Ol Rabis Spirit Oli Giaman Se Ol Dedman Oli Laef Yet

Baebol i talem se Setan i “stap giaman long olgeta man long wol, i lidim olgeta oli go krangke.” (Revelesen 12:9) Setan mo ol rabis enjel, oli no wantem se yumi bilif long Tok blong God, Baebol. Oli traem pulum ol man blong bilif se ol dedman oli laef yet samples. I gud yumi luk olsem wanem oli mekem samting ya.

Ol Giaman Skul

Plante skul oli tijim se yumi evriwan i gat wan sol we i aot long bodi blong yumi taem yumi ded, mo i gohed blong laef samples. Oli talem se bodi nomo i ded, be sol i no ded. Mo tu, oli bilif se sol i no save ded samtaem.

Be Baebol i no tijim samting ya. Baebol i soemaot se sol hem i man nomo, be i no wan samting insaed long bodi blong man. Baebol i tokbaot olsem wanem God i wokem Adam, i se: “Nao Jehova God i tekem sam graon, i wokem man long hem, mo hem i blu long nus blong man ya, i putum win blong laef long hem. Nao long fasin ya, man ya i kam wan laef sol.” (Jenesis 2:7, NW) Taswe, God i no putum wan sol insaed long Adam, from we Adam nao i wan sol.

Baebol i talem se ol anamol tu oli sol.—Jenesis 1:20, 21, 24, 30, NW.

Long Baebol tok ya “sol” i minim man. Taswe yumi no mas sapraes taem yumi lanem se sol i save ded. Baebol i talem se:

• “Sol we i stap mekem sin, hem bambae i ded.”—Esikel 18:4, NW.

• “Nao Samson i talem se: ‘!Ale sol blong mi bambae i ded wetem ol man Filistia!’”—Jajes 16:30, NW.

• “?Long Sabat dei, wanem fasin i stret long Loa? ?I stret blong mekem sam gudfala samting, no blong mekem sam samting nogud? ?I stret blong sevem wan sol, no blong kilim hem i ded?”—Mak 3:4, NW.

Sam narafala vas long Baebol oli soemaot se sol i save ded (Jenesis 17:14, NW), long naef blong faet (Josua 10:37), i no moa save pulum win (Job 7:15), mo i save draon. (Jona 2:5) Taswe sol i save ded.

Sipos yu ridim ful Baebol, bambae yu no save faenem tok ya, “sol we i no save ded samtaem.” Sol i no wan spirit. Tijing ya se sol i no save ded samtaem, i no kamaot long Baebol. Hem i wan tijing blong Setan wetem ol rabis enjel blong hem. Jehova i no laekem nating ol skul we oli tijim ol giaman tijing olsem.—Ol Proveb 6:16-19; 1 Timoti 4:1, 2.

Ol Kleva

Wan narafala rod we Setan i yusum, hemia ol kleva. Tok ya Kleva, i minim wan man we i kasem ol mesej we oli kamaot stret long ol rabis spirit. Plante man mo sam kleva tu oli bilif se ol mesej ya oli kamaot long ol spirit blong ol dedman. Be olsem we yumi luk finis, Baebol i soemaot se samting ya i no tru.—Prija 9:5, 6, 10.

?Ol mesej ya oli kamaot long hu? !Oli kamaot long ol rabis enjel nomo! Taem wan man i laef i stap, ol rabis spirit ya oli lukluk gud ol fasin blong hem, oli save voes mo fes blong hem, ol samting we hem i mekem, mo ol samting we hem i save. Taswe i isi nomo blong oli tekem fasin blong samfala we oli ded finis.—1 Samuel 28:3-19.

Ol Giaman Stori

Ol giaman stori oli olsem wan narafala rod, we Setan i yusum blong leftemap ol giaman tijing blong ol dedman. Ol stori olsem oli tanem tingting blong man blong oli no moa bilif long ol trutok blong Baebol.—2 Timoti 4:4.

Long Afrika i gat plante stori blong ol man we oli ded finis mo sam man oli talem se oli luk olgeta oli laef i stap yet. Oli talem se oli luk ol man ya longwe long ples blong olgeta. Be yu traem tingbaot: ‘Sipos wan man i gat paoa blong aot long ples blong ol dedman mo kambak long wol, ?yu ting se i stret we hem i kambak long wan ples we i stap longwe long ol famle mo ol fren blong hem?’

Mo tu samtaem ol man oli ting se oli luk wan man we i ded finis. Be blong talem stret, maet oli luk wan man we i klosap sem mak long man ya we i ded finis. Wan eksampol, i gat tu brata we tufala i stap prij long wan ples long bus. Tufala i luk wan olfala i stap wokbaot biaen long tufala blong plante aoa. Tufala i askem long man ya from wanem hem i stap folem tufala. Nao man ya i talem se hem i ting se wan long tufala i stret brata blong hem, we i ded sam yia finis. Tufala i storian wetem hem be tufala i no save jenisim tingting blong hem. !Nao yu traem tingbaot stori we olfala man ya i go talem long ol fren mo ol man raonabaot long hem!

Ol Vison, Ol Drim, Mo Ol Voes

Ating yu yu save finis plante stori blong ol narakaen samting we sam man oli luk, oli harem, no oli luk long wan drim. Plante taem ol man we ol samting olsem i hapen long laef blong olgeta, oli fraet we oli fraet. Marein we i wan woman Wes Afrika, oltaem hem i harem voes blong bubu woman blong hem we i ded finis, i stap singaot hem long naet. Marein i fraet tumas, nao hem i singaot bigwan, i wekemap ol famle blong hem. Sloslo hed blong hem i kam krangke.

?Olsem wanem? Sipos i tru se ol dedman oli stap laef samples, ?i stret we oli mekem ol famle oli fraet tumas olsem? Nogat. Ol rabis enjel nao oli stamba blong ol mesej we oli mekem man i harem nogud.

?Be olsem wanem long ol mesej we oli givhan mo oli mekem man i harem gud? Wan eksampol, wan woman long Siera Leon, nem blong Gbassay, hem i sik. Nao hem i drim, hem i luk papa blong hem we i ded finis. Mo papa blong hem i talem long hem se hem i mas tekem lif blong wan tri, mo hem i meksem wetem wota, mo hem i mas dring. Be hem i no mas toktok wetem eni man bifo we hem i mekem olsem. Ale, woman i mekem olsem, nao sik blong hem i finis.

Wan narafala woman i talem se wan naet hasban blong hem, we i ded finis i kamtru long hem. Woman ya i talem se hem i naes tumas mo i werem ol naes klos.

Maet yu yu ting se ol mesej mo ol vison olsem oli gud mo oli givhan long man. ?Be oli kamaot long God? Nogat. Jehova i God blong trutok. (Ol Sam 31:5) Jehova i no save giaman long ol man se hem i spirit blong dedman. Ol rabis enjel nao oli mekem samting ya.

?Be i gat sam rabis spirit we oli gud? Nogat. Nating se samtaem i luk olsem se oli givhan long sam man, be olgeta evriwan oli nogud. Taem Setan i toktok wetem Iv, hem i mekem olsem we hem i fren gud wetem Iv. (Jenesis 3:1) ?Be wanem i hapen long Iv afta we hem i lesin long Setan mo hem i obei long hem? Hem i ded.

Plante taem wan rabis man i fren gud wetem ol man we hem i wantem giaman long olgeta, blong hem i save kasem samting we hem i wantem. Wan waestok blong ol man Afrika, i se: “Tut i waet, hat i blak.” Mo Baebol i talem se: “Nating we Setan, be hem i save tanem fasin blong hem, blong mekem ol man oli luk hem olsem we hem i wan enjel blong laet.”—2 Korin 11:14.

God i no moa yusum ol drim, ol vison, mo ol voes blong givim mesej long ol man long wol. Hem i yusum Baebol blong lidim mo tijim ol man, blong mekem man i “savegud ol rod blong mekem ol gudfala wok.”—2 Timoti 3:17.

Taswe, taem Jehova i givim woning long yumi blong lukaot gud long ol trik blong Setan, hem i mekem olsem from we hem i lavem yumi tumas. Jehova i save se ol rabis spirit oli enemi blong yumi.