?Weples Yumi Save Faenem Ol Ansa?
“Tingting ya se bambae man i save safa blong olwe i no laenap wetem bilif ya se God i laekem tumas ol samting we hem i wokem. . . . Sipos yumi bilif se sol bambae i kasem panis blong olwe from ol mastik we man i mekem long sot laef blong hem, mo i no gat jans blong stretem ol mastik ya, yumi no stap tingting stret.”—NIKHILANANDA, WAES MAN BLONG OL HINDU.
1, 2. From we i gat plante defdefren tingting long saed blong laef afta ded, ?wanem ol kwestin we plante man oli askem?
OLSEM waes man ya blong ol Hindu, Nikhilananda, tingting blong plante man tede i trabol from tijing ya se man i save safa blong olwe. Be, samfala oli faenem i hadwok blong kasem save long ol narafala tingting tu, olsem, man i save kasem Nirvana, mo kam wan wetem Tao.
2 Nating se i olsem, tingting ya se sol i no save ded samtaem i mekem se ol skul blong Is mo Wes blong wol tugeta, oli gat ol defdefren bilif long saed blong laef afta ded, we oli mekem tingting blong ol man i fasfas. ?I gat rod blong save trutok long wanem we i hapen long yumi taem yumi ded? ?I tru se sol i no save ded samtaem? ?Yumi save luk weples blong faenem ol ansa?
Sayens Mo Waes Blong Wol
3. Sayens mo ol rod blong sayens blong stadi long ol samting, ?oli save givim ansa long ol kwestin long saed blong laef afta ded?
3 ?Sayens mo ol rod blong sayens blong stadi long wan samting, oli save faenem ansa long ol kwestin long saed blong laef afta ded? Blong traem lanem sam samting long saed blong laef afta ded, samfala oli bin stadi long sam narakaen samting we oli hapen long sam man long ol yia we oli jes pas. Ol man ya oli talem se kolosap oli bin ded, nao wan samting olsem wan drim i kasem olgeta, we oli luk se oli stap afsaed long bodi blong olgeta. Man Katolik we i stadi long ol tijing blong jyos, Hans Küng, i givim wan tok we nem blong hem se, “?Ded i Mekem Rod Blong Yumi Kam Long Laet?” Hem i tokbaot samting we i hapen long ol man ya, i se: “Ol samting ya oli no pruvum se man i gat wan narafala laef afta ded. Ol man ya oli stap tokbaot samting we i hapen long ol laswan menet bifo we oli ded, i no wan laef we i no save finis afta ded.” Hem i gohed, i se: “Kwestin ya, ?i gat laef afta ded no nogat?, i impoten tumas long man bifo we hem i ded. Yumi nidim blong faenem ansa long kwestin ya. Sipos ol dokta oli no save ansarem, yumi mas traem faenem ansa long wan narafala ples.”
4. ?Waes blong wol i save halpem yumi blong faenem ansa long ol defren tingting blong ol jyos long saed blong laef afta ded?
4 ?Olsem wanem long ol waes blong wol? ?Oli save givhan long yumi blong faenem ansa long kwestin ya blong laef afta ded, tru long ol defdefren tingting blong ol jyos? Wan waesman blong Briten long ol yia 1900, Bertrand Russell, i talem se stadi blong ol waes blong wol i joen wetem “ol tingting blong man we i no gat pruf blong olgeta.” The World Book Encyclopedia i talem se waes blong wol i “wan fasin blong askem kwestin —skelem, jajem, eksplenem, mo talemaot prapa tingting blong man.” Long saed blong laef afta ded, ol waesman blong wol oli gat ol defdefren tingting. Samfala oli talem se, man i bilif we sol i no save ded samtaem from we hem i wantem bilif olsem. Be, sam narafala oli talem se taem man i bon, hem i kasem raet blong no ded samtaem.
Faenem Ansa Long Buk We i Defren Long Ol Narafala Buk
5. ?Wanem buk i olfala moa i bitim ol narawan?
5 Be, i gat wan buk we i givim ol trufala ansa long ol impoten kwestin long saed blong laef mo ded. Buk ya i olfala moa i bitim ol narafala buk. Oli raetem sam haf blong hem samwe long 3,500 yia finis. Oli raetem fashaf blong buk ya sam handred yia bifo we oli wokem ol faswan singsing long ol buk blong Hindu, hemia ol Veda. Mo oli raetem fashaf ya wan taosen yia bifo we Buda, Mahāvīra, mo Confucius, oli wokbaot long wol ya. Ol man oli finisim wok blong raetem buk ya long 98 K.T., bitim 500 yia bifo we Muhammad i statem skul Islam. Buk ya we waes blong hem i hae moa long ol narafala buk, hemia Baebol.a
6. ?From wanem yumi save se Baebol i mas givim stret save long yumi long saed blong sol?
6 Ol store blong Baebol long saed blong ol yia bifo, oli tru moa i bitim ol store long ol narafala buk. Baebol i tokbaot faswan man mo woman, mo olsem wanem yumi kam long wol ya. Hem i tokbaot wanem i hapen bifo we God i wokem man tu. I sua se, wan buk olsem i save givhan long yumi blong kasem save long fasin we God i folem blong wokem man, mo long saed blong sol tu.
7, 8. ?From wanem yumi save bilif se Baebol bambae i givim ol gudfala ansa we oli stret long saed blong wanem i hapen long yumi taem yumi ded?
7 Antap long hemia, Baebol i fulap long ol profet tok we oli kamtru stret olsem hem i talem. Wan eksampel: Baebol i talemaot plante smosmol samting long saed blong gavman blong Media Pesia, mo Gris, olsem wanem tufala gavman ya oli kam bigfala politik paoa, mo olsem wanem tufala i lusum paoa tu. Ol tok ya i stretgud. Samfala we oli no bilif long Baebol oli traem talem se ol man oli bin raetem tok ya afta we ol samting ya oli hapen, be oli no save pruvum samting ya. (Daniel 8:1-7, 20- 22) Plante smosmol samting long ol profet tok blong Baebol oli stap kamtru fulwan long taem blong yumi.b —Matyu, japta 24; Mak, japta 13; Luk, japta 21; 2 Timote 3:1-5, 13.
8 I no gat wan man we i save talemaot long fasin we i stretgud olgeta, ol samting we bambae oli kamaot long fyuja, nating se ol man ya oli gat bigfala save bitim mak. Man we i Wokem Heven mo Wol, we i gat olgeta paoa mo waes, hem nomo i naf blong talem samting ya. (2 Timote 3:16, 17; 2 Pita 1:20, 21) Tru ya, Baebol i kamaot long God nomo. I sua se buk ya i save givim ol gudfala ansa we oli tru, long saed blong wanem bambae i hapen long yumi taem yumi ded. Fastaem, bambae yumi lukluk ol tok blong hem long saed blong sol.
[Ol Futnot]
a Lukluk buklet ya A Book for All People, we Watchtower Bible and Tract Society of New York, Inc., i wokem.
b Lukluk buk ya, The Bible—God’s Word or Man’s?, we Watchtower Bible and Tract Society of New York, Inc., i wokem.
[Tok blong pija long pej 18]
Buk we i olfala moa i bitim ol narafala buk
[Tok blong pija long pej 18]
Buk ya i givim ol gudfala ansa we oli tru