Yumi Kwik Blong Statem Ol Baebol–Stadi
1 Fasin blong statem mo mekem ol Baebol–stadi i wan wok we yumi Wetnes blong Jeova yumi mas mekem. (Mat 28:19, 20) ?Yu yu rere blong mekem olsem, ale yu wok wetem God? (1 Korin 3:9) Wok blong halpem ol narafala blong oli save God we i mekem heven mo wol i rili wan bigfala blesing we God i givim long yumi.
2 Tede, wol i stap jenis oltaem mo plante moa trabol i stap kasem ol man. Taswe ol man we oli tosta long trutok oli wantem save mining blong olgeta samting ya we i stap kamkamaot. Jeova i bin ansarem ol kwestin blong ol man longtaem finis. Sipos yumi tijim ol man ya long Tok blong God, bambae oli save harem gud bakegen. Taswe, yumi mas kwik blong statem ol Baebol–stadi taem yumi gat jans blong mekem olsem.
YUMI NO MESTEM OL JANS BLONG YUMI
3 ?Yu yu save olsem wanem blong statem wan Baebol–stadi wetem wan famle blong yu, no wan man we yu save? Yu yu save gud man ya, taswe yu save faenemaot wanem taem i stret blong yu askem long hem blong mekem wan Baebol–stadi. Yu no mas foget se wan gudfala kwestin no wan tok we yu yu talem long prapa taem blong hem i save leftemap tingting blong wan man, ale hem i save wantem trutok. Sipos yu kasem tingting blong wan man, plante taem man ya i wantem save sam moa samting bakegen. Ale, yu save toktok plante wetem man ya mo samtaem yu save statem wan Baebol–stadi wetem hem.
4 Plante ekspiryens oli soemaot se gudfala fasin blong wan Kristin i save pulum wan man we i no bilif blong hem tu i folem trutok. (1 Pita 3:1, 2) Ating hasban no waef, no sam narafala famle blong wan Kristin i no stap long trutok. Be sipos ol brata sista long kongregesen oli soemaot respek long olgeta, oli save tinghae long kongregesen. Sipos yumi intres long olgeta wanwan, bambae yumi save fren gud wetem olgeta. Mo sipos yumi wok wanples wetem brata no sista we i stap long famle ya, ating bambae yumi gat rod blong statem wan Baebol–stadi wetem hasban, waef no wan famle blong hem.
5 Taem yumi prij long olgeta haos wanwan, yumi mas traem statem wan Baebol–stadi wetem man ya we yumi toktok long hem. ?Yumi save mekem wanem blong kasem mak olsem? Samfala pablisa oli kasem gudfala frut. Taem wan man i askem kwestin long olgeta, oli yusum ol ansa we oli stap long wan buk. Sipos man ya i agri blong ridim buk ya we yumi soemaot long hem no sipos hem i singaot long yumi blong yumi go insaed long haos blong hem, yumi save tekem jans ya blong toktok moa, mo yumi save soemaot long hem olsem wanem yumi mekem wan Baebol_-stadi. Yumi mas luksave hamas taem yumi save stap wetem wan man taem yumi mekem faswan visit. Samtaem, i moa gud we yumi kambak afta, maet long sem dei no long wan narafala dei. Ale, yumi save storeyan moa wetem man ya. Long ol visit we bambae yumi mekem biaen, yumi save storeyan moa long ol poen we yumi bin luk wetem hem taem yumi mitim hem fastaem. Yumi save pulum tingting blong man ya i go long poen ya we yumi bin leftemap long laswan visit we yumi mekem.
YUMI TEKEM EVRI JANS BLONG TALEMAOT TRUTOK
6 Fasin blong tekem evri jans blong talemaot trutok i wan narafala rod we yumi save yusum blong statem ol Baebol–stadi. Evri dei, taem yumi mekem ol wok blong yumi, yumi joen wetem sam man we maet oli wantem stadi long Baebol. Taswe, blong kasem gudfala mak taem yumi toktok wetem ol, yumi save yusum sam fas tok we i stap long buk Reasoning blong statem ol toktok blong yumi. Yumi no mas fraet blong askem fastaem sipos man ya i wantem statem wan Baebol–stadi wetem yumi. Yumi no mas wari from we man ya i laef naraples no sipos yumi ting se yumi no gat jans blong lidim Baebol–stadi ya.
7 Yumi mas wajem gud ol jans we yumi gat blong givim wetnes. Ale, sipos yumi rere blong go prij mo yumi tekem ol traket mo ol magasin wetem yumi, maet ol man oli save intres long trutok from. (Ekles. 11:1) Taem wan man i soemaot se hem i laekem trutok, be haos blong hem i no stap long ples blong prij blong kongregesen blong yumi, yumi save askem adres blong hem mo sam narafala samting bakegen we oli gud blong save. Biaen, yumi save mekem rod blong ol pablisa blong narafala kongregesen we i lukaot long eria ya oli go visitim hem.
8 Wok blong mekem disaepol i no blong samfala nomo. Ful kongregesen i gat responsabiliti blong mekem wok ya. Yumi no mas foget se olgeta Kristin oli mas mekem disaepol. Wok olsem bambae i halpem yumi blong wajem gud ol jans we yumi gat blong statem ol Baebol–stadi.