we papa blong mi i gat.

Man ya Guru Nānak nao i statem jej ya Sikh, samwe long ol yia 1500. Mi mi akseptem ol tijing blong hem, olsem tijing ya se i gat wan tru God nomo. Be mi luk se ol man blong jej ya oli no stap tritim ol memba blong olgeta long sem fasin, mo mi stap tingting se wan samting i no stret long jej ya.

Be i gat sam narafala samting tu we i mekem tingting blong mi i fasfas. From we jej ya Sikh i jes stat sam handred yia i pas, plante taem mi stap tingting se: ‘?Wanem i bin stap bifo long jej ya? ?Wanem nao faswan rod blong wosip we God i agri long hem?’ Famle blong mi i stap hangem ol kalenda we i gat pija blong ol ten faswan lida blong jej ya Sikh. Be mi stap tingting se: ‘?Olsem wanem nao ol man oli save se fes blong olgeta ya i luk olsem? ?From wanem famle blong mi mo ol narafala oli mas bodaon long pija blong ol lida ya, nating se ol lida ya oli talem se ol man oli mas wosipim wan tru God nomo?’

Long 1965, taem mi gat 14 yia, famle blong mi i muv i go long India. Laef blong mifala long ples ya i had, from we mifala i no gat tumas mane. Samwe afta long wan yia, mifala i stat blong muv i go long Inglan, long Leicester. Be from mifala i no gat naf mane, oli sanem tu i go fastaem, biaen tu narafala, gogo kasem we mifala evriwan i go.

Taem mi gat 16 yia, mi stat blong mekem ol defdefren wok long dei, mo long naet mi go long skul, from we blong sam yia mi no bin go long skul. Be long ples blong wok, mi luk se oli no stap mekem i sem mak long evri wokman. Eksampol, ol wokman we oli blong Inglan, pei blong olgeta i gud moa i bitim pei blong ol man we oli blong narafala kantri. Taswe mi joenem wan grup blong ol woman we oli blong narafala kantri, blong mifala i no go long wok go kasem we oli mekem mifala i kasem semfala pei olsem ol wokman blong Inglan. Yes, mi mi wantem tumas se i mas gat jastis.

Mi Faenem Ansa

Faswan taem we mi mitim ol Witnes blong Jehova, hemia long 1968, taem tu brata i noknok long doa blong mi. Mi mi intres tumas taem mi harem promes ya se Kingdom bambae i mekem i sem mak long olgeta man. Biaen, wan long tufala i kambak wetem waef blong hem, blong visitim mi. Mi mo sista blong mi Jaswinder, mo haf sista blong mi Chani, mifala i stat blong stadi Baebol. Afta we mifala i finisim sikis japta, mifala i sua se Jehova i trufala God, Baebol i Tok blong hem, mo Kingdom nomo i save mekem se i gat jastis long fulwol.

Be mifala i kasem strong fasin agens long ol famle blong mifala. Afta we papa i ded, haf brata blong mi i kam hed blong famle. Mo step mama blong mi i pulum hem blong i agensem mifala. Haf brata blong mi i stap kilim tufala smol sista blong mi, hemia Jaswinder mo Chani, mo i stap kikim tufala wetem sefti sus. Be from we mi mi gat 18 yia, hem i save se bambae hem i no save kilim mi, from we mi gat raet blong ripotem hem long ol hae otoriti. Wan dei, hem i tekem wan Baebol, i openem, i bonem ol pej blong hem, mo i pusum i go long fes blong tufala, mo i se: “!Yutufala i askem long Jehova blong i kilim faea ya i ded!” Long taem ya, mifala i stap go finis long sam miting, be long fasin haed. Mifala i wantem tumas blong wosipim trufala God ya Jehova. Be hemia i no isi wetem situesen we mifala i stap gotru long hem. Taswe, mifala i stat blong mekem plan blong ronwe mo go faenem wan ples we i sef.

Ale mifala i stat blong sevem ol mane blong lanj mo mane blong bas blong mifala, wetem smol salari we mi kasem, we oltaem mi stap givim long step mama blong mi. Mifala i pem tri sutkes mo mifala i haedem long wan narafala ples longwe long haos, mo sloslo mifala i stap fulumap ol klos blong mifala i go long olgeta. Long Mei 1972, taem Jaswinder i gat klosap 18 yia, mo mane we mifala i sevem i kasem samwe 30,000 vatu (260 U.S. dola), mifala tekem tren blong go long Penzance, we i stap long saotwes blong Inglan. Taem mifala i kamtru long Penzance, mifala yusum wan pablik telefon blong kolem ol brata mo sista blong eria ya. Ol brata mo sista oli welkamem gud mifala. Long ples ya, mifala i mekem ol defdefren kaen wok olsem blong tekemaot ol gat blong fis, blong mifala i save kasem mane blong rentem wan ples blong laef long hem.

Mifala i gohed blong stadi Baebol wetem wan olfala kapol, hemia Harry mo Betty Briggs. Long Septemba 1972, mifala i tekem baptaes long wan smol pul we i stap aninit long platfom blong Haos Kingdom blong Truro. Biaen, Chani i stat blong mekem wok blong paenia, be mi mo Jaswinder i gohed blong wok blong sapotem hem.

Prij Long Ples We i Gat Moa Nid

Nating se Harry mo Betty i gat bitim eiti yia, be oltaem tufala i stap go prij long ol aelan blong Scilly, we oli stap long saotwes kos blong Inglan. Eksampol blong tufala i pulum mifala blong wantem mekem sem mak. Taswe long 1973, afta we mifala i storian wetem Brata Skinner, olsem we mi bin tokbaot long stat, mifala i save stret samting we mifala i mas mekem.

Long Jenuware 1974, mifala i pem wan wei tikit blong go long New Delhi, India. Taem mifala i kamtru, Brata Dick Cotterill i letem mifala i stap long haos blong ol misinari olsem ol gest. Chani i gohed blong paenia, be mi mo Jaswinder i traehad blong spenem moa taem long wok blong prij.

Biaen, oli sanem mifala i go long Punjab, we i stap long notwes blong India. Taem mifala i kamtru long Punjab, mifala i stap smoltaem long wan haos blong ol misinari long taon blong Chandigarh, mo biaen mifala i rentem wan apatmen. Long Septemba 1974, mi stat blong mekem wok blong fultaem paenia, mo long 1975 mi kasem invetesen blong kam wan spesel paenia. Wok blong prij i mekem mi mi luksave se i gat bigfala nid blong transletem ol buk i go long lanwis ya Punjabi, blong givhan long moa man blong oli kasemsave se Jehova i God blong lav mo jastis. Long 1976, branj ofis blong India i invaetem mitrifala blong givhan long wok blong transletem ol buk i go long Punjabi. Be hemia i no isi, from we i no gat ol taepraeta o kompiuta. Mifala i mas yusum han blong mifala nomo blong raetemdaon ol translesen, biaen mifala i mas jekemgud mo ridim bakegen. Taem mifala i agri long translesen ya, bambae mifala i yusum wan olfala printing masin, we mifala i mas putum wanwan leta blong ol toktok long hem blong printim.

Stap Glad, Nating Se i Gat Problem Blong Helt

Laef blong mifala i jenis kwiktaem nomo. Jaswinder i maredem wan brata, mo tufala i muv i go long Kanada. Chani i maredem wan brata blong Jemani, we i aot long Yunaeted Stet blong kam mekem wan visit, mo i muv i go stap long Yunaeted Stet. Long Oktoba 1976, mi kasem wan strong sik, mo mi gobak long Inglan. Stret mama mo stret brata blong mi, we oli no agensem trutok, oli laef long Leicester mo oli glad blong letem mi mi stap wetem olgeta. Mi kasem wan rabis sik (Evans syndrome) we i spolem ol sel blong blad, mo mi mas kasem plante tritmen, we hemia i minim tu se oli mas tekemaot spleen blong mi. From samting ya, mi stop blong paenia.

Mi prea strong long Jehova se sipos mi kam gud smol, bambae mi stat blong paenia bakegen. !Mo hemia nao samting we mi mekem! Nating se mi save se wanwan taem bambae mi sik bigwan, be long 1978 mi muv i go long Wolverhampton blong paenia long eria ya we plante man oli toktok Punjabi. Mifala i yusum han nomo blong raetem ol invetesen blong miting, mo tekem i go long ol stoa blong mekem kopi blong olgeta. Biaen mifala i seremaot long ol man we oli toktok Punjabi, blong invaetem olgeta blong kam lesin long pablik tok. Naoia long Briten, i gat faef kongregesen mo tri grup we oli toktok Punjabi.

Branj blong Briten i save se taem mi stap long India, mi givhan long wok blong translesen long lanwis Punjabi. Taswe long en blong ol yia 1980, branj ofis i kontaktem mi. Ale mi stat blong go givhan wanwan taem long Betel blong London, blong rerem ol stael blong raeting mo wokem ol program we bambae oli naf blong ridim stael raeting ya Gurmukhi. Laef blong mi i bisi gud, mi mas wok blong winim mane, mi mas lukaot long mama blong mi we i stap longwe long mi, mo mi stap go givhan wanwan taem long Betel. Nating se i olsem, mi mi glad tumas se mi naf blong wok long Betel.

Long Septemba 1991, oli invaetem mi blong kam wan Betelaet, mo mekem wok ya blong transletem ol buk i go long Punjabi. Mi neva ting se samting ya bambae i hapen. Mi harem se mi no naf blong mekem wok ya, from we mi gat wan sik, mo mi bitim yia we wan man i mas gat blong kam wan Betelaet. Nating se i olsem, Jehova i givim nambawan blesing ya long mi. Mi mi glad long ol wok we mi stap mekem long Betel, nating se mi gat problem blong helt. Plante taem mi fesem problem long saed blong blad, taem mi stap gotru long tritmen blong chemotherapy mo sam narafala tritmen. Ol dokta blong mi oli sapraes taem oli luk se mi stap kam gud. Taswe oli invaetem mi blong joen long wan miting we oli mekem long wan bigfala hospital blong London, we i gat samwe long 40 profesenol dokta oli stap long taem ya. Mi mekem wan smol toktok blong 10 minit blong tokbaot from wanem mi no tekem blad, mo biaen wan brata we i wok long Hospital Infomesen Desk, i ansarem ol kwestin we ol man oli askem.

Long ol hadtaem ya, tufala sista blong mi, Jaswinder mo Chani, oli sapotem mi bigwan. Mo tu, mi glad tumas long sapot mo help we mi kasem long ol brata sista long Betel mo long ol narafala fren blong mi. Long ol hadtaem ya tu, Jehova i givim paoa we mi nidim blong mi gohed long ol wok blong mi.—Ol Sam 73:26.

Blesing Blong Jehova i Mekem Man i Rij

Mi stap 33 yia long Betel, mo hemia i givhan long mi blong “testem mo luk se Jehova i gud.” (Ol Sam 34:8; Ol Proveb 10:22) Gudfala eksampol blong ol olfala brata mo sista tu i givhan long mi. Mi mi glad tumas blong luk se plante man we mi stadi Baebol wetem olgeta long Punjabi, oli kam ol man blong Jehova. Mo naoia, mi mi fren gud wetem ol stret famle blong mi. Nating se mama mo brata blong mi oli no ol Witnes, be oltaem mama bambae i talem se: “I klia se yu yu stap mekem wok blong God.” Mo taem mi talem se bambae mi aot long Betel blong givhan blong lukaot long mama blong mifala we i olfala, brata blong mi i talem se: “Yu yu stap mekem wan gudfala wok. I gud yu stap nomo.” Nating se mama blong mi i laef long wan ples blong ol olfala we i stap longwe long Betel, be oltaem mi stap go visitim hem.

Taem mi fesem wan trabol long laef blong mi, bambae mi talem long mi wan se: ‘Kamal, yu no fraet. Jehova i sil blong yu. Pei we bambae yu kasem i bigwan we i bigwan.’ (Jenesis 15:1) Mi talem tangkiu long Jehova, we “i God blong jastis,” from we hem i tingbaot mi nating se long taem ya mi wan yangfala gel nomo, mo i halpem mi blong mi mekem plante nambawan wok long ful laef blong mi. (Aesea 30:18) Antap long hemia, mi luk fowod long taem ya we “bambae i no gat wan man long ples ya i talem se: ‘Mi mi sik.’”—Aesea 33:24.