?Sol i Save Ded?

OL FREN mo famle oli wokbaot sloslou i go pas kolosap long bokis ya, i no gat wan man i mekem noes. Oli lukluk dedbodi we i stap insaed long bokis ya, hem i wan yangfala boe we i gat 17 yia. Ol skul fren blong boe ya oli no moa luksave hem. Ol meresin we hem i bin tekem i mekem kolosap evri hea blong hem i lus. Kansa i mekem bodi blong hem i bunbun tumas. ?Hemia i rili fren blong olgeta? !Sam wik nomo bifo, boe ya i gat fulap gudfala tingting, i stap askem plante kwestin, i gat paoa, mo hem i laef i stap! Mama blong boe ya i stap krae mo i talem bakegen mo bakegen, se: “Naoia, Tommy i moa glad. God i wantem se Tommy i go long heven blong stap wetem hem.”

Mama ya we i harem nogud tumas, hem i traem faenem wan rod blong haremgud lelebet, taswe hem i holemtaet tingting ya se boe blong hem i stap laef yet samples. Long jyos, hem i bin lanem se sol i no save ded samtaem, mo se sol i stampa blong olgeta fasin, tingting, mo memori blong man​—yes, se sol hem i “man insaed long yumi.” Hem i bilif se sol blong boe blong hem, i no ded nating. Hem i ting se sol ya i wan speret we i laef, we i aot long bodi blong boe ya taem hem i ded, mo i go long heven blong stap wetem God mo ol enjel.

Long taem blong trabol olsem, ol man oli traem faenem wan samting blong mekem olgeta oli haremgud mo givim hop long olgeta. Taswe, yumi kasem save from wanem plante man oli gat bilif ya. Eksampel, tingbaot tok blong J. Paterson-Smyth, wan man blong stadi long saed blong ol skul, we i talem long buk ya The Gospel of the Hereafter se: “Ded i wan smol samting nomo, taem yumi skelem wetem samting we i hapen afta we man i ded. Ded i karem yumi i go insaed long wan wol we i nambawan we i nambawan.”

Raonabaot long wol mo long plante skul mo kastom, ol man oli bilif se, insaed long yumi evriwan i gat wan sol we i no save ded samtaem, wan speret we i stap laef afta we bodi i ded. Bilif ya i stap long olgeta ples blong wol long ol taosen skul blong Krisendom.a Hem i wan bilif we i stap long skul blong ol man Jyu tede tu. Ol man blong skul ya Hindu oli bilif long ‘atman,’ hemia sol. Oli talem se, God i wokem sol bifo we bifo olgeta, nao taem man i bon, sol i kalabus long bodi. Afta we man i ded, sol i goaot long hem, i go laef long wan narafala bodi bakegen, mo samting ya i gohed blong olwe olsem. Ol man Muslim oli bilif se sol i stat taem man i bon, mo hem i gohed blong laef afta we bodi i ded. Sam narafala skul​—olsem plante man Afrika we oli bilif se man i gat wan speret we i no save ded, mo ol Sinto, mo sam Budis tu​—oli tokbaot sem samting nomo be long ol defren fasin.

Sam Kwestin We Oli Mekem Yumi Trabol

Nating se plante man long olgeta ples blong wol oli bilif se sol i no save ded, i gat sam kwestin long saed ya we oli mekem tingting blong man i trabol. Eksampel, ol man oli wantem save se sol blong wan fren no famle bambae i go wea, sipos man ya i bin gat nogud fasin. ?Bambae man ya we i ded, hem i laef bakegen long wan narafala bodi no long wan narafala laef we i daon moa long laef blong man? ?Bambae hem i go long pegatri, we i pastru long sam samting blong klinim hem gogo hem i naf blong go long heven? Mowas, ?bambae hem i go safa long faea blong hel blong olwe? ?Hem i wan speret we i kros tumas we i nidim se ol man oli mekem hem i kam kwaet, olsem plante skul we oli bilif long speret blong dedman oli talem?

Ol tijing olsem oli mekem tingting blong ol man we oli laef, i hevi long saed blong fyuja. ?Yumi mas mekem i gud long speret blong ol famle no fren we oli ded, blong mekem se oli no kam mekem trabol long yumi bakegen? ?Yumi save givhan long olgeta blong kamaot long nogud ples ya pegatri? no ?Yumi mas stap harem nogud nomo wetem tingting ya se oli stap safa long hel, we yumi no save mekem wan samting blong givhan long olgeta? ?Yumi mas keagud long sam kaen anamol from we maet sol blong man we i ded i stap insaed long anamol ya?

Ol kwestin we oli stanap long saed blong God tu, oli save mekem tingting blong man i trabol. Eksampel, plante papa mama, olsem mama ya we yumi bin tokbaot long stat blong store ya, oli haremgud fastaem long tingting ya se God i “tekem” sol blong pikinini blong olgeta i go long heven blong stap wetem hem. Be biaen, plante oli stat tingting se, God i narakaen sipos hem i mekem wan nogud sik i kasem wan smol pikinini we i no gat fol, nao i karemaot pikinini ya long han blong papa mama blong hem we oli laekem hem tumas, i mekem tufala oli harem nogud tumas, jes blong mekem se pikinini ya i go stap long heven kwiktaem wetem hem. ?Wehem stret fasin, lav, mo fasin sore blong God ya? Samfala oli no save bilif tu se God i waes sipos hem i mekem olsemia. Oli askem se, Sipos God i wantem se olgeta sol ya oli stap long heven, ?from wanem hem i putum olgeta long wol ya fastaem? Samting ya i minim se God i wokem wol ya blong nating nomo.​—Skelem wetem Dutronome 32:4; Ol Sam 103:8; Aesea 45:18; 1 Jon 4:8.

Taswe, nomata olsem wanem oli tijim bilif ya se sol blong man i no save ded samtaem, hem i mekem plante kwestin i kam antap mo i mekem tingting blong man i fasfas. ?From wanem? Ating blong faenem stampa blong trabol ya, yumi mas luklukbak long taem we tijing ya i stat. Maet yu tu yu kasem moa save long bisnes ya sipos yu lukluk i gobak long stampa blong tijing ya. Mo maet yu sapraes blong faenemaot wanem we Baebol i talem long saed blong sol. Hem i tokbaot hop blong laef afta ded, we i moa gud bitim tijing ya we plante skul blong wol oli tijim.

[Futnot]