Halpem Ol Man Blong Kasem Save Long Saed Blong Trufala God
1 Jisas i prea long Papa blong hem se: “Hemia laef ya we i no save finis, we man i save yu, we yu nomo yu God tru, mo we man i save mi ya, Jisas Kraes, we yu yu sanem mi mi kam.” (Jon 17:3) !Hemia wan bigfala pei ya! Taem yumi yusum buk ya Save Blong Lidim Yu Long Laef We i No Save Finis, yumi save givhan long ol narafala blong lanem wanem we oli mas mekem blong kasem laef we i no save finis. ?Yumi save talem wanem blong wekemap intres blong olgeta mo pulum olgeta blong wantem ridim buk ya Save?
2 Maet yu yusum wan rod blong storeyan we i tokbaot Baebol olsem wan buk blong lidimgud yumi:
◼ “Mifala i stap storeyan wetem ol man raonabaot long mifala long saed blong weples yumi save faenem advaes blong lidimgud yumi blong winim ol trabol long laef. Long taem bifo, plante man oli lukaot advaes long Baebol fastaem. Be naoia, tingting blong ol man i jenis. Plante man oli no moa bilif fulwan long Baebol, oli ting se hem i wan buk we ol man nomo oli raetem. ?Wanem tingting blong yu? [Wet long ansa.] I gat wan gudfala risen from wanem yumi save talem se Baebol i stretgud long taem blong yumi. [Ridim 2 Timote 3:16, 17.] Ol rul blong Baebol oli stret naoia olsem we oli stret long taem we God i lidim ol man blong raetem olgeta.” Openem buk ya Save i go long pej 16, nao toktok smol long ol gudfala advaes long Bigfala Tok blong Jisas antap long Hil. Ridim tok blong sam haeman we i stap long haf 11 mo 13. Askem man blong karem buk, nao mekem plan wetem hem blong kambak bakegen blong ansarem kwestin ya: ?Olsem wanem save blong Baebol i save givhan long yumi wanwan?
3 Maet yu laekem blong tokbaot prea, from hem i wan samting we plante man oli intres long hem:
◼ “From ol trabol we yumi stap fesem long laef blong yumi tede, ?yu ting se prea i rili save givhan long yumi? [Wet long ansa.] Plante man oli harem se oli kam kolosap long God taem oli prea long hem, mo samting ya i givim paoa long olgeta. Hemia nao samting we Baebol i promes. [Openem buk ya Save i go long pej 156, mo ridim Filipae 4:6, 7.] Be, samfala oli talem se God i no stap ansa long prea blong olgeta. Japta ya i tokbaot ‘?Olsem Wanem Yu Save Kam Kolosap Long God?’ [Askem man blong karem buk blong 130 VT.] Japta ya i eksplenem tu olsem wanem yumi save lesin long God, from we, i no se yumi stap toktok long hem nomo, be hem tu i stap toktok long yumi. Yumi save tokbaot samting ya nekis taem.”
4 ?Yu yu laekem blong askem stret long man blong haos blong mekem stadi? Ale, hemia wan rod we maet i wokgud:
◼ “Mifala i stap askem long ol man sipos oli glad blong mekem wan Baebol stadi long haos blong olgeta. ?Yu yu bin mekem wan Baebol stadi bifo samtaem? [Wet long ansa.] Hemia nao buk ya we mifala i stap yusum.” Soem Save buk, openem long pej 3 blong man blong haos i save luk nem blong ol japta, nao askem se: “?Yu yu bin wantem save wanem we Baebol i talem long saed blong ol kwestin ya?” Openem long japta we man blong haos i intres long hem, mo ridim ol smol stampa tok. Eksplenem se yu wantem soem kwiktaem olsem wanem yumi mekem Baebol stadi long ol save ya. Nating se yu statem wan stadi no no gat, livim buk sipos man i promes blong ridim.
5 Tede, fulap man oli glad blong kasem stret save long saed blong trufala God. (Aes. 2:2-4) I wan blesing long yumi blong halpem plante man blong kasem save ya long saed blong Jeova, we i save lidim olgeta long laef.—1 Tim. 2:4.