Wan Wol We i Moa Gud​—⁠?I Wan Drim Nomo?

SIPOS yu bin joen long skul ya we i wosip long Mazda, god ya we Zoroaster, profet ya blong Iran i bin leftemap, maet yu bin wet from dei we wol bambae i kam naes bakegen olsem bifo. Sipos yu bin stap long Gris bifo, maet yu bin drim se yu go finis long ol Naes Aelan we ol man blong raetem ol naes tok oli tokbaot, no yu luk Golden Eja i kambak bakegen, olsem Hesiod, man blong raetem ol naesfala vas i tokbaot long ol yia bitwin 800 mo 700 B.K.T. Maet wan Indian blong Guarani long Saot Amerika, i stap gohed yet blong lukaot Kantri ya we i no gat Fasin Nogud long hem. Long taem blong yumi, maet yu gat tingting se sam plan blong ol man blong politik no fasin ya we man i lukaotgud long ol samting raonabaot long yumi we oli sapotem laef, bambae i mekem wol i kam moa gud.

Golden Ej, ol Naes Aelan, Kantri We i No gat Fasin Nogud long hem​—⁠trifala nem ya oli sam nomo long plante nem we ol man oli yusum blong tokbaot samting ya we oli wantem tumas, hop blong wan wol we i moa gud.

I tru se wol ya, wol blong yumi, i no wan ples we i stret gud olgeta. Ol fasin blong brekem loa we oli kam raf moa, ol faet blong ol laen blong man we oli kilkilim olgeta bakegen wetem ol raf fasin we oli bitim ol taem bifo, fasin blong traem kilimaot wan ful nesen blong man, fasin blong ol man blong no tingbaot ol narafala we oli stap harem nogud, fasin pua mo fasin blong sot long kakae, fasin blong ol grup blong man blong no moa joengud from sem intres no sem tingting, problem long saed blong ol samting blong sapotem laef olsem win mo wora, ol sik we i no gat meresin blong olgeta, we oli stap kasem plante milyan man​—⁠lis blong ol trabol blong tede i no gat en blong hem. Long saed blong ol faet we ol man oli stap mekem naoia, wan man blong raetem nyuspepa long Itali i talem se: “Samting ya i save mekem man i tingting se, ating fasin blong no laekem nating narafala man i wan filing we i strong tumas long taem blong yumi.” Taem yumi tingbaot ol samting we oli stap hapen, ?yu ting se i soem stret tingting blong wantem tumas wan samting we i defren, samting we i moa gud? ?No tingting ya i olsem we yumi wantem samting we i no tru, wan drim we bambae i neva kamtru? ?I save gat wan wol we i moa gud bitim hemia we yumi stap long hem?

Hemia i no ol nyufala wari. Long plante handred yia finis, ol man oli bin stap drim long wan wol we ol samting oli rongud, i gat stret fasin mo plante gudfala samting long hem, mo lav i stap bitwin olgeta man. Sloslou, sam man we oli gat save long waes blong man, oli talemaot fulwan tingting blong olgeta long saed blong ol Stet we oli fulap long ol gudfala fasin nomo, ol wol we oli moa gud. Be, sore tumas, neva oli save eksplenem olsem wanem blong mekem i kamtru.

Ol samting ya we ol man oli stap drim long hem long plante handred yia finis, ol naes ples we evri samting i stretgud olgeta, mo ol tingting we ol man oli wantem tumas wan fasin blong laef we i moa gud, ?i save tijim yumi long wan samting?

[Futnot]

[Tok blong pija long pej 3]

?I save gat wan wol we i moa gud?