Paoa Blong Tok Blong God
1 Tok blong God i gat bigfala paoa. (Heb. 4:12) Tedei, i gat pruf long samting ya long laef blong plante milyan man we i jenis i kamgud moa taem ol man oli mekem ol samting we oli lanem long Baebol i wok long laef blong olgeta. I sem mak nomo olsem long faswan handred yia taem ol disaepol blong Jisas oli stap seremaot save blong Baebol long ol narafala man.—Rom. 12:2.
2 Blong ol man oli kasem ol gudfala samting long ol tijing blong Baebol, oli nidim blong luksave Baebol olsem Tok blong God. (1 Tess. 2:13) Long Novemba bambae yumi givim jans long ol man blong oli lanem moa ol impoten samting long saed blong Baebol taem yumi givim jans blong livim New World Translation of the Holy Scriptures mo buk ya Trutok blong Soemaot Rod blong Itenel Laef no buk ya The Bible—God’s Word or Man’s? long ol man we oli intres.
3 ?Ating i gud blong luk bakegen sam long ol gudfala poen long Trutok buk no? I gat sam haf we yumi save makemgud ol bigfala poen blong hem bakegen. Japta 1 i tokbaot ol bigfala blesing long God we bambae oli kam i no longtaem. Plante man we hat blong olgeta i stret oli fraet long ol trabol we oli stap kamaot long wol mo oli wantem faenem wan samting we i save winim ol trabol ya. Kingdom blong God nomo i save winim mo tru long gavman ya nao, ol blesing oli save kam long ol man. (Mat. 6:10; Dan. 2:44) Japta 20 i tokbaot olsem wanem blong mekem laef blong famle i gud mo hemia nao wan samting we bambae plante famle long teritori blong yumi oli intres long hem.
4 Yumi save yusum japta 14 mo 15 blong soemaot long ol man from wanem i impoten blong makemaot trufala skul mo olsem wanem oli save kamaot long medel blong ol gyaman skul. Bigfala Babilon bambae i lus i no longtaem mo ol man we hat blong olgeta i stret oli mas kamaot kwiktaem sipos oli wantem kasem sef.
5 Plante oli no wantem akseptem Baebol olsem tok blong God from fasin blong ol man long Krisendom. Japta 2, “Blong Wanem i Gud Blong Jekemap Skul Blong Yu” bambae i gud blong yusum long taem olsem.
6 Sipos yumi ridim long Baebol blong yumi, man blong haos i save talem se lanwis we oli yusum long New World Translation i klia nomo. No maet man blong haos i intres long mesej blong yumi be hem i no gat Baebol. Long taem olsem yumi save soemaot ol impoten haf we oli stap long Baebol we yumi yusum mo risen from wanem yumi laekem hem moa long ol narafala. Mo tu, yumi save soem lis blong “Indeks Blong Baebol” we i givhan blong faenem sam vas we yumi save olgeta be yumi no save stret ples blong olgeta long Baebol. Mo tu, haf ya “Bible Topics for Discussion” (Ol Storeyan We Oli Stanap Long Baebol) we i stap biaen long Baebol bambae i halpem olgeta we oli intres blong faenem ansa long ol kwestin we plante man oli stap askem.
7 Tru long Baebol, Jeova i soemaot ol fasin blong hem long ol man mo mekem se yumi save ol gudfala fasin blong hem. !Yumi mas yusumgud New world Translation mo Trutok buk blong halpem ol narafala blong oli kasem save long Jeova mo paoa blong Tok blong hem!—2 Kor. 10:4.