Wan Taem Blong Wok Moa
1 En blong rabis fasin ya blong wol i stap kam kolosap. Jeova i stap blesem wok blong prij. Taswe yumi mas tingbaot wan tok blong Pita, olsem: “Yufala i mas mekem tingting blong yufala i rere.”—1 Pita 1:13; Aes. 60:22.
2 Taem Pita i mekem tok ya, hem i stap tokbaot olsem wanem blad blong Jisas Kraes we i ron i save sevem yumi. Blong soemaot bilif blong yumi, mo talem tangkyu long Jeova from ol blesing we hem i givim long yumi long rod blong sakrafaes blong Jisas, yumi mas prij. (Jon 3:16) Long taem blong Memoriol, i stret nomo blong mekem moa long wok we Jeova i givim long yumi.
Memoriol Mo Spesel Tok
3 Tisyia, bambae yumi mekem Memoriol long Epril 10, taem we san i godaon finis. Bifo long spesel dei ya, yumi save tingtinggud naoia long fasin blong yumi blong fren gud wetem Jeova, mo blong tangkyu long hem from sakrafaes blong Jisas. ?Olsem wanem? ?Evri dei, yumi stap soemaot bilif blong yumi taem yumi folem gud ol stret rul blong Jeova long ol tingting, ol tok, mo ol wok blong yumi? ?Yumi rili laekem ol narafala, nao yumi traehad blong talemaot Kingdom mo blong mekem disaepol? Memoriol i wan spesel rod blong mekem yumi tingtingbak long ol samting we God Jeova mo Jisas i mekem blong givhan long yumi? (Luk 22:19; 1 Kor. 11:23, 24). Sipos yumi tingbaot ol samting ya, oli save pulum yumi blong mekem olgeta samting we yumi wanwan i save mekem long wok blong prij.
4 Bambae long Maj 25, long bighaf blong ol kongregesen long wol i gat wan spesel tok, nem blong hem: “!Holemtaet Trufala Laef!” Olgeta we oli jes intres long trutok oli save stat kam long ol miting blong kongregesen long dei ya. Mo tu yumi save pulum ol man we bambae oli kam long spesel tok ya, blong oli kam long Memoriol long Epril 10.
Mekem Moa Blong Seremaot Ol Magasin We Oli Impoten
5 Wajtaoa mo Wekap! i givhan bigwan long yumi blong talemaot gud nyus long ol man. Mo tu oli givim kakae long yumi long saed blong speret mo hem i storebaot ol samting we i kamaot long wol. Bambae olgeta pablisa oli laekem spesel wok we sosaete i long ol magasin blong Epril mo Mei. Bambae yumi pulum tingting blong ol man long ol magasin ya taem yumi tokbaot sabskripsen. Taswe taem bambae yufala i kasem ol magasin ya, yufala i mas traehad blong save gud ol tok we i stap insaed long olgeta. Bambae samting ya i mekem yufala i strong moa blong mekem sabskripsen, no sipos wan man i no wantem sabskripsen, blong traem givim tu magasin wetem wan buklet long hem.
6 ?Olsem wanem long program blong yu? ?Yu yu save mekem plan blong kam haftaem paenia long ol manis Epril mo Mei? Sipos plante pablisa blong kongregesen i mekem wok blong paenia wantaem, oli save givgivhan long olgeta long spesel taem ya blong wok moa. Bambae ol elda oli glad blong halpem olgeta. Oli save putum sam narafala miting blong prij, taem i gat nid blong mekem.
7 Tingtinggud long ol fasin blong laef blong yu wan—ol wok blong yu long famle, paoa no sik blong bodi blong yu, wok blong yu, ol wok long skul, mo sam narafala samting bakegen. Sipos yu no save mekem wok blong paenia naoia, ating yu save mekem moa long wok blong prij. Jeova i harem gud taem yumi mekem wok long olgeta tingting mo paoa blong yumi. ?From wanem? From we long rod ya yumi soemaot we yumi laekem hem mo yumi tangkyu long hem from sakrafaes blong pikinini blong hem Jisas. Sipos yumi skelem ol fasin blong yumi wetem ol tok blong Baebol, yumi mekem tingting blong yumi i rere blong wok. Nao yumi save se bambae Jeova i halpem yumi long tabu speret blong hem. Yes, yumi mas leftemap nem blong hem, from we samting ya i olsem wan sakrafaes we yumi mekem, we Jeova i laekem tumas.—Hib. 13:15.